News – The Cambodia Daily

កាលពីម្សិលមិញ ព្រឹទ្ធសភាបានអនុម័តផែនការអភិវឌ្ឍន៍យុទ្ធសាស្ត្រថ្នាក់ជាតិពីឆ្នាំ២០១៤ដល់ឆ្នាំ២០១៨ដែលមានទឹកប្រាក់២៦,៦ពាន់លានដុល្លារ នៅក្នុងសម័យប្រជុំលើកទី៥របស់ខ្លួនចាប់តាំងពីការបោះឆ្នោតជាតិកាលពីឆ្នាំមុន ខណៈដែលសមាជិកព្រឹទ្ធសភាមកពីគណបក្ស សម រង្ស៊ី បន្តធ្វើពហិការដដែល។

យោងតាមសេចក្ដីប្រកាសព័ត៌មានរបស់ព្រឹទ្ធសភាបានឲ្យដឹងថា សមាជិកព្រឹទ្ធសភា៤២រូបមកពីគណបក្សប្រជាជនកម្ពុជាក៏បានអនុម័តកិច្ចព្រមព្រៀងបត្យាប័នរវាងប្រទេសកម្ពុជា និងប្រទេសវៀតណាម និងច្បាប់ស្ដីពីកិច្ចសហប្រតិបត្តិការនៅក្នុងករណីរដ្ឋប្បវេណីរវាងប្រទេសទាំងពីរផងដែរ។

សមាជិកព្រឹទ្ធសភាទាំង១១រូបមកពីគណបក្ស សម រង្ស៊ី ដែលកាលពីឆ្នាំ២០១២បានច្របាច់បញ្ចូលគ្នាជាមួយគណបក្សសិទ្ធិមនុស្សដើម្បីបង្កើតជាគណបក្សសង្គ្រោះជាតិនោះនៅតែបន្តធ្វើពហិការព្រឹទ្ធសភា ជាការតវ៉ាទៅនឹងលទ្ធផលនៃការបោះឆ្នោតជាតិឆ្នាំ២០១៣។

លោក គង់ គាំ ប្រធានគណបក្សសម រង្ស៊ី បានលើកឡើងនៅក្នុងសេចក្តីប្រកាសព័ត៌មានកាលពីថ្ងៃអាទិត្យថា ព្រឹទ្ធសភាមិនគួរអនុម័តច្បាប់ទាំងនេះទេ លុះណាតែការធ្វើពហិការបានបញ្ចប់សិន។ លោកបានមានប្រសាសន៍ថា “ជាមួយរដ្ឋសភាឯកបក្សដែលមានតែសមាជិកសភាគណបក្សប្រជាជនកម្ពុជា និងរដ្ឋាភិបាលបច្ចុប្បន្នមិនស្របច្បាប់នោះ ព្រឹទ្ធសភាគួរច្រានចោល និងទុកជាមោឃៈនូវសេចក្ដីព្រាងច្បាប់ និងសេចក្ដីស្នើច្បាប់ណាមួយសិន”។

ទោះជាយ៉ាងណា លោក អ៊ុំ សារិទ្ធ អគ្គលេខាធិការព្រឹទ្ធសភាបានលើកឡើងអំពីការផ្តល់ប្រាក់កម្ចី និងជំនួយឥតសំណងនៅពេលថ្មីៗនេះពីអន្តរជាតិដល់រដ្ឋាភិបាលកម្ពុជា ដូចជាអាមេរិក ជប៉ុន និងអាល្លឺម៉ង់ ជាភ័ស្តុតាងថា រដ្ឋាភិបាលគឺស្របច្បាប់។ លោកបានមានប្រសាសន៍ថា ” សហគមន៍អន្តរជាតិនឹងមិនផ្ដល់ប្រាក់កម្ចី និងជំនួយដល់យើងទេ ប្រសិនបើរដ្ឋាភិបាលមិនស្របច្បាប់នោះ”៕ សារុន

© 2014, ខេមបូឌា ដេលី. រក្សាសិទ្ធិគ្រប់យ៉ាង។ មិនអនុញ្ញាតឲ្យដកស្រង់នូវផ្នែកណាមួយ នៃការចេញផ្សាយនេះ តាមរយៈការបោះពុម្ព តាមប្រព័ន្ធអេឡិចត្រូនិច ផ្សាយតាមរលកធាតុអាកាស សរសេរឡើងវិញ ឬចែកចាយដោយគ្មានការយល់ព្រមជាលាយលក្ខណ៍អក្សរពីចាងហ្វាងការផ្សាយឡើយ។

The post សមាជិកព្រឹទ្ធសភាគណបក្សប្រជាជនកម្ពុជាអនុម័តច្បាប់បីបន្ថែមទៀត appeared first on ខេមបូឌា ដេលី.

កម្មករប្រមូលសំរាមនៅក្នុងរាជធានីភ្នំពេញបានចាប់ផ្តើមធ្វើកូដកម្មជាថ្មីម្តងទៀតពាក់ព័ន្ធនឹងប្រាក់ខែ និងលក្ខខណ្ឌការងារដែលធ្វើឲ្យពួកគេឈប់ប្រមូលសំរាមតាមផ្លូវក្នុងទីក្រុងមួយរយៈពេលជាលើកទី២នៅឆ្នាំនេះ។ cintri

កម្មករប្រហែល១០០នាក់នៅក្រុមហ៊ុនស៊ីនទ្រីជាក្រុមហ៊ុនប្រមូលសំរាម បានធ្វើការតវ៉ានៅដេប៉ូសាំងរបស់ក្រុមហ៊ុននេះស្ថិតនៅក្នុងខណ្ឌដង្កោដើម្បីទាមទារដំឡើងប្រាក់ខែ ទាមទារឲ្យដកប្រធានដេប៉ូសាំងនេះចេញនិងឲ្យដកមន្ត្រីកងរាជអាវុធហត្ថចេញដែលពួកគេនិយាយថា ត្រូវបានដាក់ឲ្យឈរជើងនៅទីនោះចាប់តាំងពីមានការធ្វើកូដកម្មកាលពីខែកុម្ភៈមក។

លោក ប្រាក់ សុខា តំណាងកម្មករក្រុមហ៊ុនស៊ីនទ្រីប្រហែល១.២២៥នាក់ ដែលសុទ្ធតែបានចូលរួមធ្វើកូដកម្មបាននិយាយថា “យើងទាមទារតែអ្វីដែលយើងមិនបានទទួលកាលពីលើកមុន ដែលក្រុមហ៊ុនបានយល់ព្រមដោះស្រាយតែប៉ុណ្ណោះ ប៉ុន្តែក្រុមហ៊ុនមិនបានយកចិត្ត្តទុកដាក់ទេ”។

លោក សុខា បាននិយាយថា ប្រាក់ថ្លៃស្នាក់នៅនិងធ្វើដំណើរនិងប្រាក់ធានារ៉ាប់រងសុខភាពសរុប៣៥ដុល្លារក្នុងមួយខែនោះ ស្ថិតក្នុងចំណោមការទាមទាររបស់កម្មករនៅពេលធ្វើកូដកម្មកាលពីលើកមុន ដែលបានបញ្ចប់បន្ទាប់ពីមានការចរចាអស់រយៈពេលបួនម៉ោងដែលអំឡុងពេលនោះ កម្មករបានយល់ព្រមទទួលយកការដំឡើងប្រាក់ខែចន្លោះពី២០ដុល្លារដល់២៥ដុល្លារ ជាការដំឡើងប្រាក់ខែលើកទី១ដល់កម្មករក្រុមហ៊ុនស៊ីនទ្រីក្នុងរយៈពេល១០ឆ្នាំមកនេះ។

លោក ឃួន យ៉ាណូ នាយប៉ុស្តិ៍សង្កាត់ជើងឯកបានមានប្រសាសន៍ថា ជម្លោះថ្មីនេះកើតឡើងបន្ទាប់ពីអ្នកគ្រប់គ្រងក្រុមហ៊ុនស៊ីនទ្រីបានរាយការណ៍ថា កម្មករពីរនាក់បានបូមសាំង “ដែលនៅសល់” ពីធុងសាំងរបស់រថយន្តប្រមូលសំរាមនៅពេលបញ្ចប់ម៉ោងធ្វើការរបស់ខ្លួន។ ក្រុមហ៊ុនស៊ីនទ្រីបានរឹបអូសយកប្រាក់៣០០ដុល្លារពីកម្មករម្នាក់ក្នុងចំណោមកម្មករទាំងនោះជាសំណង។

កម្មករពីរនាក់ត្រូវកងរាជអាវុធហត្ថចាប់ខ្លួននិងសាកសួរនៅដេប៉ូសាំងមុនពេលត្រូវបានដោះលែងវិញដោយមានកិច្ចសន្យាថា ពួកគេនឹងឈប់លក់សាំង “ដែលនៅសល់ទៀត”។

ទោះយ៉ាងណា លោក សុខា បានអះអាងថា លើកមុនក្រុមហ៊ុនស៊ីនទ្រីបានយល់ព្រមថា អ្នកបើកបរអាចបូមសាំងលក់ច្រើនបំផុតពីរលីត្រក្នុងមួយវេនៗ។

លោក រុំ សំបូរ អាយុ៣៣ឆ្នាំដែលបានបើកបររថយន្តឲ្យក្រុមហ៊ុនស៊ីនទ្រីជាងប្រាំពីរឆ្នាំមកហើយបាននិយាយថា អ្នកបើកបរត្រូវបានអនុញ្ញាតឲ្យបូមសាំងបួនឬប្រាំលីត្រនៅពេលបញ្ចប់វេននីមួយៗ ហើយបានអះអាងថា ក៏មានការដាក់មន្ត្រីកងរាជអាវុធហត្ថដើម្បីបំភិតបំភ័យកម្មករផងដែរ។

លោកបាននិយាយថា “បន្ទាប់ពីយើងបានចូលរួមធ្វើកូដកម្មកាលពីលើកមុន ក្រុមហ៊ុនបានដាក់សម្ពាធយើងឲ្យឈប់តវ៉ាប្រឆាំងក្រុមហ៊ុនទៀត។ ក្រុមហ៊ុនយកកងរាជអាវុធហត្ថប្រដាប់អាវុធមកដាក់ជំនួសសន្តិសុខឯកជនដើម្បីគំរាមកំហែងពួកយើង”។

លោក សេង ប៊ុនរិទ្ធ អ្នកគ្រប់គ្រងជាន់ខ្ពស់នៅក្រុមហ៊ុនស៊ីនទ្រីបាននិយាយថា ការចោទប្រកាន់ទាំងនេះមិនពិតទេ ហើយថា កម្មករត្រូវបានព្រមានចំពោះការបូមសាំង។ លោកបាននិយាយថា “យើងសុំកម្លាំងទាំងនេះមកការពារសន្តិសុខសាធារណៈតែប៉ុណ្ណោះ”។ លោកបានបដិសេធមិនឆ្លើយសំណួរបន្ថែមឡើយ។

លោក មុំ សារ៉ន ប្រធានសហព័ន្ធសហជីពលើកតម្កើងជីវភាពកម្មករនិយោជិតខ្មែរបានមានប្រសាសន៍ថា កូដកម្មនឹងបន្តទៀតរហូតដល់ទទួលបានការឆ្លើយតបតាមការទាមទាររបស់កម្មករ៕សារុន

The post កម្មករក្រុមហ៊ុនស៊ីនទ្រីធ្វើកូដកម្មដោយសារមិនមានការឆ្លើយតបតាមការទាមទាររបស់ខ្លួន appeared first on ខេមបូឌា ដេលី.

លោក ហម មុត មេបញ្ជាការកងរាជអាវុធហត្ថក្រុងប៉ោយប៉ែត បានស្លាប់នៅសណ្ឋាគារមួយក្នុងទីក្រុងភ្នំពេញ នៅពេលទៀបភ្លឺព្រឹកម្សិលមិញ បន្ទាប់ពីគាត់បានធ្លាក់ពីជាន់ទី៤តាមប្រឡោះជណ្ដើរយន្តដែលមិនទាន់សាងសង់រួចរាល់នៅសណ្ឋាគារនេះ ដែលកម្មករសំណង់មិនបានដាក់រនាំងបាំង។

បុគ្គលិកសណ្ឋាគារបាននិយាយថា លោក ហម មុត អាយុ៣៩ឆ្នាំ បានស្លាប់នៅសណ្ឋាគារ MidlandHotel នៅក្នុងសង្កាត់បឹងកក់១ ខណ្ឌទួលគោក បន្ទាប់ពីគាត់ត្រឡប់មកពីបរិភោគអាហារពេលល្ងាចនៅម៉ោងប្រហែល៣ទៀបភ្លឺជាមួយគ្រួសាររបស់គាត់ និងសហការីមួយក្រុមដែលស្នាក់នៅសណ្ឋាគារនេះដែរ។

លោក គុយ លាង បុគ្គលិកនៅកន្លែងទទួលភ្ញៀវនៃសណ្ឋាគារនេះបាននិយាយថា ភ្ញៀវមួយក្រុមនេះបានចុះឈ្មោះចូលស្នាក់នៅក្នុងបន្ទប់ចំនួនប្រាំពីរបន្ទប់នៅម៉ោងប្រហែល៥ល្ងាចថ្ងៃច័ន្ទ ហើយបន្ទាប់មកបានចាកចេញទៅបរិភោគអាហារពេលល្ងាចភ្លាមៗតែម្ដង។

លោក លាង បាននិយាយថា គ្រួសាររបស់លោក ហម មុត បានសង្កេតឃើញថា គាត់បានបាត់ខ្លួនពីបន្ទប់ភ្លាមៗបន្ទាប់ពីវិលត្រឡប់មកវិញ ប៉ុន្តែបានសន្និដ្ឋានថា គាត់បានចាកចេញពីសណ្ឋាគារទៅកម្សាន្តកន្លែងផ្សេងទៀត។

នៅចុងក្រោយដោយមិនអាចទាក់ទងលោក ហម មុត បាន គ្រួសារបានចាប់ផ្ដើមស្វែងរកនៅក្នុងសណ្ឋាគារនេះ ដោយសង្ឃឹមថាគាត់នៅទីនោះ។ លោក លាង បាននិយាយថា នៅម៉ោងប្រហែល៥ព្រឹក មានការផ្អើលអំពីជនរងគ្រោះដែលបាត់ខ្លួន។ កូនៗសួរម្ដាយថា តើប៉ានៅឯណា?”

ក្រុមអ្នកស្វែងរកបានប្រទះឃើញមេបញ្ជាការកងរាជអាវុធហត្ថរូបនេះដេកផ្កាប់មុខនៅជាន់ផ្ទាល់ដីត្រង់ប្រឡោះជណ្ដើរយន្តដែលមិនទាន់សាងសង់រួចនេះ ដោយស្លៀកតែខោទ្រនាប់ខ្មៅប៉ុណ្ណោះ។ ពេលទៅដល់មន្ទីរពេទ្យកាល់ម៉ែត គ្រូពេទ្យប្រាប់ថា គាត់បានស្លាប់ហើយ។

រូបភាពពីកាមេរ៉ាសុវត្ថិភាព ដែលគេបង្ហោះនៅតាមគេហទំព័រព័ត៌មានដើមអម្ពិលបង្ហាញថា លោក ហម មុត ចាកចេញពីបន្ទប់គាត់ ហើយបានដើរទៅដើរមកតាមផ្លូវដើរនៅមុខបន្ទប់សណ្ឋាគារនេះ ដោយស្លៀកតែខោទ្រនាប់ ប៉ុន្តែវីដេអូនេះបានចប់មុនពេលគាត់ធ្លាក់តាមប្រឡោះជណ្ដើរយន្តនោះ។

រូបភាពវីដេអូដែលចាប់តាមកាមេរ៉ាសុវត្ថិភាពនៅក្នុងសណ្ឋាគារនេះបង្ហាញម៉ោង៨និង៤៩នាទីព្រឹកថ្ងៃសៅរ៍ ប៉ុន្តែបុគ្គលិកសណ្ឋាគារឮគេនិយាយថា ម៉ាស៊ីនកាមេរ៉ានេះដើរខុសម៉ោង។

លោក រ័ត្ន ស៊្រាង មេបញ្ជាការកងរាជអាវុធហត្ថរាជធានីភ្នំពេញបានមានប្រសាសន៍ថា ” អាជ្ញាធរកំពុងស៊ើបអង្កេតការស្លាប់របស់វរសេនីយ៍ទោ ហម មុត ប៉ុន្តែសម្រាប់ពេលនេះយើងអាចសន្និដ្ឋានថា ការស្លាប់របស់គាត់គឺធ្លាក់ដោយចៃដន្យ”។

ឧត្តមសេនីយ៍ឯក រ័ត្ន ស៊្រាង ដែលធ្លាប់ធ្វើជាមេបញ្ជាការកងរាជអាវុធហត្ថខេត្តបន្ទាយមានជ័យ រហូតដល់ឆ្នាំមុនបានមានប្រសាសន៍ថា លោកបានធ្វើការជិតស្និទ្ធជាមួយលោក ហម មុត អស់រយៈពេលជាច្រើនឆ្នាំ។

