News – The Cambodia Daily

នៅក្នុងទិដ្ឋភាពដែលធ្វើឲ្យគេនឹងឃើញដល់ថ្ងៃបន្ទាប់ពីសម្តេចឪ នរោត្តម សីហនុ ចូលទិវង្គតនៅខែតុលា ឆ្នាំ២០១២ ព្រះសង្ឃរាប់រយអង្គ និមន្តអង្គុយចុះគួរជាទីគោរពសក្ការៈនៅខាងមុខព្រះបរមរាជវាំងកាលពីម្សិលមិញ នៅពេលពិធីរយៈពេលបីថ្ងៃ ដើម្បីដង្ហែព្រះបរមអដិ្ឋយកទៅតម្កល់បានចាប់ផ្តើម។ king

ព្រះសង្ឃប្រមាណ៣.៦០០អង្គត្រូវបាននិមន្តមកពីទូទាំងប្រទេសដើម្បីរាប់បាត និងសូត្រធម៌ប្រោះព្រំកាលពីព្រឹកម្សិលមិញ ខណៈដែលមន្ត្រីព្រះបរមរាជវាំងត្រៀមរៀបចំដើម្បីដង្ហែព្រះបរមអដ្ឋិជុំវិញរាជធានីនៅថ្ងៃនេះ។ នៅពេលល្ងាចម្សិលមិញ ព្រះសង្ឃ និងដូនជីប្រមាណ១.០០០អង្គ-នាក់បានជួបជុំគ្នានៅខាងមុខព្រះបរមរាជវាំងម្តងទៀត ដើម្បីអុជទៀន និងធ្វើសមាធិ។

លោក កឹម សុខា អនុប្រធានគណបក្សសង្គ្រោះជាតិ និងមន្ត្រីគណបក្សប្រឆាំងផ្សេងទៀតក៏បានចូលរួមក្នុងពិធីនេះដែរ។ លោក កឹម សុខា បានមានប្រសាសន៍តាមទូរស័ព្ទកាលពីម្សិលមិញថា លោកនិងសហការីរបស់លោកបានទទួលការអញ្ជើញជាផ្លូវការឲ្យចូលរួមក្នុងពិធីនេះពីគណៈកម្មាធិការជាតិរៀបចំបុណ្យជាតិ និងអន្តរជាតិ ហើយបានទៅគោរពព្រះបរមរូបនៃព្រះបរមរតនកោដ្ឋ។

លោកបានមានប្រសាសន៍ថា “ព្រឹកនេះមន្ត្រី២៥រូបរបស់យើងដែលតំណាងឲ្យខេត្តក្រុងទាំង២៥បានទៅ គោរពព្រះបរមរូបព្រះបរមរតនកោដ្ឋ”។សំដៅដល់ការបន្តធ្វើពហិការរបស់គណបក្សលោកមិនចូលសភា ដើម្បីជំទាស់លទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រកាលពីឆ្នាំមុន លោកបានមានប្រសាសន៍ថា ” យើងចូលរួមពិធីនេះក្នុងនាមជាសមាជិកគណបក្សសង្គ្រោះជាតិ មិនមែនក្នុងនាមជាតំណាងរាស្ត្រឡើយ ពីព្រោះយើងមិនទាន់ស្បថចូលរដ្ឋសភាទេ”។

សាធារណជន ដែលចូលរួមក្នុងពិធីនេះកាលពីម្សិលមិញ មានចំនួនតិចតួច គឺមិនដូចថ្ងៃបន្ទាប់ពីសម្តេចឪ នរោត្តម សីហនុ ចូលទិវង្គត និងរយៈពេលពីរបីខែក្រោយនៅមុន និងអំឡុងព្រះរាជពិធីបុណ្យព្រះសពដ៏អធិកអធ័មនោះទេ។

លោកយាយ គង់ វ៉ាន អាយុ៧៩ឆ្នាំរស់នៅក្នុងរាជធានីភ្នំពេញ បានមានប្រសាសន៍ថា គាត់ចង់ជូនបាយទឹកដល់តាជីយាយជី។ លោកយាយលើកឡើងទៀតថា ” ខ្ញុំសប្បាយចិត្ត និងរំភើបណាស់ដែលខ្ញុំអាចចូលរួមក្នុងពិធី ពីព្រោះខ្ញុំស្រឡាញ់សម្តេចឪ។ យើងក្រៀមក្រំណាស់នៅពេលសម្តេចឪចូលទិវង្គត គ្មានអ្វីដែលយើងអាចប្រៀបធៀបនឹងការចូលទិវង្គតរបស់ព្រះអង្គបានឡើយ”។