លោក រ័ត្ន ស៊្រាង បានមានប្រសាសន៍ថា ” ខ្ញុំមានការសោកស្ដាយណាស់ចំពោះការបាត់បង់សហការីដ៏ល្អរបស់ខ្ញុំ ដែលជាមេបញ្ជាការកងរាជអាវុធហត្ថដ៏ល្អសម្រាប់ប្រជាពលរដ្ឋនៅក្រុងប៉ោយប៉ែត។ សូម្បីតែខ្ញុំឈប់ធ្វើជាមេបញ្ជាការកងរាជអាវុធហត្ថខេត្តបន្ទាយមានជ័យហើយក៏ដោយ ក៏សហការីរបស់ខ្ញុំ និងខ្ញុំចាត់ទុកគាត់ជាបងប្អូននិងគ្រួសារតែមួយដែរ”។

លោកបានមានប្រសាសន៍ថា ” វរសេនីយ៍ទោ ហម មុត គឺជាកងរាជអាវុធហត្ថជំនាន់ខ្ញុំ និងជាអ្នកដែលខ្ញុំបង្ហាត់ គាត់គោរពវិន័យរបស់កងរាជអាវុធហត្ថ និងធ្វើការងារល្អក្នុងតួនាទីរបស់គាត់ជាមេបញ្ជាការកងរាជអាវុធហត្ថក្រុងប៉ោយប៉ែត”។

លោក ឱក បូរិន មេបញ្ជាការកងរាជអាវុធហត្ថថ្មីនៃខេត្តបន្ទាយមានជ័យ បានមានប្រសាសន៍ថា លោកមានការសោកស្តាយណាស់ចំពោះការស្លាប់នេះ ប៉ុន្តែលោកបានមានប្រសាសន៍ថា គេគួរតែដាក់រនាំងបាំងនៅមុខច្រកចូលជណ្ដើរយន្តនោះ។

លោកបានមានប្រសាសន៍ថា ” យើងទាំងអស់គ្នានៅទីបញ្ជាការកងរាជអាវុធហត្ថខេត្តបន្ទាយមានជ័យមានការសោកស្ដាយណាស់ ដោយបានឮថា វរសេនីយ៍ទោ ហម មុត បានស្លាប់។ វាជាឧបទ្ទវហេតុ ប៉ុន្តែវាជាកំហុសដ៏ធំរបស់ម្ចាស់សណ្ឋាគារ ដែលត្រូវទទួលខុសត្រូវចំពោះការស្លាប់វរសេនីយ៍ទោ ហម មុត”។

លោក បូរិន បានមានប្រសាសន៍ថា មន្ត្រីកងរាជអាវុធហត្ថក្រោមបញ្ជារបស់លោក ហម មុត តែងតែសហការជាមួយអាជ្ញាធរខេត្តក្នុងការបង្ក្រាបការជួញដូរគ្រឿងញៀនឆ្លងព្រំដែនចូលមកក្រុងប៉ោយប៉ែត ដែលជាកន្លែងជួញដូរគ្រឿងញៀន៕ គឹមហឿន

The post មេបញ្ជាការកងរាជអាវុធហត្ថក្រុងប៉ោយប៉ែតធ្លាក់ពីលើសណ្ឋាគារស្លាប់ appeared first on ខេមបូឌា ដេលី.

ដោយមានការគាំទ្រពីកម្លាំងនគរបាលកាន់តែច្រើនឡើងៗនោះ ក្រុមហ៊ុនដែលកាន់កាប់ដោយភរិយារបស់លោក ស៊ុយ សែម រដ្ឋមន្ត្រីក្រសួងរ៉ែ និងថាមពល កាលពីម្សិលមិញ បានបន្តដំណើរការសាងសង់របងព័ទ្ធដីដែលមានជម្លោះអស់រយៈពេលប្រាំពីរឆ្នាំ នៅក្នុងខេត្តកំពង់ឆ្នាំងដែលបានផ្ទុះអំពើហិង្សាបីលើកក្នុងរយៈពេលបួនថ្ងៃកន្លងមកនេះ។

ដោយមានកម្លាំងនគរបាលប្រហែល១៥០នាក់ឃ្លាំមើល កម្មករប្រហែល៤០០នាក់បានបន្តសាងសង់របងបេតុងកម្ពស់ជាង២ម៉ែត្រ ព័ទ្ធជំុវិញដីមានវិវាទចំនួន១៤៥ហិកតាស្ថិតក្នុងឃុំតាជេស ស្រុកកំពង់ត្រឡាច ដែលធ្វើឲ្យគ្រួសារអ្នកភូមិរស់នៅក្នុងសហគមន៍នេះមិនអាចចេញចូលបាន ដែលពួកគាត់ភាគច្រើនបានធ្វើស្រែចម្ការនៅលើដីនេះរយៈពេលច្រើនទសវត្សរ៍មកហើយ។

ស៊ិន ឃីម អាយុ២៨ឆ្នាំ ជាកម្មកររបស់ក្រុមហ៊ុន ខេឌីស៊ី ដែលទទួលបន្ទុកសាងសង់នៅកន្លែងនោះបាននិយាយថា ” ថ្ងៃេនះកម្មករអាចបន្តសាងសង់របង បន្ទាប់ពីមិនមានការជំទាស់ពីអ្នកភូមិ ដែលបានប៉ះទង្គិចជាមួយកម្មកររបស់យើងម្តងហើយម្តងទៀត កាលពីចុងសប្តាហ៍ និងកាលពីម្សិលមិញ”។

បើទោះជាអ្នកភូមិបានលើកឡើងថា កម្មករដែលត្រូវបានបញ្ជូនមកសាងសង់របងបានបង្កអំពើហិង្សាក្នុងរយៈពេលប៉ុន្មានថ្ងៃថ្មីៗនេះ ដោយប្រើចំពាមកៅស៊ូបាញ់គ្រាប់ដែក និងធ្នូមកលើអ្នកភូមិក៏ដោយ ក៏លោក ឃីម បានបន្ទោសអ្នកភូមិថាបានប្រើអំពើហិង្សានេះដែរ។

កម្មកររូបនេះបានបន្តទៀតថា ” ការប្រឈមមុខដាក់គ្នានេះបានកើតឡើងដោយសារតែអ្នកភូមិ។ ប្រសិនបើពួកគាត់មិនរារាំងគ្រឿងចក្ររបស់យើង ព្យាយាមរារាំងយើងមិនឲ្យរានដីទេនោះ វាគ្មានអំពើហិង្សាកើតឡើងឡើយ”។

កាលពីឆ្នាំ២០០៧ អ្នកភូមិជាង១០០គ្រួសារបានដាក់ពាក្យបណ្តឹងប្តឹងអ្នកស្រី ជា ខេង ម្ចាស់ក្រុមហ៊ុន ខេឌីស៊ី និងជាភរិយាលោក ស៊ុយ សែម ដែលតាមចោទថា បានរំលោភយកដីរបស់ពួកគាត់។ អ្នកភូមិប្រហែលពាក់កណ្តាលបានធ្វើការតវ៉ារាប់ឆ្នាំមកហើយរហូតដល់ក្រុមហ៊ុនខេឌីស៊ីបានបង្កើតគណៈកម្មការពិសេសមួយកាលពីខែមីនា ដើម្បីដោះស្រាយវិវាទដីធ្លីនេះ។ ដោយមានការគាបសង្កត់ពីក្រុមហ៊ុន និងមន្ត្រីមូលដ្ឋានឲ្យទទួលយកសំណងដែលគេផ្តល់ឲ្យ បើមិនដូច្នោះទេ នឹងមិនទទួលបានអ្វីនោះ ប្រជាជនទាំងអស់លើកលែងតែអ្នកភូមិ១៦គ្រួសារប៉ុណ្ណោះ បានយល់ព្រមទទួលយកសំណង។

នៅខែនេះក្រុមហ៊ុនរបស់អ្នកស្រី ជា ខេង បានបន្តសង់របងព័ទ្ធជុំវិញដីនេះ ប៉ុន្តែគេមិនច្បាស់ថា តើដីនេះទុកដើម្បីធ្វើអ្វីនោះឡើយ។

លោក ជួប ចាន់ធឿន នាយប៉ុស្តិ៍ឃុំបានមានប្រសាសន៍ថា លោកមិនដឹងថាតើនគរបាល
នឹងឈរជើងនៅក្នុងសហគមន៍នេះដើម្បីរក្សាឲ្យមានភាពស្ងប់ស្ងាត់យូរប៉ុណ្ណានោះទេ។

លោកបានមានប្រសាសន៍ថា ” វាស្ងប់ស្ងាត់ហើយថ្ងៃនេះ ពីព្រោះអ្នកភូមិមិនបានប្រើអំពើហិង្សាណាមួយជាមួយកម្លាំងនគរបាល ឬទៅកាន់ដីនោះដើម្បីរារាំងកម្មកររបស់ក្រុមហ៊ុនឡើយ”។

កាលពីថ្ងៃច័ន្ទ នគរបាលបានព្យាយាមចូលក្នុងផ្ទះអ្នកស្រី អ៊ុំ សុភី តំណាងអ្នកភូមិដែលនិយាយឥតសំចៃម្នាក់ដែលនគរបាលចង់ចាប់ខ្លួន។ នគរបាលបានដកថយវិញនៅពេលអ្នកភូមិបានតតាំង និងគំរាមគប់គ្រាប់បែកសាំងដាក់ពួកគេ។

អ្នកស្រី សុភី បាននិយាយថា គេដាក់នគរបាលដើម្បីបំភិតបំភ័យអ្នកភូមិ ហើយអនុញ្ញាតឲ្យក្រុមហ៊ុនអ្នកស្រី ជា ខេង បន្តដំណើរការ។ អ្នកស្រីបន្តថា ” វត្តមាននគរបាលមិនមែនមកការពារសន្តិសុខជូនពួកយើងទេ ពីព្រោះពួកគេនឹងមិនជួយអ្នកភូមិទេ ប្រសិនបើយើងប្រឈមមុខជាមួយកម្មកររបស់ក្រុមហ៊ុន៕សារុន

The post ក្រុមហ៊ុនខេឌីស៊ីដាក់កម្លាំងនគរបាលបន្ថែមខណៈដែលកម្មករបន្តសង់របង appeared first on ខេមបូឌា ដេលី.

អ្នកជាតិនិយម និងព្រះសង្ឃខ្មែរក្រោមប្រហែល១០០អង្គ-នាក់ត្រូវបានបំបែកដោយ ហិង្សានៅខាងក្រៅស្ថានទូតវៀតណាមក្នុងរាជធានីភ្នំពេញកាលពីម្សិលមិញ បន្ទាប់ពីមានការតវ៉ាចំពោះការអត្ថាធិប្បាយរបស់អ្នកការទូតម្នាក់ដែលថា អតីតខេត្តមួយចំនួននៅកម្ពុជាក្រោមត្រូវបានគ្រប់គ្រងដោយវៀតណាមមុនឆ្នាំ១៩៤៩។ cam-photo-khmer-krom

លោក ត្រាន វ៉ាន់ថុង អ្នកនាំពាក្យស្ថានទូត បានមានប្រសាសន៍នៅក្នុងបទសម្ភាសតាមវិទ្យុកាលពីខែមុនថា ខេត្តទាំងនោះជាកម្មសិទ្ធិរបស់វៀតណាម “យូរណាស់មកហើយ” មុនពេលរបបអាណានិគមបារាំង បានប្រគល់ខេត្តទាំងនេះជាផ្លូវការទៅឲ្យរដ្ឋវៀតណាមថ្មី។

ក្រុមអ្នកតវ៉ាដែលភាគច្រើនមានទំនាក់ទំនងជាមួយគណបក្សសង្គ្រោះជាតិបានប្រមូលផ្ដុំគ្នានៅមុខស្ថានទូតនេះ ទាមទារឲ្យលោក ត្រាន សូមអភ័យទោសចំពោះការបកស្រាយរបស់លោកអំពីការគ្រប់គ្រងនេះ។

លោក ទិប ទាវ នាយកប្រតិបត្តិសហព័ន្ធនិស្សិតបញ្ញវន្តកម្ពុជា ដែលបានជួយដឹកនាំការតវ៉ាបានមានប្រសាសន៍ថា “យើងចង់ឲ្យស្ថានទូតវៀតណាមបង្ហាញថា កម្ពុជាក្រោមជាកម្មសិទ្ធិរបស់ពួកគេយូរមកហើយ។ យើងមានឯកសារ និងភ័ស្តុតាងបង្ហាញថា កម្ពុជាក្រោមជាកម្មសិទ្ធិរបស់វៀតណាមរយៈពេល៦៥ឆ្នាំហើយ”។

មេដឹកនាំនិស្សិតរូបនេះបានមានប្រសាសន៍ថា “ពួកគេមានពេលបីខែដើម្បីឆ្លើយតបចំពោះការទាមទាររបស់យើង ហើយប្រសិនបើគ្មានការឆ្លើយតបទេ យើងនឹងធ្វើការតវ៉ាដ៏ធំ”។

នៅម៉ោងប្រហែល៨និង៣០នាទីព្រឹក សន្តិសុខខណ្ឌចំការមន ដែលពាក់មួកសុវត្ថិភាពបិទមុខជិតនិងប្រដាប់ដោយដំបងឆក់បានបង្ហាញខ្លួននៅកន្លែងតវ៉ានៅតាមមហាវិថីព្រះមុនីវង្ស ហើយបានចាប់ផ្ដើមបំបែកក្រុមអ្នកតវ៉ា។ ដំបូង សន្តិសុខបានផ្លុំកញ្ចែរុញច្រានអ្នកតវ៉ាឲ្យចេញពីស្ថានទូត ហើយបន្ទាប់មកបានចាប់ផ្ដើមយកដំបងវាយតែម្ដង។

សន្តិសុខមួយចំនួនបានដេញវាយអ្នកដែលព្យាយាមរត់គេច ចំណែកមួយចំនួនទៀតយកដំបងគប់អ្នកតវា៉ដែលរត់គេច ហើយបានចាប់ផ្ដើមវាយអ្នកឈរមើលមួយចំនួន ដែលបានប្រមូលផ្ដុំគ្នាមើលហេតុការណ៍នោះ។

នៅខាងមុខស្ថានទូត សន្តិសុខម្នាក់បានចាប់យកទូរស័ព្ទស្មាតហ្វូនរបស់ព្រះសង្ឃមួយអង្គ។ អ្នកតវ៉ាម្នាក់ទៀតដែលឈរនៅក្បែរនោះបានយក iPad របស់ខ្លួនថតពីការចាប់យកទូរស័ព្ទនេះ ហើយបន្ទាប់មកបានព្យាយាមរត់គេចពីសន្តិសុខ ដែលបានចាប់ និងធាក់គាត់មុនពេលចាប់យក iPad ហើយគេចខ្លួនបាត់។ បុរសរូបនេះឈ្មោះ អាន បា៉កផាម អាយុ៣៥ឆ្នាំបាននិយាយថា ” មន្ត្រីខណ្ឌចំការមន បានប្រាប់ខ្ញុំថា ឥឡូវនេះ iPad របស់ខ្ញុំស្ថិតក្នុងដៃរបស់អភិបាលរងខណ្ឌ”។

រូបភាពវីដេអូអំពីហេតុការណ៍នេះ ព្រមទាំងរូបភាពវីដេអូអំពីសន្តិសុខពាក់មួកសុវត្ថិភាពជាច្រើននាក់ ដែលបានរុញលោក រៀល ខេមរិន្ទ សមាជិកសភាជាប់ឆ្នោតគណបក្សសង្គ្រោះជាតិផ្ទប់ជញ្ជាំង ហើយបានវាយដំ និងទាត់ធាក់លោកនោះ ត្រូវបានផ្សព្វផ្សាយយ៉ាងច្រើនតាមបណ្ដាញទំនាក់ទំនងសង្គម។

នៅម៉ោងប្រហែល៩ព្រឹក នគរបាលបង្ក្រាបបាតុកម្មបានមកដល់ ហើយបានដាក់របាំងបិទផ្លូវនៅចម្ងាយប្រហែល៥០០ម៉ែត្រពីខាងត្បូងស្ថានទូតនៅតាមមហាវិថីព្រះមុនីវង្ស។ ក្រុមអ្នកតវ៉ាបានបន្តស្រែកពាក្យរើសអើងជាតិសាសន៍ដាក់នគរបាល ដោយចោទពួកគេថាជាវៀតណាម មុនពេលមានការបំបែកនៅម៉ោងប្រហែល១០ព្រឹក។

នៅពេលទាក់ទងតាមទូរស័ព្ទបន្ទាប់ពីហេតុការណ៍បានកើតឡើង លោក ឡុង ឌីម៉ង់ អ្នកនាំាពាក្យសាលារាជធានីបានបដិសេធថា លោកមិនដឹងពីការចាប់យកទូរស័ព្ទ និងiPad ទេ ហើយបាននិយាយការពារការបង្ក្រាបរបស់សន្តិសុខខណ្ឌទៅលើការតវ៉ានេះ។លោកបានមានប្រសាសន៍ថា ” យើងត្រូវចាត់វិធានការទប់ស្កាត់ភាពអនាធិបតេយ្យ”។

លោក ត្រាន ដែលសម្ដីរបស់លោកបានបង្កឲ្យមានការតវ៉ានេះ មិនអាចទាក់ទងសុំអត្ថាធិប្បាយបានទេ ប៉ុន្តែស្ថានទូតវៀតណាមបានចេញសេចក្ដីថ្លែងការណ៍ថ្កោលទោសចំពោះការតវ៉ានេះ ហើយបានលើកឡើងពីចំណុចសំខាន់ៗនៃពាក្យសម្តីរបស់លោក។

សេចក្ដីថ្លែងការណ៍ដដែលនេះលើកឡើងថា ” ស្ថានទូតចាត់ទុកទង្វើនេះថា ជាការជ្រៀតជ្រែកក្នុងអធិបតេយ្យភាព និងកិច្ចការផ្ទៃក្នុងរបស់វៀតណាម។ វៀតណាមភាគខាងត្បូង គឺជាផ្នែកដ៏សំខាន់នៃទឹកដីវៀតណាម ហើយបើតាមច្បាប់អន្តរជាតិ ត្រូវបានទទួលស្គាល់ពេញលេញដោយអង្គការសហប្រជាជាតិ អង្គការអន្តរជាតិ និងប្រទេសទាំងអស់ក្នុងពិភពលោក រួមទាំងប្រទេសជាសមាជិកអាសា៊នផងដែរ”។

អតីតទឹកដីកម្ពុជាក្រោមត្រូវបានគ្រប់គ្រងដោយបារាំង ជាអាណានិគមឥណ្ឌូចិនរបស់ខ្លួនចន្លោះឆ្នាំ១៨៦២ និងការទទួលស្គាល់ពីរដ្ឋវៀតណាមក្នុងឆ្នាំ១៩៤៩។

ទឹកដីនេះស្ថិតនៅក្រោមការគ្រប់គ្រងរបស់វៀតណាមចាប់តាំងពីពាក់កណ្ដាលសតវត្សរ៍ទី១៧ ដែលនៅពេលនោះអ្នកដឹកនាំប្រទេសនេះបានកេងយកចំណេញពីជម្លោះផ្ទៃក្នុងនៅប្រទេសកម្ពុជា ហើយបានបញ្ជូនជនជាតិវៀតណាមឲ្យមករស់នៅដើម្បីកាន់កាប់យកទឹកដីនេះតែម្តង៕សារុន

The post សន្តិសុខខណ្ឌបានបំបែកដោយហិង្សាទៅលើការតវ៉ានៅស្ថានទូតវៀតណាម appeared first on ខេមបូឌា ដេលី.

កម្មករដែលគាំទ្រសម្ព័ន្ធសហជីពចលនាកម្ពុជា បានឃុំខ្លួនមន្ត្រីបីរូបមកពីសហជីពសេរីកម្មករនៅក្នុងរោងចក្រអូសេអង់ (Ocean Garment) ក្នុងរាជធានីភ្នំពេញអស់រយៈពេលប្រាំបីម៉ោងកាលពីម្សិលមិញ បន្ទាប់ពីសហជីពទាំងពីរនេះឈ្លោះគ្នាដណ្ដើមចេញមុខតំណាងឲ្យកម្មករនៅក្នុងវិវាទប្រាក់ខែ។

កម្មករប្រមាណ១.០០០នាក់នៅរោងចក្រអូសេអង់ បានធ្វើការតវ៉ាចាប់តាំងពីចុងខែឧសភាមកម្លេ៉ះ បន្ទាប់ពីរោងចក្រនេះបានផ្អាកប្រតិបត្តិការរយៈពេលមួយខែ ដោយសារតែទទួលបានបញ្ជាទិញតិចតួច ដោយសុខចិត្តបើកប្រាក់ខែឲ្យកម្មករត្រឹមតែ១៥ដុល្លារប៉ុណ្ណោះសម្រាប់រយៈពេលនេះ។ សម្ព័ន្ធសហជីពចលនាកម្ពុជា ជាអ្នកតំណាងឲ្យកម្មករនៅក្នុងវិវាទនេះ ដែលត្រូវបានបញ្ជូនទៅក្រុមប្រឹក្សាអាជ្ញាកណ្ដាលកាលពីខែមុន បន្ទាប់ពីភាគីទាំងពីរមិនបានឈានដល់ការព្រមព្រៀង។

ទោះជាយ៉ាងណា កាលពីព្រឹកម្សិលមិញមន្ត្រីសហជីពសេរីកម្មករចំនួនប្រាំមួយរូបបានចុះទៅជួបកម្មករតាមផ្ទះនៅជិតបរិវេណរោងចក្រ ដើម្បីផ្ដល់ប្រាក់ឲ្យពួកគេ ប្រសិនបើពួកគេព្រមចុះហត្ថលេខាលើឯកសារបញ្ចប់កិច្ចសន្យារបស់ខ្លួនជាមួយរោងចក្រនេះ នេះបើយោងតាមការលើកឡើងរបស់លោក ប៉ាវ ស៊ីណា ប្រធានសម្ព័ន្ធសហជីពចលនាកម្ពុជា។

លោកបានមានប្រសាសន៍ថា “ពួកគេបានជំរុញកម្មករ ហើយបានប្រាប់ពួកគេថា ប្រសិនបើពួកគេមិនយកប្រាក់នេះមុនពេល [មន្ត្រីសហជីពសេរីកម្មករ] ចាកចេញទេ ពួកគេនឹងមិនទទួលបានអ្វីទាំងអស់”។

លោក ប៉ាវ ស៊ីណា មានប្រសាសន៍ថា សកម្មភាពរបស់សហជីពសេរីកម្មករចុះទៅតាមផ្ទះរបស់កម្មករបានបង្កជាមន្ទិលដល់សមាជិកសម្ព័ន្ធសហជីពចលនាកម្ពុជា នៅរោងចក្រនេះ ដែលបានទៅដល់កន្លែងកើតហេតុ និងចាប់ក្រៀកមន្ត្រីសហជីពសេរីកម្មករបីរូបចូលទៅក្នុងរោងចក្រ ដោយឃាត់ខ្លួនពួកគេធ្វើជាចំណាប់ខ្មាំងរហូតដល់ម៉ោង៥ល្ងាច។

មន្ត្រីសហជីពសេរីកម្មករចំនួនបីរូបទៀតបានរត់ភៀសខ្លួនទាំងការភ័យខ្លាច។ លោកបានមានប្រសាសន៍កាលពីរសៀលម្សិលមិញថា “មន្ត្រីបីរូបកំពុងត្រូវកម្មកររោងចក្រអូសេអង់ ចាប់ឃុំនៅក្នុងរោងចក្រនៅឡើយ ពីព្រោះកម្មករទាំងនេះចង់ដឹងថាលុយនោះជារបស់អ្នកណា។ ប្រសិនបើសហជីពសេរីកម្មករគ្មានសហជីពពាក់ព័ន្ធនៅក្នុងរោងចក្រនេះទេ ពួកគេគួរតែឈប់ជ្រៀតជ្រែកបញ្ហានេះ”។

ចំណែកឯលោក ជា មុនី ប្រធានសហជីពសេរីកម្មករបានមានប្រសាសន៍ថា លោកគ្រាន់តែបញ្ជូនតំណាងឲ្យទៅបើកប្រាក់ជូនកម្មករប្រហែល៤០នាក់ប៉ុណ្ណោះ បន្ទាប់ពីពួកគេសុំឲ្យលោកជួយចរចាក្នុងវិវាទនេះ។ លោកមានប្រសាសន៍ទៀតថា “យើងមិនបានឃុបឃិតជាមួយរោងចក្រទេ ពីព្រោះកម្មករដែលនិយាយថាពួកគាត់ត្រូវការប្រាក់ បានអង្វរករខ្ញុំ។ ប្រសិនបើកម្មករ ឬរោងចក្រមិនបានស្នើមកខ្ញុំទេ ខ្ញុំមិនជួយធ្វើជាតំណាងឲ្យកម្មករទាំងនោះឡើយ។ ខ្ញុំជួយពីព្រោះខ្ញុំមានកម្មករមួយចំនួនដែលគាំទ្រសហជីពរបស់ខ្ញុំកាលពីលើកមុនៗ”។

យោងតាមលោក ហួន វណ្ណា មន្ត្រីសម្ព័ន្ធសហជីពចលនាកម្ពុជា បានឲ្យដឹងថា លោក ម៉ាន់ សេងហាក់ ជំនួយការរបស់លោក ជា មុនី បានបើកប្រាក់ផ្ដាច់សរុប១.២០០ដុល្លារដល់កម្មករប្រាំបីនាក់ មុនពេលគាត់ត្រូវបានចាប់ឃុំខ្លួននៅក្នុងរោងចក្រនេះ៕ សុខុម

The post សហជីពពីរប៉ះទង្គិចគ្នាដោយសារដណ្តើមចេញមុខជួយកម្មករនៅរោងចក្រអូសេអង់ appeared first on ខេមបូឌា ដេលី.

បុរសជនជាតិបែលហ្ស៊ិកម្នាក់ដែលត្រូវបានដោះលែងឲ្យនៅក្រៅឃុំបណ្តោះអាសន្នពីពន្ធនាគារខេត្តកំពតបន្ទាប់ពីត្រូវបានឃុំខ្លួនអស់រយៈពេលមួយឆ្នាំក្នុងនាមជាជនសង្ស័យដ៏សំខាន់ក្នុងករណីឃាតកម្មលើភ្ញៀវទេសចរជនជាតិបារាំងនោះបាននិយាយកាលពីថ្ងៃច័ន្ទថា លោកបានវិលត្រឡប់ទៅប្រទេសកំណើតរបស់លោកវិញហើយ។

លោក Oliviervanden Bogaert អាយុ៤១ឆ្នាំ ត្រូវបានចាប់ខ្លួនកាលពីខែមេសា ឆ្នាំ២០១៣ ប្រហែល១០សប្តាហ៍បន្ទាប់ពីសាកសព OphelieBegnis អាយុ២៥ឆ្នាំបានអណ្តែតមកទើនៅមាត់ស្ទឹងកំពត។

កាលពីយប់ថ្ងៃច័ន្ទ បើទោះជាមានការស៊ើបអង្កេតបន្តលើការធ្វើឃាត Ophelie Begnis ក៏ដោយ ក៏លោក vanden Bogaert បានលើកឡើងតាមអីុម៉េលថាលោកបានត្រឡប់ទៅប្រទេសបែលហ្ស៊ិកវិញហើយ។ ជនសង្ស័យនៅក្នុងរឿងក្តីមនុស្សឃាតនេះបានបដិសេធមិននិយាយថា តើលោកអាចចាកចេញពីប្រទេសនេះដោយវិធីណានោះឡើយ។

នគរបាលនិងមន្ត្រីតុលាការបានលើកឡើងកាលពីម្សិលមិញថា អាជ្ញាធរបានរក្សាទុកលិខិតឆ្លងដែនរបស់លោក vanden Bogaert ប៉ុន្តែគ្មាននរណាម្នាក់បញ្ជាក់ច្បាស់ថា អាជ្ញាធរមួយណារក្សាទុកលិខិតឆ្លងដែននោះទេ។

លោក ឃុន លាងម៉េង ចៅក្រមសាលាឧទ្ធរណ៍ ដែលកាលពីខែមេសាបានបង្គាប់ឲ្យដោះលែងលោក vanden Bogaert ដោយសារខ្វះភ័ស្តុតាងនោះបានមានប្រសាសន៍ថា សាលាដំបូងខេត្តកំពតទទួលខុសត្រូវក្នុងការរក្សាទុកលិខិតឆ្លងដែននេះ។

មុនដាក់ទូរស័ព្ទអ្នកយកព័ត៌មានចុះ លោកចៅក្រម លាងម៉េង បានមានប្រសាសន៍ថា “ចៅក្រមស៊ើបសួរបានដកហូត [លិខិតឆ្លងដែនរបស់លោក vanden Bogaert រួចហើយ]”។

លោក ហង្ស សុគន្ធវឌ្ឍនា ចៅក្រមស៊ើបសួរសាលាដំបូងខេត្តកំពត បានមានប្រសាសន៍ថា ព្រះរាជអាជ្ញាអមសាលាដំបូងខេត្តបានដកយកឯកសារធ្វើដំណើររបស់ជនសង្ស័យរូបនេះទុក។ លោកបានមានប្រសាសន៍ថា ” ព្រះរាជអាជ្ញាបានដកយកលិខិតឆ្លងដែនរួចហើយ”។ ប៉ុន្តែលោកបានបដិសេធមិននិយាយលម្អិតពីអ្វីដែលលោកលើកឡើងថា ជា”ការស៊ើបអង្កេតសម្ងាត់របស់តុលាការ”។

ទោះជាយ៉ាងណា លោក ឯក ឆេងហួត ព្រះរាជអាជ្ញាអមសាលាដំបូងខេត្តបានមានប្រសាសន៍ថា លោកមិនដឹងអំពីរឿងក្ដីលោក vanden Bogaert ទេ ហើយបានបង្វែរសំណួរទាំងអស់ទៅសាលាឧទ្ធរណ៍។

នគរបាលខេត្តកំពតបានលើកឡើងកាលពីសប្ដាហ៍មុនថា ពួកគេមិនមានភ័ស្តុតាងដាក់បន្ទុកលើលោក vanden Bogaert ទេ ហើយថា ពួកគេនៅតែស្វែងរកជនបរទេសសក់ក្រហមម្នាក់ដែលជាប់ពាក់ព័ន្ធក្នុងករណីនេះ ប៉ុន្តែបានបដិសេធមិននិយាយលម្អិតបន្ថែមឡើយ។

កាលពីខែមីនា នគរបាលបារំាងមួយក្រុម រួមទាំងអ្នកជំនាញផ្នែកកោសល្យវិច័យផងបានធ្វើដំណើរទៅខេត្តកំពត ដើម្បីប្រមូលសំណាកDNA បន្ទាប់ពីមានពាក្យបណ្ដឹងប្ដឹងទៅរដ្ឋាភិបាលបារាំងពីក្រុមគ្រួសារ Ophelie Begnis ។ មិនមានព័ត៌មានអំពីការធ្វើតេស្ត DNA ឬតម្រុយផ្សេងទៀតឡើយ។

លោក Nicolas Baudouin លេខាទី១នៅស្ថានទូតបារាំង បានមានប្រសាសន៍ថា ខណៈដែលរឿងក្ដីនេះនៅតែបើកចំហក្នុងប្រទេសបារាំងនោះ នគរបាលមូលដ្ឋាននៅតែជាអ្នកទទួលបន្ទុករឿងក្តីនេះ។ លោកបានមានប្រសាសន៍ថា ” ស្ថានទូតមិនទទួលបន្ទុករឿងក្ដីនេះទេ។ វាអាស្រ័យលើនគរបាលកម្ពុជា និងចៅក្រមស៊ើបសួរ ដែលត្រូវយកចិត្តទុកដាក់រឿងនេះ៕ សារុន

The post ជនសង្ស័យជនជាតិបែលហ្ស៊ិកពាក់ព័ន្ធករណីមនុស្សឃាតគេចខ្លួនចេញពីកម្ពុជា appeared first on ខេមបូឌា ដេលី.