លោក ម៉ម នាង ទីប្រឹក្សាក្រសួងធម្មការ និងសាសនា បានមានប្រសាសន៍ថា នៅថ្ងៃនេះ ព្រះបរមអដ្ឋិនឹងត្រូវដង្ហែចេញពីព្រះបរមរាជវាំងតាមបណ្តោយផ្លូវលេខ១៨៤ឆ្ពោះទៅមហាវិថីព្រះនរោត្តម និងតាមបណ្តោយមហាវិថីព្រះសីហនុ និងមហាវិថី សុធារស មុនពេលដង្ហែត្រឡប់ទៅកាន់ព្រះបរមរាជវាំងវិញ៕ សុខុម

© 2014, ខេមបូឌា ដេលី. រក្សាសិទ្ធិគ្រប់យ៉ាង។ មិនអនុញ្ញាតឲ្យដកស្រង់នូវផ្នែកណាមួយ នៃការចេញផ្សាយនេះ តាមរយៈការបោះពុម្ព តាមប្រព័ន្ធអេឡិចត្រូនិច ផ្សាយតាមរលកធាតុអាកាស សរសេរឡើងវិញ ឬចែកចាយដោយគ្មានការយល់ព្រមជាលាយលក្ខណ៍អក្សរពីចាងហ្វាងការផ្សាយឡើយ។

The post ពិធីដង្ហែព្រះបរមអដ្ឋិនៃព្រះបរមរតនកោដ្ឋចាប់ផ្តើមហើយ appeared first on ខេមបូឌា ដេលី.

នគរបាលបាននិយាយថា មន្ត្រីអាមេរិកបានសហការជាមួយនគរបាលកាលពីម្សិលមិញក្នុងការស៊ើបអង្កេតលើការសម្លាប់លោក វីលៀម ហ្គ្លិន អាយុ៤៣ឆ្នាំមកពីរដ្ឋ មីស៊ីស៊ីពី ដែលគេប្រទះឃើញស្លាប់ដោយសារការរឹតក ហើយយកវាំងននរុំយកទៅបោះចោលនៅលើគំនរសំរាមនៅជាយក្រុងភ្នំពេញកាលពីថ្ងៃពុធ។

យោងតាមលោក អេង សោភា នាយនគរបាលព្រហ្មទណ្ឌរាជធានីបានឲ្យដឹងថា ក្រុមស៊ើបអង្កេតមិនទាន់រកឃើញមូលហេតុចំពោះការធ្វើឃាតគាត់នៅឡើយទេ។ លោកបានមានប្រសាសន៍ថា “មន្ត្រីបីនាក់មកពីស្ថានទូតអាមេរិកបានសហការជាមួយនគរបាលចុះស៊ើបអង្កេតនៅថ្ងៃនេះ មានខ្មែរពីរនាក់ និងជនជាតិអាមេរិកម្នាក់ស្លៀកពាក់ស៊ីវិល។ យើងមិនទាន់ដឹងមូលហេតុនៅពីក្រោយករណីនេះនៅឡើយទេ ប៉ុន្តែយើងប្រឹងប្រែងយ៉ាងខ្លាំងដើម្បីកំណត់អត្តសញ្ញាណជនដៃដល់”។

សាកសពជនរងគ្រោះដែលទើបតែមកដល់ប្រទេសកម្ពុជាពីទីក្រុងបាងកកកាលពីពីរខែមុន និងបានធ្វើជាគ្រូបង្រៀនភាសាអង់គ្លេសនៅតាមសាលារៀនមួយចំនួនក្នុងទីក្រុងនោះ ត្រូវបានគេប្រទះឃើញនៅតាមផ្លូវលំក្នុងខណ្ឌព្រែកព្នៅ។ អ្នកភូមិបានរាយការណ៍ថា បានឃើញរ៉ឺម៉កម៉ូតូកង់បីមួយគ្រឿងនិងម៉ូតូមួយគ្រឿងបើកតាមផ្លូវលំនោះនៅម៉ោង៣រំលងអធ្រាត្រព្រឹកថ្ងៃពុធ ហើយបន្ទាប់មកឈប់នៅកន្លែងចាក់សំរាម មិនដល់បីម៉ោងផងមុនពេលគេប្រទះឃើញសាកសព។

អ្នកស្រី និតតាយ៉ា ហ្គ្លិន អាយុ៤៤ឆ្នាំ ជាប្រពន្ធជនរងគ្រោះបាននិយាយពីក្រុងបាងកកថា ថ្មីៗនេះអ្នកស្រីបានបែកគ្នាពីប្តីអ្នកស្រីដែលបានរស់នៅជាមួយគ្នាប្រាំឆ្នាំ ប៉ុន្តែនៅតែបន្តទាក់ទងគ្នាតាមទូរស័ព្ទជាទៀងទាត់រហូតដល់ទាក់ទងគ្នាលែងបានកាលពីថ្ងៃអង្គារ។

អ្នកស្រីបាននិយាយថា “គាត់បានទូរស័ព្ទមកខ្ញុំជាច្រើនដង ហើយនិយាយថា ជនជាតិខ្មែរមួយចំនួនចង់បានអ្វីមួយពីគាត់ គាត់ភ័យខ្លាច ហើយចង់ចាកចេញឲ្យបានឆាប់។ អ្នកស្រីបាននិយាយថា ពួកគាត់បាននិយាយគ្នាលើកចុងក្រោយនៅយប់ថ្ងៃច័ន្ទ ។ អ្នកស្រីបាននិយាយថា “ខ្ញុំបានប្រាប់គាត់ឲ្យធ្វើដំណើរទៅប្រទេសចិនកន្លែងដែលគាត់ធ្លាប់បានធ្វើការបានប្រាំមួយខែ។ខ្ញុំបានប្រាប់គាត់ថា ខ្ញុំនឹងចេញថ្លៃសំបុត្រយន្តហោះឲ្យគាត់”។

អ្នកស្រី ហ្គ្លិន បាននិយាយថា អាជ្ញាធរកម្ពុជានិងអាមេរិកមិនបានប្រាប់អ្នកស្រីអំពីការស្លាប់ប្តីរបស់អ្នកស្រីទេ ហើយអ្នកស្រីទើបតែដឹងរឿងនេះនៅពេលអ្នកស្រីមិនអាចទាក់ទងគាត់បាន ហើយបានស្វែងរកឈ្មោះគាត់បានប្រព័ន្ធអីុនធើណិត។ អ្នកស្រីបាននិយាយថា បន្ទាប់មក អ្នកស្រីបានទូរស័ព្ទទៅម្តាយក្មេកអ្នកស្រីនៅអាមេរិក ហើយបានប្រាប់គាត់ពីការស្លាប់កូនប្រុសរបស់គាត់។

អ្នកស្រី ហ្គ្លិន បាននិយាយថា ប្តីអ្នកស្រីមានបញ្ហាដោយសារការផឹកស៊ី ហើយជួនកាលគាត់ឆេវឆាវទៀតផង ប៉ុន្តែបញ្ហានេះមិនដែលធ្ងន់ធ្ងរនាំឲ្យគាត់មានបញ្ហាធំទេ តាំងពីពួកគាត់បានរៀបការមក។

អ្នកស្រីបាននិយាយថា ” ពិតមែនហើយយើងមានបញ្ហាក្នុងគ្រួសារដូចមនុស្សជាច្រើនទៀតដែរ ហើយជួនកាលគាត់បានវាយតប់នៅពេលគាត់ស្រវឹងស្រា ប៉ុន្តែខ្ញុំមិនយល់ទេថា ក្នុងរយៈពេលប្រាំឆ្នាំក្នុងទីក្រុងបាងកក បញ្ហានេះតែងតែត្រូវបានដោះស្រាយ ប៉ុន្តែក្នុងរយៈពេលពីរខែដែលគាត់ស្នាក់នៅក្នុងប្រទេសកម្ពុជា គាត់ត្រូវបានគេធ្វើឃាត”។

នៅឯផ្ទះសំណាក់ Tattoo ក្នុងខណ្ឌ៧មករា កន្លែងដែលជនរងគ្រោះបានស្នាក់នៅចាប់តាំងពីថ្ងៃទី២៥ ខែឧសភាមក អ្នកទទួលភ្ញៀវឈ្មោះ អុី មករា បាននិយាយថា នគរបាលនិង “FBI” ហើយបានចំណាយពេលបួនម៉ោងឆែកឆេរបន្ទប់ជនរងគ្រោះកាលពីម្សិលមិញបានយករបស់របររបស់គាត់ទាំងអស់ធ្វើជាភ័ស្តុតាង។