កាលពីម្សិលមិញ សន្តិសុខខណ្ឌ ដែលជារឿយៗត្រូវបានគេប្រើឲ្យបំបែកបាតុកម្ម និងវាយដំអ្នកតវ៉ានោះ ពេលនេះត្រូវបានសាលារាជធានីប្រើឲ្យជួយសម្អាតទីក្រុងនៅពេលកម្មករប្រមូលសំរាមរាប់រយនាក់បន្តធ្វើកូដកម្មទាមទារដំឡើងប្រាក់ខែ និងលក្ខខណ្ឌការងារល្អប្រសើរ។

គំនរសំរាមគរយ៉ាងច្រើនជះក្លិនស្អុយអាក្រក់នៅខាងមុខផ្សារកាប់គោ ក្នុងរាជធានីភ្នំពេញកាលពីខែកុម្ភៈ នៅពេលកម្មករក្រុមហ៊ុនស៊ីនទ្រី បន្តធ្វើកូដកម្មទាមទារដំឡើងប្រាក់ខែ និងលក្ខខណ្ឌការងារល្អប្រសើ។ ស៊ីវ ចាន់ណា/ខេមបូឌា ដេលី

លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា រថយន្តក្រុមហ៊ុនស៊ីនទ្រី ៦០គ្រឿងបានវិលត្រឡប់ទៅប្រមូលសំរាមនៅតាមផ្លូវនានាវិញហើយកាលពីរសៀលម្សិលមិញ ប៉ុន្តែ សាលារាជធានីបានប្រមូលកម្លាំងបន្ថែមឲ្យជួយរក្សាសណ្តាប់ធ្នាប់ឲ្យបានល្អសម្រាប់ព្រះរាជពិធីដង្ហែព្រះបរមអដ្ឋិ របស់សម្តេចឪ នរោត្តម សីហនុ យកទៅតម្កល់នៅចុងសប្តាហ៍នេះ។ លោកបានមានប្រសាសន៍ថា ” យើងមានការព្រួយបារម្ភអំពីស្ថានភាពនេះ ពីព្រោះជិតដល់ព្រះរាជពិធីដង្ហែព្រះបរមអដិ្ឋរបស់ព្រះមហាក្សត្រយកទៅតម្កល់ហើយ។ យើងប្រើសន្តិសុខខណ្ឌនីមួយៗឲ្យជួយអ្នកបើកបរ”។

លោក ងួន ស៊ីផេង តំណាងក្រុមហ៊ុនសីុនទ្រី ជាក្រុមហ៊ុនប្រមូលសំរាមតែមួយគត់នៅក្នុងទីក្រុង បានប៉ាន់ប្រមាណថា អ្នកបើកបររបស់ក្រុមហ៊ុន៨០ភាគរយបានត្រឡប់ទៅធ្វើការវិញហើយកាលពីម្សិលមិញ បន្ទាប់ពីក្រុមហ៊ុនបានយល់ព្រមធ្វើតាមការទាមទារពីរចំណុចរបស់កម្មករ គឺទី១ យកសន្តិសុខខណ្ឌមកដាក់ជំនួសកងរាជអាវុធហត្ថដែលឈរជើងនៅដេប៉ូសាំងរបស់ក្រុមហ៊ុននេះ និងទី២ ដកប្រធានដេប៉ូសាំងដែលគេមិនចូលចិត្តនោះចេញ។

ទោះជាយ៉ាងណា លោក ស៊ីផេង បាននិយាយថា ក្រុមហ៊ុនមិនអាចធ្វើតាមការទាមទាររបស់កម្មករផ្សេងទៀតឲ្យក្រុមហ៊ុនចេញថ្លៃធានារ៉ាប់រង ថ្លៃឈ្នួលផ្ទះ និងថ្លៃធ្វើដំណើរដែលមានចំនួនសរុប៣៥ដុល្លារក្នុងមួយខែ បូករួមទាំងប្រាក់ឧបត្ថម្ភប្រចាំឆ្នាំនោះបានទេ។ លោកបាននិយាយថា ” ក្រុមហ៊ុនមិនអាចទទួលយកសំណើនេះពីកម្មករបានទេ។ យើងធ្វើតាមច្បាប់ការងារ ហើយសហជីពបានញុះញង់ឲ្យមានការតវ៉ានេះ”។

ប៉ុន្តែ កម្មករប្រមូលសំរាមឈ្មោះ វ៉ន រី អាយុ៣២ ឆ្នាំដែលស្ថិតនៅជាមួយកម្មករធ្វើកូដកម្មបានប្តេជ្ញាបន្តការទាមទាររបស់ពួកគេទៀត។ គាត់បាននិយាយថា ” ប្រាក់ខែរបស់យើងតិចជាង១០០ដុល្លារ ហើយយើងធ្វើការជាមួយសំរាម យើងប្រឈមនឹងបញ្ហាសុខភាព ព្រមទាំងគ្រោះថ្នាក់ចរាចរណ៍ ដូច្នេះយើងចង់ឲ្យពួកគេដោះស្រាយបញ្ហារបស់យើងជាមុនសិន”។

អ្នកស្រី អីុ មុត អាយុ៦៣ឆ្នាំ ជាអ្នកលក់គ្រឿងទេសនៅតាមផ្លូវតូចមួយចេញពីផ្លូវលេខ១៤៤ដែលមានគំនរសំរាមដ៏ធំនៅបាំងផ្លូវនោះ បានអំពាវនាវឲ្យសាលារាជធានី និងក្រុមហ៊ុនស៊ីនទ្រីប្រមូលសំរាមទាំងនេះចេញ។ អ្នកស្រីបាននិយាយថា ” សព្វថ្ងៃេនះទីក្រុងនេះ ដូចជាទីក្រុងសំរាមអ៊ីចឹង៕គឹមហឿន

The post សាលារាជធានីប្រើសន្តិសុខខណ្ឌឲ្យជួយប្រមូលសំរាមនៅក្នុងទីក្រុងភ្នំពេញ appeared first on ខេមបូឌា ដេលី.

នគរបាលខេត្តសៀមរាប ដែលចូលរួមពាក់ព័ន្ធក្នុងប្រតិបត្តិការចាប់ខ្លួននាយកសាលាម្នាក់កាលពីថ្ងៃច័ន្ទ បាននិយាយកាលពីម្សិលមិញថា ពួកគេនឹងបញ្ជូនបុរសជានាយកសាលានេះទៅតុលាការនៅថ្ងៃនេះ ដោយស្នើសុំឲ្យតុលាការចោទប្រកាន់បុរសរូបនេះពីបទជួញដូរផ្លូវភេទ។

នាយកសាលាដែលមានឈ្មោះថា ឡុង វេហា អាយុ៣២ឆ្នាំ ត្រូវបានចាប់ខ្លួននៅក្នុងក្រុងសៀមរាប បន្ទាប់ពីការសើុបអង្កេតរយៈពេលរាប់ខែ ដោយមានការចូលរួមពីទីភ្នាក់ងារជាច្រើន លើការចោទប្រកាន់ពីសំណាក់អតីតបុគ្គលិកស្ម័គ្រចិត្តម្នាក់នៅសាលា Underprivileged ChildrenSchool ដែលបានចោទប្រកាន់ថា សិស្សត្រូវបានធ្វើសញ្ចរកម្មឲ្យរួមភេទជាមួយភ្ញៀវបរទេសដែលបរិច្ចាគដល់សាលារៀននេះ។

លោកស្រី ដួង ថាវរី នាយការិយាល័យនគរបាលប្រឆាំងការជួញដូរមនុស្ស និងការពារអនីតិជនខេត្តសៀមរាបបានមានប្រសាសន៍ថា មន្ត្រីមានសមត្ថកិច្ចបាននាំខ្លួន ឡុង វេហា ទៅកាន់ផ្ទះជួលរបស់គាត់នៅក្នុងក្រុងសៀមរាប កន្លែងដែលគាត់ស្នាក់នៅជាមួយកូនសិស្សវ័យជំទង់ប្រាំបួននាក់នៅពេលគាត់ត្រូវបានចាប់ខ្លួន ដើម្បីប្រមូលភ័ស្តុតាងបន្ថែមទៀត មុនពេលបញ្ជូនគាត់ទៅតុលាការ។

លោកស្រីមានប្រសាសន៍ទៀតថា “នៅក្នុងកំណត់ហេតុរបស់យើង យើងបានចោទប្រកាន់គាត់ពីបទ [ លក់ ] ពេស្យាចារកុមារ។ ជនសង្ស័យមិនបានសារភាពទទួលស្គាល់ទោសកំហុសរបស់ខ្លួនទេ ប៉ុន្តែ យើងមានភ័ស្តុតាងគ្រប់គ្រាន់បញ្ជាក់ថា គាត់ពិតជាបានប្រព្រឹត្តបទល្មើសនេះមែន” ដោយរួមទាំងភ័ស្តុតាង ” តាមអីុនធើណិត” ដែលបង្ហាញថា ឡុង វេហា បានរៀបចំឲ្យភ្ញៀវទេសចររួមភេទជាមួយកូនសិស្សរបស់ខ្លួនផងដែរ។

លោកស្រីថ្លែងថា រហូតមកទល់ពេលនេះ នគរបាលដឹងថា ជនរងគ្រោះមានពីរនាក់ គឺក្មេងប្រុសជំទង់វ័យ១៧ឆ្នាំ ដូចគ្នាដែលស្ថិតក្នុងចំណោមក្មេងជំទង់ទាំងប្រាំបួននាក់ ដែលរកឃើញនៅផ្ទះជួលរបស់លោក ឡុង វេហា កាលពីថ្ងៃច័ន្ទ។

លោកស្រីមានប្រសាសន៍ថា នគរបាលបានដោះលែងប្អូនស្រីរបស់ ឡុង វេហា ដែលជាគ្រូបង្រៀនម្នាក់នៅសាលានេះ បន្ទាប់ពីសន្និដ្ឋានថា ប្អូនស្រីរូបនេះមិនដឹងពីបទល្មើសនេះ ប៉ុន្តែ នគរបាលកំពុងបន្តសើុបអង្កេតតាមហ្វេសប៊ុករកជនបរទេសដែលជាប់សង្ស័យពីបទរំលោភបំពានសិស្សទាំងនេះ។ លោកស្រីបានលើកឡើងបន្តទៀតថា ” យើងនឹងតាមស្វែងរកជនបរទេសទាំងនោះ ប៉ុន្តែ ខ្ញុំមិនអាចនិយាយអ្វីបានទេ ពីព្រោះនេះជារឿងសម្ងាត់របស់នគរបាល”។

សិស្សទាំងប្រាំបួននាក់ រួមទាំងជនរងគ្រោះពីរនាក់ផង ត្រូវបានឃាត់ខ្លួននៅមន្ទីរសង្គមកិច្ចខេត្តសៀមរាប ដើម្បីធ្វើការសាកសួរបន្ថែម។

លោកស្រី ឆេង វណ្ណា អនុប្រធានមន្ទីរសង្គមកិច្ចបានមានប្រសាសន៍ថា សាលារៀនរបស់ ឡុង វេហា បានបិទទ្វារកាលពីម្សិលមិញ ខណៈពេលលោកស្រីចុះទៅសាកសួរកូនសិស្ស ប៉ុន្តែ លោកស្រីមិនបានដឹងថា សាលារៀននេះនឹងត្រូវបិទទ្វាររហូត ឬយ៉ាងណានោះទេ។

លោកស្រីបានមានប្រសាសន៍ទៀតថា ” យើងមិនប្រាកដថា តើសាលារៀននេះនឹងត្រូវបិទ ឬយ៉ាងណាទេ។ យើងនឹងពិភាក្សាពីបញ្ហានេះជាមួយមន្ទីរអប់រំខេត្ត ពីព្រោះមានកូនសិស្សជាច្រើននៅតែមករៀននៅសាលានេះ ដោយសារតែពួកគេក្រីក្រ”។

គេហទំព័ររបស់សាលានេះសរសេរថា សាលារៀននេះបានបើកដំណើរការចាប់តាំងពីឆ្នាំ២០០៨មកម្លេ៉ះ ដោយផ្តល់ ” កម្មវិធីសិក្សាពិសេសសម្រាប់កុមារក្រីក្រកម្ពុជា ដែលងាយរងគ្រោះបំផុត”។ សាលារៀននេះស្នើសុំជំនួយបរិច្ចាគ និងជំរុញឲ្យមានអ្នកធ្វើការស្ម័គ្រចិត្ត។

ស្ត្រីម្នាក់ដែលបានលើកទូរស័ព្ទរបស់សាលានេះអះអាងថា ខ្លួនគ្មានអ្វីពាក់ព័ន្ធនឹងសាលានេះទេ ហើយក៏មិនដឹងរឿងសាលានេះដែរ។

សេចក្តីថ្លែងការណ៍មួយរបស់អង្គភាពគាំពារកុមារ ដែលមានការសហការគ្នារវាងនគរបាលជាតិ និងមូលនិធិកុមារកម្ពុជា លើកឡើងថា ការឆ្មក់បង្ក្រាបពាក់ព័ន្ធនឹងករណីនេះក៏ត្រូវបានធ្វើឡើងដែរកាលពីម្សិលមិញ ហើយថា ទីភ្នាក់ងារដែលពាក់ព័ន្ធ ” កំពុងធ្វើទំនាក់ទំនងគ្នាជាមួយបណ្តាទីភ្នាក់ងារធ្វើគោលនយោបាយអន្តរជាតិ”។

លោក ជេម ម៉ាកឃេប (James McCabe) នាយកប្រតិបត្តិការរបស់អង្គភាពនេះបានបដិសេធមិនធ្វើអត្ថាធិប្បាយលម្អិតលើអ្វីដែលលោកមានប្រសាសន៍ថា ជាការសើុបអង្កេតដែលកំពុងដំណើរការនោះទេ៕សុខុម

The post នគរបាលត្រៀមបញ្ជូននាយកសាលាជាប់ចោទពីបទធ្វើសញ្ចរកម្មលើសិស្សខ្លួនឯងទៅតុលាការ appeared first on ខេមបូឌា ដេលី.

ការអះអាងក្នុងរយៈពេលប្រាំមួយខែមកនេះ ដែលលើកឡើងថា វិស័យកាត់ដេរកំពុងតែជួបបញ្ហាជាច្រើនក្រោយពីមានការតវ៉ានៅទូទាំងប្រទេស ដែលត្រូវបានបង្ក្រាបដោយហិង្សាកាលពីខែមករា ហាក់ដូចជាផ្ទុយគ្នាទៅនឹងតួលេខថ្មីរបស់ក្រសួងឧស្សាហកម្ម និងសិប្បកម្មដែលបង្ហាញពីកំណើនរឹងមាំនៅឆ្នាំនេះនៅក្នុងឧស្សាហកម្មកាត់ដេរ ដែលរកចំណូលបានប្រមាណ៥ពាន់លានដុល្លារក្នុងមួយឆ្នាំ។

តួលេខនេះបង្ហាញពីការកើនឡើង៨ភាគរយនូវចំនួនរោងចក្រកាត់ដេរដែលបានចុះបញ្ជីក្នុងរយៈពេលប្រាំមួយខែនៅដើមឆ្នាំនេះ បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៣ ដែលធ្វើឲ្យចំនួនរោងចក្រកាត់ដេរនៅក្នុងប្រទេសកម្ពុជាកើនឡើងរហូតដល់១.២០០រោងចក្រ នេះបើយោងតាមការឲ្យដឹងពីលោក ហួត ផេង ប្រធាននាយកដ្ឋានចុះបញ្ជីនៃក្រសួងឧស្សាហកម្ម និងសិប្បកម្ម។ លោក ហួត ផេង បានមានប្រសាសន៍ថា បច្ចុប្បន្ននេះកម្មករកាត់ដេរមានចំនួន៧៣៣.៣០០នាក់ ពោលគឺកើនឡើងពីចំនួន៦៧៧.៦០០នាក់កាលពីឆ្នាំមុន។

លោកមានប្រសាសន៍ថា ” រដ្ឋាភិបាលកំពុងតែបង្ហាញពីជោគជ័យធំធេងនៅក្នុងការងាររបស់ខ្លួន”។ លោកបានលើកឡើងទៀតថា ចំនួនរោងចក្រនៅតាមបណ្តាខេត្តក៏កំពុងតែកើនឡើងជាលំដាប់ដែរ ដោយសារតែគោលនយោបាយរបស់រដ្ឋាភិបាល ដែលជំរុញឲ្យមានការវិនិយោគនៅខាងក្រៅតំបន់កណ្តាលក្រុង និងការវិនិយោគលើផលិតកម្មប្រើបច្ចេកវិទ្យាទំនើប។

លោកបានមានប្រសាសន៍ទៀតថា ពីមុនកម្មករសម្រុកទៅរកការធ្វើនៅតាមរោងចក្រនៅក្នុងក្រុង ប៉ុន្តែ ពេលនេះយើងឃើញរោងចក្រថ្មីៗបើកដំណើរការរៀងរាល់ថ្ងៃនៅតាមតំបន់ជនបទក្នុងបណ្តាខេត្ត”។

ប៉ុន្តែ លោក កែន លូ អគ្គលេខាធិការសមាគមរោងចក្រកាត់ដេរនៅកម្ពុជា (GMAC) បានព្រមានចំពោះការបកស្រាយអំពីការកើនឡើងចំនួនចុះបញ្ជីរោងចក្រថ្មីៗ អំឡុងពេលនេះ ថាជាសញ្ញាបង្ហាញថា ឧស្សាហកម្មកាត់ដេរបានចៀសផុតពីស្ថានភាពធ្ងន់ធ្ងរបង្កឡើងដោយកូដកម្មកាលពីខែមករា។ លោកមានប្រសាសន៍ថា “មានការងារជាច្រើនដែលចាំបាច់ត្រូវធ្វើ មុនពេលដំណើរការចុះបញ្ជីរោងចក្រថ្មីៗ ដែលមានន័យថា ពួកគេស្ថិតក្នុងដំណាក់កាលធ្វើផែនការ មុនពេលផ្ទុះកូដកម្ម”។ លោកបានបន្តថា បណ្តាវិនិយោគិនផ្លាស់ប្តូរទីតាំងទៅតាមខេត្ត គឺដើម្បីចៀសវាងថ្លៃជួលខ្ពស់នៅក្នុងតំបន់ឧស្សាហកម្មក្នុងក្រុង។

លោកមានប្រសាសន៍ថា ផលប៉ះពាល់ពិតប្រាកដនៃចលាចលក្នុងឧស្សាហកម្មកាត់ដេរ នឹងចាប់ផ្តើមបង្ហាញឲ្យឃើញនៅប៉ុន្មានខែខាងមុខនេះ នៅពេលការបញ្ជាទិញដែលត្រូវបានបញ្ជាក់មុនពេលស្ថានភាពចលាចលបានចាប់ផ្តើមកាលពីខែវិច្ឆិកា ចាប់ផ្តើមអស់ ហើយស្ថានភាពនេះនឹងត្រូវលាតត្រដាង។

លោកមានប្រសាសន៍ទៀតថា ” ជាការពិតណាស់យើងដឹងហើយថា ការបញ្ជាទិញកំពុងធ្លាក់ចុះ។ នោះជាមូលហេតុដែលរយៈពេលបីទៅប្រាំមួយខែក្រោយ មានសារៈសំខាន់ខ្លាំង ដោយសារការបញ្ជាទិញជាច្រើនត្រូវបានដកចេញវិញជាបណ្តោះអាសន្ន ហើយត្រង់ថា ពួកគេត្រឡប់មកវិញឬអត់នឹងបង្ហាញថា តើមានទីផ្សារសម្រាប់ក្រុមហ៊ុនថ្មីៗឬយ៉ាងណា”។