លោកបាននិយាយថា លោកមានការភ្ញាក់ផ្អើលនៅពេលដែលជនរងគ្រោះមិនត្រឡប់មកវិញនៅយប់ថ្ងៃអង្គារ ពីព្រោះជាទូទៅគាត់តែងតែរក្សាទម្លាប់របស់គាត់ ដោយចាកចេញទៅធ្វើការនៅម៉ោងប្រហែល៦និង៣០នាទីព្រឹក និងត្រឡប់មកវិញនៅពេលល្ងាច។ លោកបាននិយាយថា ” គាត់តែងតែអង្គុយម្នាក់ឯងសរសេរសៀវភៅ ឬវាយកុំព្យូទ័ររបស់គាត់ ប៉ុន្តែគាត់តែងតែត្រឡប់មកវិញរាល់យប់ សូម្បីថ្ងៃចុងសប្ដាហ៍”។

គឹម ឆឺន អាយុ២២ឆ្នាំជាអ្នកទទួលភ្ញៀវបាននិយាយថា នៅពេលមកដល់រាជធានីភ្នំពេញ លោក វីលៀម ហ្គ្លិន បានមកចុះឈ្មោះស្នាក់នៅផ្ទះសំណាក់បៃតង ស្ថិតនៅតាមផ្លូវលេខ១២៥ បន្ទាប់ពីរំលងអធ្រាត្រឈានចូលថ្ងៃទី៤ ខែឧសភា ក្រោយពីបានធ្វើដំណើរតាមរថយន្តក្រុងពីទីក្រុងបាងកក។ គាត់បាននិយាយថា ” ខ្ញុំគ្រាន់តែបាននិយាយជាមួយគាត់នៅពេលដែលគាត់មកដល់ ប៉ុន្តែនៅពេលដែលខ្ញុំឃើញគាត់ គាត់តែងនៅម្នាក់ឯង ហើយស្រវឹងស្រាញ្ឹកញាប់ ប៉ុន្តែគាត់មិនដែលបង្កបញ្ហាទេ ហើយតែងតែត្អូញត្អែរពីប្រព័ន្ធអុីនធើណិត”៕ សារុន

The post នគរបាលនិងមន្ត្រីអាមេរិកស្វែងរកតម្រុយនៅក្នុងករណីសម្លាប់គ្រូបង្រៀនជនជាតិអាមេរិក appeared first on ខេមបូឌា ដេលី.

ភាគីប្រជែងគ្នាក្នុងជម្លោះដ៏ជូរចត់កាន់តែខ្លាំងឡើងជុំវិញបញ្ហាដីនៅតំបន់បឹងកក់ ក្នុងរាជធានីភ្នំពេញ បានប្ដឹងគ្នាទៅវិញទៅមកនៅសាលាដំបូងរាជធានីភ្នំពេញកាលពីម្សិលមិញ ជុំវិញការប៉ះទង្គិចគ្នាមួយកាលពីចុងខែមុន។

ភាគីទាំងពីរ ដែលធ្លាប់តែរួបរួមគ្នាប្រឆាំងការបណ្ដេញចេញដោយបង្ខំពីសំណាក់លោក ឡាវ ម៉េងឃិន សមាជិកព្រឹទ្ធសភាគណបក្សប្រជាជនកម្ពុជា បានប៉ះទង្គិចគ្នាកាលពីថ្ងៃទី២៨ ខែមិថុនា នៅជិតដីមួយកន្លែងនៅបឹងកក់ ទីដែលកងរាជអាវុធហត្ថខណ្ឌបានចាប់ផ្ដើមការសាងសង់ទីបញ្ជាការដ្ឋានថ្មីមួយ។

ភាគីមួយ ដែលដឹកនាំដោយអ្នកស្រី ទេព វន្នី សកម្មជនប្រឆាំងការបណ្ដេញចេញ បានតវ៉ានៅកន្លែងនោះ ពីព្រោះពួកគេជឿថា វាស្ថិតនៅលើដីដែលលោកនាយករដ្ឋមន្ត្រី ហ៊ុន សែន បានទុកដោយឡែកសម្រាប់គ្រួសារអ្នកភូមិបឹងកក់កាលពីឆ្នាំ២០១១។ ភាគីម្ខាងទៀត រួមមានអតីតអ្នកបឹងកក់មួយចំនួនដែលពីមុនធ្លាប់រួបរួមគ្នា បានជួបពួកគេ(ភាគីទី១)នៅទីនោះ ហើយបានចោទថា បានដកបង្គោលសម្គាល់ដីរបស់ខ្លួននៅម្ខាងទីបញ្ជាការដ្ឋានថ្មីនោះ។