ខណៈពេលដែលទស្សនវិស័យនេះ នៅតែមានភាពមិនប្រាកដប្រជា លោក កែន លូ បានមានប្រសាសន៍ថា ការទប់ស្កាត់កូដកម្មខុសច្បាប់ដែលបានកើតឡើងច្រើនជាងគេបំផុតនៅឆ្នាំមុន គួរតែជាបញ្ហាអាទិភាពរបស់រដ្ឋាភិបាលក្នុងការទាក់ទាញឲ្យវិនិយោគិនមានការជឿទុកចិត្តវិញ។ លោកមានប្រសាសន៍ទៀតថា ” ប្រសិនបើ យើងបានត្រៀមខ្លួនឲ្យបានល្អ អ្នកទិញនឹងត្រឡប់មកវិញ។

លោក មឿន តុលា ប្រធានកម្មវិធីការងារនៅមជ្ឈមណ្ឌលអប់រំច្បាប់សម្រាប់សហគមន៍បានយល់ស្របថា តួលេខថ្មីនេះមិនបង្ហាញថា ឧស្សាហកម្មកាត់ដេរកំពុងស្ថិតក្នុងស្ថានភាពល្អនោះទេ ប៉ុន្តែ បានមានប្រសាសន៍ថា កូដកម្មគឺជារោគសញ្ញានៃប្ញសគល់នាំឲ្យមានអស្ថិរភាព។ លោកមានប្រសាសន៍ថា ” យើងមើលមិនឃើញថា ឧស្សាហកម្មកាត់ដេរកំពុងស្ថិតក្នុងស្ថានភាពល្អនោះទេ ប៉ុន្តែ GMAC មិនគួរទម្លាក់កំហុសលើកូដកម្មពាក់ព័ន្ធនឹងប្រាក់ខែគោលដ៏ទាប និងលក្ខខណ្ឌការងារអន់នោះទេ”។

ការស្រាវជ្រាវផ្ទាល់របស់រដ្ឋាភិបាលបានបង្ហាញថា ប្រាក់ខែគោលនាពេលបច្ចុប្បន្ន១០០ដុល្លារ គឺតិចជាងប្រាក់ខែអាចរស់បានយ៉ាងហោចណាស់៦០ដុល្លារ ប៉ុន្តែ និយោជកលើកឡើងថា នៅពេលបូកបន្ថែមអត្ថប្រយោជន៍នានា និងប្រាក់បន្ថែមម៉ោងចូលគ្នា កម្មករនឹងទទួលបានប្រាក់ខែលើសពីអ្វីដែលច្បាប់បានកំណត់។

ទោះជាយ៉ាងណា ក្រុមហ៊ុនសម្លៀកបំពាក់លំដាប់ពិភពលោកមួយចំនួន ដែលបញ្ជាទិញសម្លៀកបំពាក់ពីកម្ពុជា និយាយថា ពួកគេនឹងឧបត្ថម្ភគាំទ្រដល់ការដំឡើងប្រាក់ខែកម្មករ ហើយបានអំពាវនាវឲ្យភាគីពាក់ព័ន្ធបង្កើតយន្តការកំណត់ប្រាក់ខែគោលថ្មីឲ្យបានឆាប់រហ័ស។ “[ក្រុមហ៊ុនសម្លៀកបំពាក់] មិនគាំទ្រប្រាក់ខែគោលនេះទេ ពីព្រោះពួកគេយល់ថា វាជាប្ញសគល់បង្កឲ្យមាន [ចលាចល] ហើយថា ដរាបណា គ្មានការដោះស្រាយទេនោះ ទំនាក់ទំនងវិជ្ជាជីវៈទំនងជានឹងមិនប្រសើរឡើយ”៕

The post របាយការណ៍របស់ក្រសួងឧស្សាហកម្ម និងសិប្បកម្មបង្ហាញថា ចំនួនរោងចក្រកាត់ដេរកើនឡើង appeared first on ខេមបូឌា ដេលី.

បន្ទាប់ពីការចាកចេញដ៏គំហុកនៃពលករចំណាកស្រុកខ្មែរពីប្រទេសថៃកាលពីខែមុន អង្គការទស្សនៈពិភពលោក (World Vision) បានឲ្យដឹងថា ចំនួនកុមារដ៏ច្រើនបានវង្វេង និងបានបែកពីឪពុកម្ដាយរបស់ពួកគេនៅព្រំដែន។

ក្នុងសេចក្ដីថ្លែងការណ៍មួយចេញកាលពីម្សិលមិញ អង្គការនេះក៏បានឲ្យដឹងដែរថា ជាថ្មីម្ដងទៀត កុមារជាច្រើនបានត្រឡប់ចូលប្រទេសថៃដោយខុសច្បាប់ជាមួយគ្រួសាររបស់ខ្លួន ដោយធ្វើឲ្យពួកគេងាយរងគ្រោះ និងគ្មានឯកសារ។

លោក ចាសុន អុីវ៉ាន នាយកអង្គការទស្សនៈពិភពលោកប្រចាំកម្ពុជា បានមានប្រសាសន៍ថា “បុគ្គលិករបស់យើងដែលធ្វើការនៅបណ្ដោយព្រំដែន បានរាយការណ៍អំពីជនចំណាកស្រុកជាច្រើនក្រុមដែលធ្វើដំណើរត្រឡប់ចូលប្រទេសថៃវិញ ដោយមិនរង់ចាំការធ្វើឯកសារស្របច្បាប់ ព្រោះគិតថា ដំណើរការធ្វើឯកសារនឹងប្រើពេលយូរ”។

លោក អុីវ៉ាន បានឲ្យដឹងក្នុងសេចក្ដីថ្លែងការណ៍នោះថា “ក៏ប៉ុន្តែកង្វល់ជាចម្បងរបស់យើង គឺចំពោះកុមារដែលទៅជាមួយ ពួកគេត្រូវប្រឈមនឹងហានិភ័យកាន់តែខ្លាំង ព្រោះត្រូវនាំចូលប្រទេសមួយផ្សេងដោយគ្មានឯកសារ និងគ្មានការការពារ”។ លោកបានមានប្រសាសន៍ថា ជាធម្មតាក្មេងទទួលបានផលប្រយោជន៍ជាច្រើនពីការស្នាក់នៅជាមួយក្រុមគ្រួសារសាច់ញាតិក្នុងប្រទេសកម្ពុជា ជាទីដែលពួកគេមានសុវត្ថិភាពជាង និងបានទៅរៀនសូត្រ។

សេចក្ដីថ្លែងការណ៍ដដែលឲ្យដឹងទៀតថា ” ចេញពីបទពិសោធន៍របស់យើងនៃការឆ្លើយតបទៅនឹងការចាកចេញពលករដ៏គំហុកនៅច្រកព្រំដែនប៉ោយបែ៉តកាលពីខែមុន យើងបានជួបប្រទះករណីជាច្រើននៃក្មេងវង្វេងឪពុកម្ដាយ គឺក្មេងដែលរកឪពុកម្ដាយរបស់វាមិនឃើញ ខណៈដែលពួកគេចេញពីប្រទេសថៃ។ ប្រសិនបើឪពុកម្ដាយបន្តធ្វើចំណាកស្រុកជាធម្មតានោះ ក្មេងៗនឹងបន្តបែកចេញពីឪពុកម្ដាយរបស់ពួកគេ”។

លោក ស៊ុន សំអាត នាយនគរបាលអន្តោប្រវេសន៍ក្រុងបោ៉យប៉ែត បានមានប្រសាសន៍ថា ក្មេង២៤នាក់ស្ថិតក្នុងចំណោមក្មេងខ្មែរ៤២០នាក់ត្រូវបានប្រមូលនៅប្រទេសថៃ ហើយត្រូវបានបញ្ជូនមកព្រំដែនកាលពីម្សិលមិញ។ លោកបានឲ្យដឹងទៀតថា “ខ្ញុំមិនដឹងថា ច្រកព្រំដែនណាដែលពួកគេបានប្រើដើម្បីចូលទៅទេ ប៉ុន្តែពួកគេត្រូវបានបញ្ជូនមកវិញតាមច្រករបស់ខ្ញុំ។ ពួកគេបានចាញ់បោកមេខ្យល់”។

ខណៈដែលលោក សំអាត បានឲ្យដឹងថា ពលរដ្ឋខ្មែររាប់ពាន់នាក់កំពុងធ្វើដំណើរចូលប្រទេសថៃវិញរាល់ថ្ងៃនោះ មានចំនួនតិចតួចប៉ុណ្ណោះជាកុមារ។ លោកបានមានប្រសាសន៍ថា ” ក្មេងពីរទៅបីនាក់មានលិខិតឆ្លងដែន ក៏ឆ្លងព្រំដែនរាល់ថ្ងៃដែរ”៕ មានិត

The post មានការព្រួយបារម្ភអំពីកុមារ ពេលជនចំណាកស្រុកត្រឡប់ទៅប្រទេសថៃវិញ appeared first on ខេមបូឌា ដេលី.

លោក ជ្រាង សុផាន់ អភិបាលរងរាជធានីភ្នំពេញ ជាម្ចាស់សណ្ឋាគារកន្លែងដែលលោក ហម មុត មេបញ្ជាការកងរាជអាវុធហត្ថក្រុងប៉ោយប៉ែត បានស្លាប់បន្ទាប់ពីធ្លាក់តាមប្រឡោះជណ្ដើរយន្តដែលមិនទាន់សាងសង់រួចនោះ កាលពីម្សិលមិញត្រូវបានកងរាជអាវុធហត្ថរាជធានីចោទប្រកាន់ពីបទមនុស្សឃាតដោយអចេតនា ហើយបានបញ្ជូនសំណុំរឿងនេះទៅសាលាដំបូងរាជធានី។

លោក ហម មុត អាយុ៣៩ឆ្នាំបានធ្លាក់ពីលើជាន់ទី៤ស្លាប់ បន្ទាប់ពីត្រឡប់មកពីដើរកម្សាន្តពេលយប់នៅប្រហែលម៉ោង៣រំលងអធ្រាត្រ ទៅដល់សណ្ឋាគារ MidlandHotel ស្ថិតក្នុងសង្កាត់បឹងកក់១ ខណ្ឌទួលគោក។ លោកត្រូវបានប្រទះឃើញស្លាប់នៅបាតប្រឡោះជណ្ដើរយន្ត បន្ទាប់ពីក្រុមគ្រួសាររបស់លោកដឹងថា លោកបានបាត់ពីបន្ទប់។

លោកវរសេនីយ៍ឯក ប៉ុល ដាវី មេបញ្ជាការរងកងរាជអាវុធហត្ថរាជធានីភ្នំពេញ បានមានប្រសាសន៍ថា ការស៊ើបអង្កេតលើការស្លាប់នេះបានចប់ហើយកាលពីម្សិលមិញ ហើយថា សំណុំរឿងនេះត្រូវបានបញ្ជូនទៅសាលាដំបូងរាជធានីភ្នំពេញ ចោទម្ចាស់សណ្ឋាគារពីបទមនុស្សឃាតដោយអចេតនាតាមមាត្រា២០៧នៃក្រមព្រហ្មទណ្ឌ។

លោក ប៉ុល ដាវី បានមានប្រសាសន៍ថា “ម្ចាស់សណ្ឋាគារ គឺលោក ជ្រាង សុផាន់ អភិបាលរងរាជធានីភ្នំពេញ”។ លោកបានពន្យល់ប្រាប់ថា កងរាជអាវុធហត្ថជឿថា ការស្លាប់នេះបណ្ដាលមកពីបុគ្គលិកសណ្ឋាគារមិនបានដាក់រនាំងបាំងប្រឡោះជណ្ដើរយន្តដែលមិនទាន់សាងសង់រួចនេះ។ លោកបានមានប្រសាសន៍ថា “វាមិនមែនជាករណីមនុស្សឃាតទេ”។

លោកវរសេនីយ៍ឯក ប៉ុល ដាវី បានបន្ថែមថា ឥឡូវនេះ លោក សុផាន់ កំពុងដោះស្រាយរឿងនេះជាមួយក្រុមគ្រួសារជនរងគ្រោះ ប៉ុន្តែ ទោះជាយ៉ាងណា សំណុំរឿងដែលកងរាជអាវុធហត្ថបានធ្វើត្រូវបានបញ្ជូនទៅសាលាដំបូងរាជធានីភ្នំពេញហើយ។

នៅពេលទាក់ទងតាមទូរស័ព្ទ លោក ជ្រាង សុផាន់ ដែលជាអភិបាលរងរាជធានីទទួលបន្ទុករៀបចំដែនដី នគរូបនីយកម្ម និងសំណង់ បានបដិសេធមិនធ្វើអត្ថាធិប្បាយអំពីការចោទប្រកាន់ពីបទមនុស្សឃាតដោយអចេតនានេះទេ។

លោកបានមានប្រសាសន៍ថា ” លោកមិនមែនជាអាជ្ញាធរដែលគេចាត់តាំងឲ្យមកសួរខ្ញុំបែបនេះទេ។ តើមន្ត្រីកងរាជអាវុធហត្ថរូបណានិយាយបែបនេះ?។ សូមឲ្យគាត់ទូរស័ព្ទមកខ្ញុំ”។ លោក ជ្រាង សុផាន់ បានបន្តថា “ ការចោទប្រកាន់បែបនេះគ្រាន់តែជាបញ្ហាដែលកាសែត ខេមបូឌា ដេលី បានលើកឡើងតែប៉ុណ្ណោះ។លោកមិនអាចទូរស័ព្ទមកសួរចម្លើយខ្ញុំបានទេ”។

តាមមាត្រា២០៧នៃក្រមព្រហ្មទណ្ឌ អំពើមនុស្សឃាតដោយអចេតនាត្រូវមានទោសជាប់ពន្ធនាគារពី១ឆ្នាំដល់៣ឆ្នាំ។បទមនុស្សឃាតដោយអចេតនាគឺជាអំពើបណ្តាលឲ្យស្លាប់អ្នកដទៃដោយៈ ការធ្វេសប្រហែស ការមិនប្រុងប្រយ័ត្ន ឬការខ្ជីខ្ជា” ឬតាមរយៈ ” ការបំពានលើកាតព្វកិច្ចសន្តិសុខ ឬកាតព្វកិច្ចប្រុងប្រយ័ត្នដែលច្បាប់តម្រូវ”។

លោក ហម មុត ត្រូវបានគេប្រទះឃើញស្លាប់នៅសណ្ឋាគារ Midland បន្ទាប់ពីម៉ោង៥ទៀបភ្លឺថ្ងៃអង្គារ ដោយស្លៀកតែខោទ្រនាប់ពណ៌ខ្មៅប៉ុណ្ណោះ។ រូបភាពវីដេអូតាមរយៈកាមេរ៉ាសុវត្ថិភាព ដែលបង្ហោះនៅក្នុងគេហទំព័រព័ត៌មានដើមអម្ពិលនៅល្ងាចថ្ងៃដដែលនោះបានបង្ហាញថា គាត់បានដើរចេញពីបន្ទប់របស់គាត់ដោយស្លៀកតែខោទ្រនាប់ ហើយបន្ទាប់មកបានដើរតាមច្រកផ្លូវដើរនៅសណ្ឋាគារនេះ។

រូបភាពវីដេអូនេះមិនបានបង្ហាញពេលគាត់ធ្លាក់ចូលក្នុងប្រឡោះជណ្ដើរយន្តដែលមិនទាន់សាងសង់រួចនោះទេ ហើយម៉ោងនៅក្នុងកាមេរ៉ាសុវត្ថិភាពនោះ គឺម៉ោង៨និង៤៩នាទីព្រឹកថ្ងៃសៅរ៍ ប៉ុន្តែបុគ្គលិកសណ្ឋាគារបាននិយាយថា រូបភាពវីដេអូរបស់លោក ហម មុត គឺកើតឡើងកាលពីព្រឹកថ្ងៃអង្គារ គឺមុនពេលគាត់ស្លាប់បន្តិច។

បុរសម្នាក់ដែលលើកទូរស័ព្ទលោក ហម មុត កាលពីម្សិលមិញ បាននិយាយថា ពិធីបុណ្យសពលោកមេបញ្ជាការបានធ្វើឡើងនៅផ្ទះរបស់លោកស្ថិតក្នុងក្រុងប៉ោយប៉ែត ហើយថា សាកសពរបស់លោកនឹងត្រូវបូជានៅថ្ងៃអាទិត្យ។

បុរសរូបនេះដែលអះអាងថា ជាសហការីរបស់លោក ហម មុត ប៉ុន្តែបានប្រាប់តែឈ្មោះហៅក្រៅថា ត្រដោក នោះ បាននិយាយពីពិធីបុណ្យសពថា លោក ហម មុត តែងតែមកស្នាក់នៅសណ្ឋាគារ Midland នៅពេលលោកធ្វើដំណើរមករាជធានីភ្នំពេញ៕គឹមហឿន

(រាយការណ៍បន្ថែមដោយ ផាន់ អាណា)

The post មន្ត្រីកងរាជអាវុធហត្ថចោទប្រកាន់អភិបាលរងរាជធានីពីបទមនុស្សឃាតដោយអចេតនា appeared first on ខេមបូឌា ដេលី.

នគរបាល និងអ្នកភូមិបាននិយាយថា បុរសជនជាតិអាមេរិកអាយុ៤៤ឆ្នាំម្នាក់ ត្រូវបានគេប្រទះឃើញស្លាប់ដោយសារគេរឹតកនៅជាយក្រុងភ្នំពេញកាលពីព្រឹកព្រលឹមថ្ងៃពុធ។ សាកសពមានស្នាមជាំរបស់គាត់ត្រូវបានគេរុំនៅក្នុងក្រណាត់វាំងនន ហើយបានយកទៅប្លុងចោលនៅផ្លូវដីមួយខ្សែនៅខណ្ឌព្រែកព្នៅ។

លោក យឹម សារ៉ន អធិការនគរបាលខណ្ឌពោធិ៍សែនជ័យ ដែលទទួលបន្ទុកត្រួតពិនិត្យកន្លែងឧក្រិដ្ឋកម្ម បានមានប្រសាសន៍ថា សាកសពនេះត្រូវបានប្រទះឃើញនៅម៉ោងប្រហែល៥និង៤៥នាទីព្រឹកនៅក្នុងសង្កាត់គោករកា ដោយក្មេងប្រុសអាយុ១២ឆ្នាំម្នាក់ ដែលបានយកសំរាមទៅបោះចោលនៅកន្លែងចាក់សំរាមនោះ។

នគរបាលបានបញ្ជាក់ថា ជនរងគ្រោះរូបនេះឈ្មោះ វីលៀម ប្រ៊ីយ៉ាន ហ្គ្លិន មកពីរដ្ឋមីស៊ីស៊ីពី ហើយបានឲ្យដឹងថា ពួកគេបានរកឃើញកាបូបលុយមួយ ដែលមានប័ណ្ណឥណទាន និងក្រដាសថតចម្លងលិខិតឆ្លងដែនរបស់គាត់មួយសន្លឹកនៅក្នុងហោប៉ៅខោខ្លីរបស់គាត់។

លោក សារ៉ន បានមានប្រសាសន៍ថា “នគរបាលរបស់យើងបានចុះទៅកន្លែងកើតហេតុ បន្ទាប់ពីក្មេងប្រុសនោះបានប្រាប់គ្រួសាររបស់វានៅក្នុងភូមិនោះ។ មានស្នាមជំានៅលើដងខ្លួនបុរសនេះ និងមានឈាមចេញតាមច្រមុះ ដូច្នេះនេះគឺជាឃាតកម្ម មិនមែនជាអំពើអត្តឃាតទេ”។

លោក ណង សុវណ្ណរ័ត្ន វេជ្ជបណ្ឌិតដែលពិនិត្យសាកសពនេះបានបញ្ជាក់ថា ស្នាមជាំនៅជុំវិញកនេះបញ្ជាក់ថា ជនរងគ្រោះស្លាប់ដោយសារការរឹតក។ លោកបានមានប្រសាសន៍ថា ” ជនរងគ្រោះអាចស្លាប់នៅកន្លែងណាមួយរយៈពេល២៤ម៉ោងមុនគេប្រទះឃើញសាកសពគាត់។

លោក សួន សំអឿន នាយប៉ុស្តិ៍នគរបាលគោករកា បានមានប្រសាសន៍ថា អ្នកភូមិម្នាក់បានរាយការណ៍ថា បានឃើញរ៉ឺម៉កម៉ូតូកង់បីមួយគ្រឿង ដែលមានម៉ូតូបើកតាមក្រោយមួួយគ្រឿងតាមផ្លូវដីនេះនៅក្បែរវិទ្យាល័យ ជា ស៊ីម ឈូកវ៉ា នៅម៉ោងប្រហែល៣ទៀបភ្លឺ ហើយបានឈប់មួយភ្លែតនៅកន្លែងចាក់សំរាមនោះ។ លោកបានមានប្រសាសន៍ថា ” ជនរងគ្រោះទំនងជាត្រូវបានគេយកពីកន្លែងណាមួយទៅប្លុងចោលនៅទីនេះ”។

ជនជាតិអាមេរិករូបនេះ បានធ្វើដំណើរពីទីក្រុងបាងកកមកប្រទេសកម្ពុជាកាលពីខែមុន ហើយបានដាក់ប្រវត្តិរូបរបស់គាត់នៅតាមគេហទំព័រជនបរទេសនៅកម្ពុជា ដើម្បីស្វែងរកការងារជាគ្រូបង្រៀននៅក្នុងទីក្រុងភ្នំពេញ។ គាត់បានសរសេរដាក់តាមប្លក់កាលពីថ្ងៃទី៤ ខែឧសភាថា ” ខ្ញុំទើបតែមកដល់កាលពីពីរថ្ងៃមុន មិនសូវដឹងព័ត៌មានច្រើនទេ ពីព្រោះខ្ញុំមិនដែលជួបនរណាម្នាក់ដែលបង្រៀននៅទីនេះឡើយ”។

គាត់បានចាប់ផ្ដើមបង្រៀនភាសាអង់គ្លេសនៅសាលាហ្គោលដិនហ្គេត សាខាទូលគោក កាលពីខែមិថុនា ប៉ុន្តែបើតាមគណនេយ្យករឈ្មោះ គន្ធី នៅសាលានេះបានឲ្យដឹងថា គាត់បានឈប់ទៅវិញបន្ទាប់ពីបង្រៀនបានមួយខែ ក្រោយពីវគ្គសិក្សានោះបានបញ្ចប់។

គណនេយ្យកររូបនេះនិយាយថា ” គាត់ឈប់ធ្វើការនៅចុងខែ ព្រោះវាជាចុងបញ្ចប់នៃឆ្នាំសិក្សា ដូច្នេះគាត់ធ្វើការបានតែមួយខែប៉ុណ្ណោះ។ គាត់តែងតែមកធ្វើការ ប៉ុន្តែខ្ញុំមិនដឹងថា តើគាត់ត្រឡប់មកវិញឬមានអ្វីកើតឡើងទេ”។

កាលពីបីថ្ងៃមុន គាត់បានប្រកាសរកការងារនៅតាមទស្សនាវដ្ដី The Beijinger ដែលជាទស្សនាវដ្ដីតាមអុីនធើណិតនៅទីក្រុងេប៉កាំង ដើម្បីស្វែងរកការងារភ្លាមៗជាគ្រូបង្រៀនពេលសម្រាកនៅរដូវក្ដៅ និងបានស្នើសុំឲ្យមានការផ្ដល់កន្លែងស្នាក់នៅដោយឥតគិតថ្លៃ និងអាចចាប់ផ្ដើមក្នុងរយៈពេលពីរបីថ្ងៃទៀត។

លោក វីលៀម ហ្គ្លិន ក៏ជាគ្រូបង្រៀនក្រៅម៉ោងនៅពេលល្ងាចនៅវិទ្យាស្ថានបង្រៀនភាសាអង់គ្លេស Collingwood ផងដែរ ប៉ុន្តែនាយកថ្មីនៃសាលានេះ គឺលោក ម៉ៃឃើល សាប បាននិយាយថា បុរសអាមេរិករូបនេះមិនបានមកបង្រៀនដូចការគ្រោងទុកនៅសប្ដាហ៍នេះទេ។

លោក សាប បាននិយាយថា ” ខ្ញុំបានជួបគាត់តែម្ដងប៉ុណ្ណោះ គឺនៅពេលគាត់មកណែនាំខ្លួនប្រាប់ខ្ញុំ ប៉ុន្តែគាត់មិនបានមកចូលរួមកិច្ចប្រជុំរបស់គ្រូបង្រៀនកាលពីសប្ដាហ៍មុនទេ ហើយក៏មិនបានមកបង្រៀននៅថ្ងៃច័ន្ទដែរ ដូច្នេះខ្ញុំគិតថា គាត់គឺជាគ្រូបរទេសម្នាក់ទៀតដែលមិនបានមកបង្រៀន”។

យោងតាមលោក សាប បានឲ្យដឹងថា ប៉ុន្តែនៅរសៀលមុនគេសម្លាប់គាត់ គាត់បានទូរស័ព្ទប្រាប់អ្នកទទួលភ្ញៀវនៅសាលាថា គាត់អាចបង្រៀនថ្នាក់គាត់នៅម៉ោង៥និង៣០នាទីល្ងាច។ លោកបាននិយាយថា ” ខ្ញុំមិនដឹងថា តើគាត់ទូរស័ព្ទមកដោយខ្លួនគាត់ ឬអ្នកផ្សេងទូរស័ព្ទជំនួសគាត់ទេ ប៉ុន្តែគាត់មិនបានមកទេ ហើយខ្ញុំត្រូវបង្រៀនថ្នាក់នោះ”។

លោក អេនឌី ហ្វីឌឺ អតីតគ្រូបង្រៀនម្នាក់នៅសាលាហ្គោលដិនហ្គេត មកពីអៀកឡង់ខាងជើង បាននិយាយថា គាត់បានស្គាល់ជនរងគ្រោះពីរបីសប្ដាហ៍មុនពេលគាត់ឈប់បង្រៀននៅសាលានេះ។

គាត់បាននិយាយថា ” ខ្ញុំមិនបានស្និទ្ធស្នាលជាមួយគាត់ទេ បុ៉ុន្តែខ្ញុំនិយាយជាមួយគាត់នៅសាលា ហើយគាត់ពូកែណាស់ គាត់បង្រៀនអស់រយៈពេល១៨ឆ្នាំនៅក្នុងប្រទេសថៃ និងប្រទេសចិន ហើយគាត់បាននិយាយថា គាត់ធុញទ្រាន់នឹងការងារនេះ។ ក្រៅពីនេះ គ្មាននរណាម្នាក់ដឹងអ្វីអំពីគាត់ទេ”។

បុគ្គលិកបញ្ជាក់ថា ស្ថានទូតអាមេរិកបានបដិសេធមិនធ្វើអត្ថាធិប្បាយ ដោយលើកឡើងពីកង្វល់អំពីភាពឯកជន។ សាកសពលោក វីលៀមហ្គ្លិន ត្រូវបានដឹកទៅកន្លែងតម្កល់សពនៅក្នុងវត្តស្ទឹងមានជ័យ រង់ចាំការស៊ើបអង្កេតរបស់នគរបាល៕ គឹមហឿន

The post ជនជាតិអាមេរិកម្នាក់ត្រូវបានគេរឹតកសម្លាប់ហើយយកទៅប្លុងចោលនៅកន្លែងចាក់សំរាមនៅជាយក្រុងភ្នំពេញ appeared first on ខេមបូឌា ដេលី.

កម្មករប្រមូលសំរាមក្នុងរាជធានីភ្នំពេញ បានបញ្ចប់កូដកម្មរបស់ខ្លួនកាលពីម្សិលមិញ បន្ទាប់ពីត្រូវបានសន្យាថា នឹងដំឡើងប្រាក់ខែ ដោយនៅសល់ពេលពីរថ្ងៃដើម្បីបោសសម្អាតនៅតាមដងផ្លូវមុនពេលព្រះរាជពិធីនៅថ្ងៃសុក្រដង្ហែព្រះបរមអដ្ឋិរបស់ព្រះបរមរតនកោដ្ឋសម្ដេចឪ នរោត្ត សីហនុ យកទៅតម្កល់។ PhnomPenh-cintri

លោក ងួន ស៊ីផេង នាយកប្រតិបត្តិក្រុុមហ៊ុនស៊ីនទ្រី ដែលមានសិទ្ធិផ្ដាច់មុខប្រមូលសំរាមក្នុងរាជធានីបានមានប្រសាសន៍ថា ក្រុមហ៊ុនបានយល់ព្រមដំឡើងប្រាក់ខែ១០ដុល្លារដល់កម្មករប្រមូលសំរាមចាប់ពីខែសីហាទៅ ដោយធ្វើឲ្យកម្មករដែលមានប្រាក់ខែទាបបំផុតឡើងដល់១០០ដុល្លារ។

អ្នកបោសសម្អាតផ្លូវ អ្នកបើកបររថយន្ត និងជាងជួសជុលរថយន្តដែលទទួលបានប្រាក់ខែលើសពី១០០ដុល្លារហើយនោះ នឹងទទួលបានការដំឡើងប្រាក់ខែ៥ដុល្លារ។

លោក ស៊ីផេង បានមានប្រសាសន៍ថា ក្រុមហ៊ុនស៊ីនទ្រីដែលមានការបារម្ភអំពីគំនរសំរាមនៅជិតព្រះបរមរាជវាំងមុនព្រះរាជពិធីនៅថ្ងៃសុក្រនោះ បានដាក់កម្មករបន្ថែមនៅខណ្ឌដូនពេញ ខណ្ឌចំការមន ខណ្ឌ៧មករា និងខណ្ឌទួលគោក។

លោក ស៊ីផេង បានមានប្រសាសន៍ថា ” យើងដឹងថា សំរាមគឺជាបញ្ហាដ៏ធំដែលត្រូវដោះស្រាយ ដោយសារវាប៉ះពាល់ដល់សុខភាពប្រជាពលរដ្ឋក្នុងរាជធានី ជាពិសេសវាកៀកនឹងព្រះរាជពិធីដង្ហែព្រះបរមអដ្ឋិព្រះបរមរតនកោដ្្ឋយកទៅតម្កល់ផង”។

លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា សន្តិសុខខណ្ឌដែលកាលពីថ្ងៃអង្គារត្រូវបានបញ្ជូនឲ្យទៅប្រមូលសំរាម ព្រមទាំងមន្ត្រីក្រុងថ្នាក់ក្រោមមួយចំនួនទៀតនឹងបន្តប្រមូលសំរាមនៅក្នុងរយៈពេលប៉ុន្មានថ្ងៃខាងមុខនេះ។

លោក ឡុង ឌីម៉ង់ ដែលកាលពីខែតុលាឆ្នាំមុន បានមានប្រសាសន៍ថា កិច្ចសន្យារវាងក្រុមហ៊ុនស៊ីនទ្រី និងសាលារាជធានីចាំបាច់ត្រូវពិនិត្យឡើងវិញ ហើយលោកបានព្រមានកាលពីម្សិលមិញថា នឹងលុបចោលកិច្ចសន្យានេះ ប្រសិនបើ ” ក្រុមហ៊ុននេះមិនធ្វើតាមកាតព្វកិច្ចក្នុងកិច្ចសន្យា [នាពេលអនាគត]” ទេនោះ។

លោក ប្រាក់ សុខា តំណាងកម្មករបានមានប្រសាសន៍ថា កូដកម្មបានបញ្ចប់ហើយ បើទោះជាក្រុមហ៊ុនបដិសេធមិនផ្ដល់ប្រាក់ថ្លៃជួលផ្ទះ ធានារ៉ាប់រងសុខភាព និងថ្លៃធ្វើដំណើរសរុបចំនួន៣៥ដុល្លារក៏ដោយ។ លោកបានមានប្រសាសន៍ថា ” កម្មករបានបញ្ឈប់កូដកម្មរបស់ខ្លួន ពីព្រោះពួកគេទទួលបានការផ្ដល់ឲ្យប្រសើរជាង [កាលពីដើមសប្ដាហ៍] ហើយក្រុមហ៊ុនមិនអាចផ្ដល់ឲ្យច្រើនជាងនេះបានទេ”។

ទោះជាយ៉ាងណា អ្នកស្រី ខៀវ ណេត អាយុ២៨ឆ្នាំ ជាអ្នកប្រមូលសំរាមបាននិយាយថា គាត់ខកចិត្តនឹងដំណោះស្រាយនេះណាស់។ អ្នកស្រីបាននិយាយថា ” ខ្ញុំគិតថា ប្រាក់នេះមិនគ្រប់គ្រាន់សម្រាប់កម្មករទេ ប៉ុន្តែខ្ញុំត្រូវបង្ខំចិត្តទទួលយកការព្រមព្រៀងរវាងភាគីទាំងពីរ”៕ សារុន

The post កម្មករក្រុមហ៊ុនស៊ីនទ្រីចូលធ្វើការវិញហើយបន្ទាប់ពីមានដំណោះស្រាយ appeared first on ខេមបូឌា ដេលី.