ភាគីនីមួយៗចោទគ្នាថា ចាប់ផ្ដើមធ្វើឲ្យមានការប៉ះទង្គិចគ្នា ដែលមានទាំងការរុញច្រាន គ្នា និងការចោលដុំថ្មដាក់គ្នា។ អ្នកស្រី ង៉ែត ឃុន ដែលនៅខាងអ្នកស្រី វន្នី បានដាក់ពាក្យប្ដឹងឈ្មោះ តុល ស្រីពៅ ដោយចោទគាត់ថា បានចោលដុំថ្មត្រូវក្បាលអ្នកស្រី ហើយបានទាមទារសំណង៥០លានរៀល (១២.៥០០ដុល្លារ)។

អ្នកស្រី ឃុន ដែលមានស្នាមរបួសលើចិញ្ចើមស្ដាំបាននិយាយថា “ខ្ញុំប្ដឹង តុល ស្រីពៅ ព្រោះបង្កអំពើហិង្សាដោយចេតនា។ ខ្ញុំមានភ័ស្តុតាងបង្ហាញថា នាងបានចោលដុំថ្ម។ ប្រសិនបើខ្ញុំមិនបានទទួលព័ត៌មានណាមួយពីតុលាការក្នុងពេលមួយសប្ដាហ៍ទេនោះ ខ្ញុំនឹងទៅតវ៉ានៅមុខតុលាការនេះជាថ្មីទៀត”។ អ្នកស្រី ឃុន និងអ្នកគាំទ្រប្រហែល៣០នាក់បានតវ៉ាមួយភ្លែតនៅតុលាការ ប៉ុន្តែត្រូវបានសន្តិសុខខណ្ឌរុញច្រានឲ្យទៅម្ខាងផ្លូវ។

ក្នុងពេលជាមួយគ្នានោះ អ្នកស្រី ស្រីពៅ បាននិយាយថា អ្នកស្រីក៏បានប្ដឹងអ្នកស្រី ឃុន អ្នកស្រី វន្នី និងមនុស្សពីរនាក់ផ្សេងទៀតដែរកាលពីម្សិលមិញ ដោយទាមទារសំណងប្រហែល១២.៥០០ដុល្លារពីមនុស្សម្នាក់ៗ។ អ្នកស្រីបាននិយាយថា “ខ្ញុំមានរូបថត និងស្នាមរបួសដើម្បីបង្ហាញតុលាការថា ពួកគេបានរុញច្រាន និងបានទាញខ្ញុំ”។

អ្នកស្រី ស្រីពៅ បានទទួលស្គាល់ថា អ្នកស្រីបានចោលដុំថ្មមែន ប៉ុន្តែបានបញ្ជាក់ថា វាជាការការពារខ្លួនប៉ុណ្ណោះ។ អ្នកស្រីបាននិយាយថា ” ខ្ញុុំបានចោលដុំថ្មមួយដុំ ប៉ុន្តែខ្ញុំមិនដឹងថាដុំថ្មនោះត្រូវចំ [អ្នកស្រី ឃុន] ឬយ៉ាងណាទេ។ នៅពេលនោះ គេបានឃើញ ទេព វន្នី និង [អ្នកស្រី ឃុន] ប៉ុនប៉ងវ៉ៃខ្ញុំ ដូច្នេះយើងបានចោលដុំថ្មលើពួកគេ”៕មានិត

The post ភាគីជម្លោះជូរចត់នៅបឹងកក់ប្ដឹងចោទប្រកាន់គ្នាទៅវិញទៅមក appeared first on ខេមបូឌា ដេលី.