កាលពីម្សិលមិញ អង្គភាពប្រឆាំងអំពើពុករលួយ (ACU) បានបង្ហោះលើគេហទំព័ររបស់ខ្លួននូវឯកសារបួនទំព័រ ដែលបញ្ជាក់ពីការឆ្លើយតបរបស់លោក ត្រាំ អីុវតឹក រដ្ឋមន្ត្រីក្រសួងសាធារណការ និងដឹកជញ្ជូន ទៅនឹងពាក្យបណ្តឹងពុករលួយនៅក្នុងក្រសួងរបស់លោក រួមទាំងពាក្យបណ្តឹងដែលចោទថា លោករដ្ឋមន្ត្រីបានផ្តល់ប្រាក់រង្វាន់លើកទឹកចិត្តច្រើនហួសហេតុសម្រាប់ខ្លួនឯងផងដែរ។

ACU បានលើកឡើងនៅក្នុងឯកសារនេះថា ខ្លួនទទួលបានពាក្យបណ្តឹងមួយចំនួនដែលចោទប្រកាន់ថា មន្ត្រីជាន់ខ្ពស់រួមទាំងលោក ត្រាំ អីុវតឹក ផង បានបំពានប្រព័ន្ធផ្តល់ប្រាក់រង្វាន់លើកទឹកចិត្តផ្អែកលើគុណសម្បត្តិការងារ ដើម្បីផ្តល់ប្រាក់រង្វាន់លើកទឹកចិត្តដល់ខ្លួនឯងយ៉ាងច្រើន ដោយមិនអើពើនឹងមន្ត្រីដទៃទៀតឡើយ។

ពាក្យបណ្តឹងដែល ACU ទទួលបានទាំងនេះលើកឡើងថា មន្ត្រីថ្នាក់ក្រោមមិនទទួលបានរង្វាន់លើកទឹកចិត្តសម្រាប់ឆ្នាំ២០១៣ទេ ហើយគ្មានដំណើរការតម្លាភាពនៅក្នុងការកំណត់ប្រាក់រង្វាន់លើកទឹកចិត្តឡើយ។

ឯកសាររបស់ACUនេះលើកឡើងថា ” ឯកឧត្តមរដ្ឋមន្ត្រី [ លោក ត្រាំ អីុវតឹក ] ទទួលបានប្រាក់រង្វាន់លើកទឹកចិត្ត៩ភាគរយ ហើយខុទ្ទកាល័យរបស់រដ្ឋមន្ត្រីទទួលបានប្រាក់រង្វាន់លើកទឹកចិត្ត៤ភាគរយ”។ ឯកសារនេះលើកឡើងទៀតថា រដ្ឋលេខាធិការពីររូបនៃក្រសួងសាធារណការ និងដឹកជញ្ជូនទទួលបានប្រាក់រង្វាន់លើកទឹកចិត្ត៥,៣៣ភាគរយ មួយរូបទទួលបាន៣,៣៣ភាគរយ និងបួនរូបទៀតទទួលបាន១,៣៣ភាគរយ។

ឯកសារនេះបញ្ជាក់ថា អនុរដ្ឋលេខាធិការ១០រូបបន្ថែមទៀត និងប្រធាននាយកដ្ឋានមួយចំនួន ក៏ទទួលបានប្រាក់រង្វាន់លើកទឹកចិត្តដែរ តែតិចតួចជាងនេះ។ ឯកសារេនះមិនបញ្ជាក់ថា ក្នុងមន្ត្រីមួយរូបៗទទួលបានប្រាក់ខែគោលប៉ុន្មានទេ។

ឯកសាររបស់ ACU នេះផ្តល់ចម្លើយរបស់លោក ត្រាំ អីុវតឹក ទៅនឹងពាក្យបណ្តឹងដែលចោទប្រកាន់ថា ប្រាក់រង្វាន់លើកទឹកចិត្តរបស់លោកផ្អែកលើគុណសម្បត្តិ។ ឯកសារនេះលើកឡើងទៀតថា ” ដោយសារឯកឧត្តមរដ្ឋមន្ត្រី [ លោក ត្រាំ អីុវតឹក ] មានការទទួលខុសត្រូវច្រើនជាងគេ លោកគួរត្រូវបាន៩ភាគរយ។ ផ្អែកលើការធ្វើការងារបានល្អ និងគុណតម្លៃ ដែលខុទ្ទកាល័យដើរតួនាទីក្នុងការសម្រួលរាល់ឯកសារទាំងអស់ មុននឹងបញ្ជូនទៅលោករដ្ឋមន្ត្រី ក្រសួងបានសម្រេចផ្តល់ឲ្យ៤ភាគរយ”។

មន្ត្រីជាន់ខ្ពស់មួយរូបនៅក្រសួងសាធារណការ និងដឹកជញ្ជូន ដែលសុំមិនបញ្ចេញឈ្មោះដោយសារការខ្លាចបាត់បង់ការងាររបស់ខ្លួន បានលើកឡើងកាលពីម្សិលមិញថា មន្ត្រីមួយចំនួននៅក្នុងក្រសួង ចាប់ពីមន្ត្រីថ្នាក់ក្រោមរហូតដល់រដ្ឋលេខាធិការ បានប្តឹងទៅ ACU ដោយសារការច្រណែនរឿងប្រាក់រង្វាន់លើកទឹកចិត្ត។

មន្ត្រីរូបនេះ បានពន្យល់ថា “មានមន្ត្រីមួយចំនួនមិនសប្បាយចិត្ត ដូច្នេះហើយពួកគេក៏បានផ្សព្វផ្សាយបញ្ហានេះ”។ ទោះជាយ៉ាងណា មន្ត្រីរូបនេះលើកឡើងថា វាជាសិទ្ធិរបស់លោក ត្រាំ អីុវតឹក រដ្ឋមន្ត្រីក្រសួងសាធារណការ និងដឹកជញ្ជូនក្នុងការសម្រេចផ្តល់ប្រាក់រង្វាន់លើកទឹកចិត្តដល់មន្ត្រី។ មន្ត្រីដដែលបានថ្លែងទៀតថា ” វាជាឆន្ទានុសិទ្ធិរបស់លោករដ្ឋមន្ត្រីក្នុងការលៃទុកប្រាក់ប៉ុន្មានគួរឲ្យទៅមន្ត្រី។ នេះមិនមែនជាអំពើពុករលួយទេ”។

ចាប់តាំងពីខែឧសភា ឆ្នាំ២០១៣មក ក្រសួងសាធារណការ និងដឹកជញ្ជូនទទួលបានការអនុញ្ញាតដោយកិច្ចព្រមព្រៀងគ្នារបស់ក្រសួងសេដ្ឋកិច្ច និងហិរញ្ញវត្ថុរក្សាទុក២៩ភាគរយនៃប្រាក់ចំណូលដែលខ្លួនទទួលបានដើម្បីផ្តល់ប្រាក់រង្វាន់លើកទឹកចិត្តដល់មន្ត្រី ដែលបំពេញការងារបានល្អនៅក្នុងការប្រមូលចំណូល និងការផ្តល់សេវាសាធារណៈ។

លោក ពេជ្រ ពិសី អ្នកនាំាពាក្យរបស់អង្គការតម្លាភាពកម្ពុជា បានមានប្រសាសន៍ថា វិធានការដែលធ្វើឡើងក្នុងគោលបំណងទប់ស្កាត់អំពើពុករលួយតាមរយៈការផ្តល់គ្រឿងរង្វាន់់លើកទឹកចិត្តនិងប្រភពចំណូលផ្សេងៗទៀតដល់មន្ត្រី មិនទាន់បង្ហាញទីការលើកទឹកចិត្តទេ។

លោកបានបន្តថា ” វិធីដែលមានប្រសិទ្ធភាពជាងនេះគឺដំឡើងប្រាក់ខែឲ្យមន្ត្រីរាជការ និងចាត់តាំងការងារឲ្យពួកគេយោងទៅតាមតួនាទី ដើម្បីឲ្យពួកគេផ្តល់សេវាសាធារណៈប្រកបដោយប្រសិទ្ធភាព”៕ សុខុម

The post រដ្ឋមន្ត្រីក្រសួងសាធារណការ និងដឹកជញ្ជូននិយាយការពារប្រាក់រង្វាន់លើកទឹកចិត្តយ៉ាងច្រើនសម្រាប់ខ្លួនឯង appeared first on ខេមបូឌា ដេលី.

ប្ដីប្រពន្ធជនជាតិខ្មែរនៅក្នុងខណ្ឌចំការមន រាជធានីភ្នំពេញ ដែលបានចំណាយប្រាក់៤០០ដុល្លារ ដើម្បីយកទារិកាម្នាក់ទៅចិញ្ចឹម បានបដិសេធការចោទប្រកាន់នៅក្នុងតុលាការកាលពីម្សិលមិញដែលថា ពួកគាត់មានបំណងនាំកុមារនេះទៅប្រទេសម៉ាឡេស៊ីជាមួយពួកគាត់ ដើម្បីជួយរកលុយពេលពួកគេធ្វើជាអ្នកសុំទាន។

លោក ហេង ឆុន អាយុ៤៨ឆ្នាំ និងប្រពន្ធរបស់គាត់ឈ្មោះ សំ ណាង អាយុ៣៨ឆ្នាំ ត្រូវបានចាប់ខ្លួនកាលពីខែវិច្ឆិកា ឆ្នាំ២០១៣ ខណៈដែលព្យាយាមឆ្លងព្រំដែននៅប៉ោយប៉ែត ទៅប្រទេសម៉ាឡេស៊ីជាមួយទារិការូបនេះ កុមារពីរនាក់ទៀត និងបុរសម្នាក់ទៀត។

លោក តាំង សុ៊នឡាយ ចៅក្រមប្រធានក្រុមប្រឹក្សាជំនុំជម្រះបានប្រាប់ប្ដីប្រពន្ធនេះនៅតុលាការកាលពីម្សិលមិញថា ” អ្នកទាំងពីរត្រូវបានចោទប្រកាន់ពីបទជួញដូរមនុស្ស”។

មេធាវីតំណាងលោក ឆុន និងអ្នកស្រី ណាង បានលើកឡើងថា ពួកគាត់ទាំងពីរនាក់បានផ្ដល់ប្រាក់ដល់ឪពុកម្ដាយទារិការូបនេះដោយការអាណិតអាសូរ មិនមែនជាការទិញដូរឡើយ។

លោក ជូង ជូងី មេធាវីតំណាងលោក ឆុន បានមានប្រសាសន៍ថា ” ពួកគាត់បានផ្ដល់ប្រាក់៤០០ដុល្លារដល់ឪពុកម្ដាយទារិការូបនេះ ប៉ុន្តែវាមិនមានន័យថា ពួកគាត់បានទិញនាងទេ”។

លោកស្រី ជាតិ សុខា មេធាវីតំណាងអ្នកស្រី ណាង បានមានប្រសាសន៍ថា ប្ដីប្រពន្ធនេះបាននាំទារិការូបនេះទៅប្រទេសម៉ាឡេស៊ីជាមួយពួកគាត់ ពីព្រោះពួកគាត់មិនដឹងទុកនាងឲ្យនៅជាមួយនរណាក្នុងប្រទេសកម្ពុជា។ លោកស្រី សុខា បានមានប្រសាសន៍ថា ” ខ្ញុំសូមស្នើឲ្យចៅក្រមដោះលែងកូនក្ដីរបស់ខ្ញុំ ពីព្រោះការចោទប្រកាន់ពីបទជួញដូរមនុស្ស គឺមិនពិតឡើយ”។

លោក ឆុន បានទទួលស្គាល់ថា គាត់បានធ្វើដំណើរទៅសុំទាននៅប្រទេសម៉ាឡេស៊ីក្នុងពេលកន្លងមក ប៉ុន្តែនៅពេលត្រូវបានចាប់ខ្លួន គាត់បានបដិសេធថា គាត់បាននាំនាងមកជាមួយខ្លួនមិនមែនក្នុងគោលបំណងបែបនេះឡើយ។ លោក ឆុន បាននិយាយថា ” ខ្ញុំមិនទទួលយកការចោទប្រកាន់នេះទេ ពីព្រោះខ្ញុំមិនមែនជាអ្នកជួញដូរមនុស្សឡើយ។ ខ្ញុំបានសម្រេចចិត្តធ្វើដំណើរទៅសុំទាននៅប្រទេសម៉ាឡេស៊ី [ក្នុងពេលកន្លងមក] ពីព្រោះវាស្រួលរកលុយ”។

ប៉ុន្តែលោក កែវ ធា នាយនគរបាលប្រឆាំងការជួញដូរមនុស្សរាជធានីបានប្រាប់តុលាការថា ប្ដីប្រពន្ធនេះមានប្រវត្តិជួញដូរមនុស្សដែលងាយរងគ្រោះទៅប្រទេសម៉ាឡេស៊ី ដើម្បីរកប្រាក់ដោយការសុំទាន។ លោក កែវ ធា បានមានប្រសាសន៍ថា ” ពួកគាត់ទាំងពីរធ្លាប់នាំមនុស្សក្រីក្រ និងកុមារជាច្រើននាក់ទៀតទៅឲ្យសុំទាននៅប្រទេសម៉ាឡេស៊ីក្នុងពេលកន្លងមក មុនពេលត្រូវបានចាប់ខ្លួន”។

ប្ដីប្រពន្ធនេះប្រឈមនឹងការជាប់ពន្ធនាគារពីរ១៥ឆ្នាំដល់២០ឆ្នាំប្រសិនបើត្រូវបានរកឃើញពិរុទ្ធភាព។ លោកចៅក្រម តាំង ស៊ុនឡាយ បានមានប្រសាសន៍ថា តុលាការនឹងប្រកាសសាលក្រមនៅថ្ងៃទី២៥ ខែកក្កដា៕ សារុន

The post តុលាការបើកសវនាការជំនុំជម្រះរឿងក្តីប្តីប្រពន្ធពីរនាក់ពីបទទិញកុមារយកទៅសុំទាននៅម៉ាឡេស៊ី appeared first on ខេមបូឌា ដេលី.

កាលពីម្សិលមិញ អង្គការតម្លាភាពអន្តរជាតិ (TI) នៅកម្ពុជាបានប្រកាសឲ្យដឹងថា ខ្លួននឹងមិនបញ្ជូនអ្នកសង្កេតការណ៍ទៅសង្កេតការណ៍ការប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី៤និងទី៥ ខែសីហាខាងមុខនេះទេ បន្ទាប់ពីអង្គភាពប្រឆាំងអំពើពុករលួយ (ACU) និងក្រសួងអប់រំបានឲ្យដឹងថា គេនឹងមិនអនុញ្ញាតឲ្យមានអ្នកសង្កេតការណ៍បម្រុងនៅសាលប្រឡងទេ។

អង្គការតម្លាភាពអន្តរជាតិបានឲ្យដឹងថា គោលការណ៍ផ្ទៃក្នុងរបស់ខ្លួនតម្រូវឲ្យអង្គការនេះបញ្ជូនអ្នកសង្កេតការណ៍បម្រុង សម្រាប់ករណីដែលអ្នកបានចុះឈ្មោះហើយ មិនអាចធ្វើការនៅថ្ងៃប្រឡងនោះបាន។ យ៉ាងនេះក្តី ក្រុមមន្ត្រីក្រសួងអប់រំបាននិយាយថា ពួកគេចាំបាច់ត្រូវមានបញ្ជីឈ្មោះជាក់លាក់ ចំពោះអ្នកដែលនឹងធ្វើការសង្កេតការណ៍នៅថ្ងៃនោះ។

អស់រយៈពេលជាច្រើនឆ្នាំមកហើយ ដែលការប្រឡងសញ្ញាបត្រទុតិយភូមិពោរពេញដោយអំពើពុករលួយ ហើយមានការអះអាងថា សិស្សបានបង់លុយឲ្យគ្រូ ឬអនុរក្សដល់ទៅប្រាំដុល្លារដើម្បីបានសន្លឹកចម្លើយវិញ្ញាសា។

ក្នុងកិច្ចប្រឹងប្រែងដើម្បីធ្វើឲ្យការប្រឡងនេះស្អាតស្អំ សម្រាប់ការចូលរៀននៅតាមសាកលវិទ្យាល័យរដ្ឋនោះ ក្រសួងអប់រំបានរៀបចំថវិកាបន្ថែម ដើម្បីបើកទូទាត់ឲ្យអនុរក្សនិងបានដកអ្នកសង្កេតការណ៍ពីខាងក្រៅ។ អង្គភាព ACU ថែមទាំងបានលើកឡើងនៅដើមឆ្នាំនេះថា ទាំងសិស្សនិងគ្រូបង្រៀន ដែលត្រូវគេរកឃើញថា ប្រព្រឹត្តមិនត្រឹមត្រូវ អាចប្រឈមនឹងការជាប់ពន្ធនាគារ។

ក្នុងសេចក្តីប្រកាសមួយ អង្គការតម្លាភាពអន្តរជាតិបានឲ្យដឹងថា គោលការណ៍របស់រដ្ឋាភិបាលក្នុងការដាក់អ្នកសង្កេតការណ៍ម្នាក់ក្នុងមួយបន្ទប់ នឹងរារាំងអង្គការមិនមែនរដ្ឋាភិបាលនេះមិនឲ្យអនុវត្តវិធីសាស្ត្រសង្កេតការណ៍ដែលផ្អែកលើគំរូវិទ្យាសាស្ត្ររបស់ខ្លួន ដែលនឹងដាក់អ្នកសង្កេតការណ៍នៅតាមសាលប្រឡងដែលជ្រើសរើសដោយចៃដន្យ។

សេចក្តីប្រកាសនោះបានឲ្យដឹងថា “អវត្តមាននៃអ្នកសង្កេតការណ៍ណាមួយនឹងប៉ះពាល់ជាខ្លាំងដល់លទ្ធផលនៃរបាយការណ៍ និងមិនមានលក្ខណៈសម្បត្តិត្រឹមត្រូវទេ ដូច្នេះហើយអង្គការតម្លាភាពអន្តរជាតិនៅកម្ពុជាចាំបាច់ត្រូវមានអ្នកសង្កេតការណ៍បម្រុង។ ទោះជាយ៉ាងនេះក្តី អង្គការនេះមិនត្រូវបានគេអនុញ្ញាតឲ្យមានអ្នកសង្កេតការណ៍បម្រុងឡើយ”។

លោក រស់ សាលីន ប្រធានខុទ្ទកាល័យក្រសួងអប់រំបានមានប្រសាសន៍ថា លោកនឹងមិនបារម្ភទេដែលក្រុមអ្នកសង្កេតការណ៍អង្គការតម្លាភាពអន្តរជាតិនឹងមិនចូលរួមក្នុងដំណើរការត្រួតពិនិត្យការប្រឡងនេះ ពីព្រោះសាធារណជនមានជំនឿលើអ្នកសង្កេតការណ៍ផ្សេងទៀតដូចជា ក្រុមមន្ត្រី ACU ជាដើម ដែលនឹងធ្វើការសង្កេតការណ៍ការប្រឡងនេះ។ លោកបានបន្ថែមថា ” ចូលរួម ឬមិនចូលរួម នឹងមិនប៉ះពាល់ដល់ការប្រឡងនេះទេ ពីព្រោះនៅពេលនេះ [គ្រូបង្រៀន] ខ្លាចញញើតនឹងការចាប់ខ្លួនទៅហើយ”។

លោកបានមានប្រសាសន៍ថា “ពេលណា ក្រុមអ្នកសង្កេតការណ៍ចាប់បានគ្រូបង្រៀន ពេលនោះគេនឹងផ្តល់ព័ត៌មានឲ្យ ACU” ។ លោកបានបន្ថែមថា មិនមែនក្រសួងអប់រំទេ គឺ ACU ទៅវិញទេដែលជាអ្នកទទួលភារៈក្នុងការមើលខុសត្រូវការប្រឡងនេះ៕មានិត(រាយការណ៍បន្ថែមដោយ ផាន់ អាណា)

The post អង្គការតម្លាភាពអន្តរជាតិដកខ្លួនចេញពីការសង្កេតការណ៍ក្នុងការប្រឡង appeared first on ខេមបូឌា ដេលី.

អ្នកភូមិជាច្រើនគ្រួសារដែលបានជាប់ពាក់ព័ន្ធក្នុងវិវាទដីធ្លីយូរឆ្នាំមកហើយជាមួយអ្នកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពលនោះបាននិយាយកាលពីម្សិលមិញថា ពួកគាត់មានគម្រោងរៀបចំពិធីដាក់បណ្ដាសារយៈពេលពីរថ្ងៃ បន្ទាប់ពីក្រុមហ៊ុនខេឌីស៊ីរបស់អ្នកស្រីមិនបានផ្ដល់សំណងសមរម្យដល់ពួកគាត់ចំពោះការបាត់បង់ដីស្រែស្ថិតក្នុងស្រុកកំពង់ត្រឡាច ខេត្តកំពង់ឆ្នាំង។

លោក ស្ងួន ញឿន ស្ថិតក្នុងចំណោមអ្នកភូមិ១៦គ្រួសារ ដែលបានជាប់ពាក់ព័ន្ធនឹងវិវាទដីធ្លីរយៈពេលជាងប្រាំពីរឆ្នាំជាមួយក្រុមហ៊ុនអ្នកស្រី ជា ខេង ដែលបានគាបសង្កត់អ្នកភូមិឲ្យទទួលយកសំណង ដែលពួកគាត់បានលើកឡើងថាមិនគ្រប់គ្រាន់នោះ បាននិយាយថា “យើងមិនចង់បង្ហូរឈាមជាមួយកម្មកររបស់ក្រុមហ៊ុននេះទេ ពីព្រោះពួកគេភាគច្រើនជាអ្នកភូមិមូលដ្ឋាននៅក្នុងឃុំនេះ”។

លោក ញឿន បាននិយាយថា ” ក្រុមហ៊ុនបានសាងសង់របងបេតុងលើដីដែលមានវិវាទនេះ ដូច្នេះជម្រើសប្រសើរបំផុតដើម្បីចៀសវាងការបង្ហូរឈាម គឺត្រូវរៀបចំពិធីដាក់បណ្ដាសាវិញ”។

អ្នកភូមិដែលបានប៉ះទង្គិចគ្នាបីលើកជាមួយកម្មករ និងនគរបាលកាលពីសប្ដាហ៍មុន មានគម្រោងស្ងោរក្បាលជ្រូក ហើយគ្រវាសអំបិល និងម្ទេសទៅលើភ្លើង ហើយដុតរូបសំណាកនៅថ្ងៃទី១៩ និងថ្ងៃទី២០ ខែកក្កដា ដោយមានបំណងធ្វើឲ្យអារក្សអ្នកតាធ្វើបាបអ្នកស្រី ជា ខេង តំណាងក្រុមហ៊ុន និងប្រធានភូមិម្នាក់នៅជិតនោះ៕ សារុន

The post អ្នកភូមិមានគម្រោងរៀបចំពិធីដាក់បណ្តាសាជុំវិញវិវាទដីធ្លីជាមួយក្រុមហ៊ុនអ្នកស្រី ជា ខេង appeared first on ខេមបូឌា ដេលី.

ការសិក្សាពីយេនឌ័រនឹងត្រូវដាក់បញ្ចូលក្នុងកម្មវិធីសិក្សានៅសាកលវិទ្យាល័យធំបំផុតក្នុងប្រទេសកម្ពុជា នៅក្នុងកិច្ចប្រឹងប្រែងដើម្បីកែប្រែផ្នត់គំនិតរបស់និស្សិតពូកែៗបំផុតនៅក្នុងប្រទេស លើតួនាទីរបស់ស្ត្រីនៅក្នុងសង្គម នេះបើយោងតាមអ្វីដែលអ្នកអប់រំ និងអ្នកជំនាញបានលើកឡើងនៅក្នុងសិក្ខាសាលាមួយស្ដីពីវគ្គសិក្សានេះកាលពីម្សិលមិញ។

កម្មវិធីសាកល្បងមួយនឹងចាប់ផ្ដើមនៅដេប៉ាតឺម៉ង់ភូមិវិទ្យានៃសាកលវិទ្យាល័យភូមិន្ទភ្នំពេញនៅឆ្នាំក្រោយ ដោយនិស្សិតឆ្នាំទី១ទាំងអស់ត្រូវសិក្សាវគ្គយេនឌ័ររយៈពេល១៥សប្ដាហ៍ ដែលនឹងលើកឡើងពីប្រធានបទនានា រួមទាំងការលើកតម្កើងស្ត្រីនៅអាស៊ី អំពើហិង្សាផ្លូវភេទ និងភេទផងដែរ។

ចាប់ពីឆ្នាំ២០១៦ទៅ វគ្គសិក្សានេះនឹងត្រូវពង្រីកទៅដេបា៉តឺម៉ង់ផ្សេងៗទៀត ដោយរង់ចាំការអនុម័តពីគណៈកម្មាធិការទទួលស្គាល់គុណភាពអប់រំរបស់កម្ពុជា ដែលវាយតម្លៃលើមុខវិជ្ជាសិក្សារបស់សាកលវិទ្យាល័យរដ្ឋទាំងអស់រាល់ប្រាំឆ្នាំម្ដង។

លោកស្រី រស់ សុភាព នាយិកាអង្គការយេនឌ័រ និងអភិវឌ្ឍន៍កម្ពុជា បានមានប្រសាសន៍ថា អង្គការក្រៅរដ្ឋាភិបាលមួយនេះបានចំណាយពេលបួនឆ្នាំធ្វើការជាមួយសាកលវិទ្យាល័យភូមិន្ទភ្នំពេញ ដើម្បីអនុវត្តកម្មវិធីនេះ។

លោកស្រីបានមានប្រសាសន៍នៅឯសិក្ខាសាលារៀបចំឡើងនៅក្នុងរាជធានីភ្នំពេញថា “កម្ពុជា គឺជាសង្គមបិតាធិបតេយ្យ ហើយ [មាន] ការរើសអើងយ៉ាងពិតប្រាកដ។ ទោះបីជាពេលនេះសង្គមរបស់យើងបើកទូលាយខ្លាំងបើប្រៀបធៀបទៅកាលពី១០ឆ្នាំមុនក្ដី ក៏មានតំបន់ជាច្រើនដែលនៅតែមានគម្លាតខុសគ្នាខ្លាំង [ឧទាហរណ៍] អំពើហិង្សាលើស្ត្រី និងអំពើហិង្សាក្នុងគ្រួសារនៅតែខ្លាំងក្លានៅឡើយ”។

លោក ហៃ សាំង សាស្ត្រាចារ្យផ្នែកភូមិវិទ្យានៅសាកលវិទ្យាល័យភូមិន្ទភ្នំពេញ បានមានប្រសាសន៍ថា នៅពេលនិស្សិតបញ្ចប់ការសិក្សាជាច្រើននាក់នៅសាកលវិទ្យាល័យនេះក្លាយជាគ្រូបង្រៀន លោកសង្ឃឹមថា ពួកគេនឹងអប់រំកូនសិស្សរបស់ខ្លួនឲ្យយល់ដឹងអំពីភាពស្មើគ្នារវាងភេទ។

លោកមានប្រសាសន៍ទៀតថា ” ពួកគេ [នឹង] មានចំណេះដឹងដើម្បីផ្សព្វផ្សាយពីបញ្ហានេះទៅដល់កូនសិស្សរបស់ពួកគេនៅតាមវិទ្យាល័យ ដូច្នេះយើងរំពឹងថា មនុស្សជំនាន់ក្រោយនឹងមានការយល់ដឹងច្បាស់អំពីអ្វីដែលហៅថា យេនឌ័រ និងពីវិធីលើកកម្ពស់ការផ្ដល់សិទ្ធិ”។

តំណាងមកពីសាកលវិទ្យាល័យប្រាំពីរផ្សេងទៀតក៏បានចូលរួមសិក្ខាសាលាកាលពីម្សិលមិញនេះដែរ។ លោក មិន សីហា ព្រឹទ្ធបុរសរងនៃមហាវិទ្យាល័យវិទ្យាសាស្ត្រសង្គមនៅសាកលវិទ្យាល័យអន្តរជាតិ បានមានប្រសាសន៍ថា បច្ចុប្បន្នសាកលវិទ្យាល័យនេះផ្ដល់វគ្គសិក្សាតែមួយវគ្គប៉ុណ្ណោះស្ដីពីយេនឌ័រ ប៉ុន្តែពេលនេះកំពុងតែពិចារណាពង្រីកវាទៅជាមុខវិជ្ជាសិក្សាដ៏សំខាន់។

និស្សិតមិនទាន់បញ្ចប់ការសិក្សាមួយចំនួននៅសាកលវិទ្យាល័យភូមិន្ទភ្នំពេញ រួមទាំង ស្រេង ចាន់ណារ័ត្ន អាយុ១៩ឆ្នាំ ជានិស្សិតផ្នែកមនុស្សសាស្ត្រផងដែរ និយាយថា ពួកគេគាំទ្រគម្រោងនេះ។ ពួកគេនិយាយថា ” [វានឹងជួយ] ជំរុញឲ្យស្ត្រីចូលរួមក្នុងសង្គម ហើយមានសេចក្ដីក្លាហាន និងផ្ដល់ឱកាសឲ្យពួកគេបង្ហាញបុរសៗថា ស្ត្រីមិនអន់ជាងបុរសទៀតទេ៕ សុខុម

The post កម្មវិធីសិក្សាស្ដីពីយេនឌ័រត្រូវបានដាក់បញ្ជូលសាកល្បងនៅសាកលវិទ្យាល័យភូមិន្ទ appeared first on ខេមបូឌា ដេលី.

កាលពីម្សិលមិញ សាលាដំបូងខេត្តសៀមរាបបានចោទប្រកាន់នាយកសាលាភាសាអង់គ្លេសគ្មានអាជ្ញាប័ណ្ណមួយពីបទលក់ពេស្យាចារកុមារ ដែលតាមចោទថា គាត់បានធ្វើសញ្ចរកម្មសិស្សវ័យជំទង់របស់ខ្លួនទៅឲ្យជនបរទេសដែលស្ម័គ្រចិត្តបង្រៀននៅសាលារបស់គាត់។

លោក ឡុង វេហា អាយុ៣២ឆ្នាំត្រូវបានចាប់ខ្លួនកាលពីថ្ងៃច័ន្ទ បន្ទាប់ពីការស៊ើបអង្កេតរយៈពេលមួយខែលើការចោទប្រកាន់ពីអតីតអ្នកស្ម័គ្រចិត្តម្នាក់នៅសាលា Underprivileged Children School ស្ថិតក្នុងស្រុកសូទ្រនិគមថា នាយកសាលារូបនេះបានធ្វើសញ្ចរកម្មសិស្សរបស់ខ្លួនឲ្យរួមភេទជាមួយអ្នកស្ម័គ្រចិត្តដែលបានបរិច្ចាគដល់សាលារៀននេះ។

លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបានមានប្រសាសន៍ថា “យើងបានចោទប្រកាន់គាត់រួចហើយ ហើយគាត់ត្រូវបានបញ្ជូនទៅពន្ធនាគារខេត្តដើម្បីឃុំខ្លួនបណ្ដោះអាសន្នមុនការកាត់ក្តី”។ លោក វណ្ណារ៉េត បានបដិសេធមិននិយាយថា តើលោក ឡុង វេហា បានសារភាពឬផ្ដល់ព័ត៌មានលម្អិតអំពីបទល្មើសដូចការចោទប្រកាន់ឬអត់ឡើយ។

កាលពីថ្ងៃអង្គារ លោកស្រី ដួង ថាវរី នាយការិយាល័យនគរបាលប្រឆាំងការជួញដូរមនុស្សនិងការពារអនីតិជនខេត្ត បានមានប្រសាសន៍ថា លោក ឡុង វេហា បានបដិសេធការចោទប្រកាន់ទាំងនេះ រួមទាំងការអះអាងថា លោកបានធ្វើសញ្ចរកម្មកុមារអាយុ១៧ឆ្នាំយ៉ាងតិចពីរនាក់។

ក្មេងប្រុសទាំងពីរនាក់នេះស្ថិតក្នុងចំណោមសិស្សប្រាំបួននាក់ ដែលគេឃើញស្នាក់នៅផ្ទះជួលជាមួយលោក ឡុង វេហា នៅក្រុងសៀមរាបនៅពេលចាប់ខ្លួនគាត់ ហើយឥឡូវនេះស្ថិតក្រោមការថែទាំនៅមន្ទីរសង្គមកិច្ចខេត្ត។

លោក ចៅ លក្ខណ៍វណ្ណា អ្នកឃ្លាំមើលនៅអង្គការសិទ្ធិមនុស្សលីកាដូ ដែលបាននិយាយជាមួយកុមារទាំងប្រាំបួននាក់ និងឪពុកម្ដាយរបស់ពួកគេមួយចំនួនបានមានប្រសាសន៍ថា កុមារទាំងអស់នេះបានអះអាងថា ការចោទប្រកាន់លោក ឡុង វេហា គឺមិនពិតទេ ហើយថា ឪពុកម្ដាយរបស់ពួកគេជឿថា លោក ឡុង វេហា គ្មានកំហុសឡើយ។

លោកបានមានប្រសាសន៍ថា “ពួកគេបានស្នើឲ្យអង្គការរបស់យើងជួយធ្វើយ៉ាងណាឲ្យមានការលើកលែងការចោទប្រកាន់លើលោក ឡុង វេហា ពីព្រោះគាត់ជាមនុស្សល្អ ហើយតែងតែជួយកុមារនៅក្នុងភូមិឲ្យបានរៀនភាសាអង់គ្លេស”។

លោកស្រី ថាវរី បានមានប្រសាសន៍ថា អាជ្ញាធរមានភ័ស្តុតាងគ្រប់គ្រាន់ដើម្បីដាក់បន្ទុកលើលោក ឡុង វេហា ដែលអាចជាប់ពន្ធនាគាររហូតដល់ប្រាំឆ្នាំ។ លោកស្រីបានមានប្រសាសន៍ថា ” មនុស្សទាំងនេះអាចជំទាស់នឹងការចាប់ខ្លួនគាត់ ពីព្រោះវាជាសិទ្ធិរបស់ពួកគាត់ ប៉ុន្តែយើងមានភ័ស្តុតាងគ្រប់គ្រាន់ដើម្បីបង្ហាញថា លោក ឡុង វេហា ពិតជាបានប្រព្រឹត្តដូចគេបានចោទប្រកាន់មែន”។

នគរបាលលើកឡើងថា ពួកគេបានតាមដានសកម្មភាពរបស់លោក ឡុង វេហា អំឡុងការស៊ើបអង្កេត ហើយមានភ័ស្តុតាងពីប្រព័ន្ធអុីនធើណិតដែលមិនបញ្ជាក់ឲ្យដឹងថា គាត់ពិតជាបានរៀបចំឲ្យអ្នកស្ម័គ្រចិត្តរួមភេទជាមួយសិស្សរបស់ខ្លួនមែន៕ សារុន

The post តុលាការចោទប្រកាន់នាយកសាលាម្នាក់ពីបទធ្វើសញ្ចរកម្មសិស្សរបស់ខ្លួន appeared first on ខេមបូឌា ដេលី.