ម្តាយក្មេងស្រីម្នាក់ដែលត្រូវថៅកែរបស់នាងធ្វើទារុណកម្ម បានដកពាក្យបណ្តឹងពីសាលាដំបូងរាជធានីភ្នំពេញវិញកាលពីម្សិលមិញ ដោយលើកឡើងថា សំណងជំងឺចិត្ត៥.០០០ដុល្លារ គឺគ្រប់គ្រាន់សម្រាប់បទល្មើសនេះ។

ក្មេងស្រីរងគ្រោះវ័យ១៧ឆ្នាំ បានរត់គេចខ្លួនពីថៅកែរបស់នាងឈ្មោះ គង់ ស៊ីណាត អាយុ៣៣ឆ្នាំកាលពីខែមីនា បន្ទាប់ពីទទួលរងការធ្វើទារុណកម្មអស់រយៈពេល១១ខែ រួមទាំងការបង្ខំឲ្យនាងស៊ីកម្អួត និងផឹកទឹកនោមខ្លួនឯងផងដែរ នេះបើយោងតាមការលើកឡើងរបស់អ្នកស្រី សន សាវី ដែលត្រូវជាម្តាយរបស់ក្មេងស្រីរងគ្រោះ។

នៅក្នុងតុលាការកាលពីម្សិលមិញ អ្នកស្រី សាវី វ័យ៤៥ឆ្នាំបាននិយាយថា អ្នកស្រីបានសម្រេចចិត្តទទួលយកការដោះស្រាយក្រៅប្រព័ន្ធតុលាការ។ គាត់និយាយថា “ខ្ញុំយល់ព្រមទទួលសំណង៥.០០០ដុល្លារពីអ្នកស្រី ស៊ីណាត ហើយពេលនេះខ្ញុំសូមដកពាក្យបណ្តឹងវិញ។

កូនស្រីរបស់អ្នកស្រី សាវី អះអាងថា នាងត្រូវគេវាយដំនឹងរំពាត់បែកឈាម ឲ្យនាងផឹកប្រេងម៉ាស៊ីន និងបង្ខំឲ្យនាងស៊ីសំរាមអំឡុងរយៈពេល១១ខែ ដែលនាងធ្វើការនៅកន្លែងជួសជុលម៉ូតូរបស់អ្នកស្រី ស៊ីណាត ក្នុងខណ្ឌសែនសុខ។

លោក កាយ វិសាល មេធាវីរបស់អ្នកស្រី ស៊ីណាត បានប្រាប់តុលាការថា កូនក្តីរបស់លោកគ្រាន់តែទះកំផ្លៀង និងខោកក្បាលនាងយូរៗម្តងប៉ុណ្ណោះ ប៉ុន្តែ អះអាងថា ” គ្មានការធ្វើទារុណកម្ម” ឡើយ។ លោកបានមានប្រសាសន៍បន្តទៀតថា ជនរងគ្រោះត្រូវគេវាយដំតែនៅពេលនាងបង្កបញ្ហាក្នុងចំណោមកម្មករប្រាំមួយនាក់ទៀតរបស់អ្នកស្រី ស៊ីណាត ប៉ុណ្ណោះ។

និយាយពីការសម្រេចចិត្តរបស់អ្នកស្រី សាវី ដើម្បីទទួលសំណងជំងឺចិត្ត លោក វិសាល បានស្នើសុំឲ្យតុលាការឈប់បន្តរឿងក្តីប្រឆាំងចុងចោទ។ លោកមានប្រសាសន៍ថា “ ដោយសារតែជនរងគ្រោះបានដកពាក្យបណ្តឹងរបស់ខ្លួនហើយនោះ ខ្ញុំស្នើសុំឲ្យតុលាការដកការចោទប្រកាន់ និងដោះលែងកូនក្តីរបស់ខ្ញុំ”។

ទោះជាយ៉ាងណា លោកស្រី ស៊ឺ វណ្ណនី ព្រះរាជអាជ្ញារងអមសាលាដំបូងរាជធានីបានថ្លែងទៅកាន់ចៅក្រមជំនុំជម្រះ ឃី ឆៃ ថា លោកស្រីនឹងបន្តសំណុំរឿងនេះទៀត។ លោកស្រីមានប្រសាសន៍ថា សក្ខីកម្មរបស់ជនរងគ្រោះនិងកំណត់ហេតុរបស់នគរបាលស្តីពីពេលដែលជនរងគ្រោះរត់ភៀសខ្លួន គឺគ្រប់គ្រាន់សម្រាប់ឲ្យលោកស្រីបន្តសំណុំរឿងនេះ។

លោកស្រីបានមានប្រសាសន៍ថា ” អយ្យការនៅតែរក្សាទុកការចោទប្រកាន់លើអ្នកស្រី ស៊ីណាត ទោះបីជាជនរងគ្រោះដកពាក្យបណ្តឹងក៏ដោយ”។ ព្រះរាជអាជ្ញារងបានមានប្រសាសន៍ថា លោកស្រីនឹងបន្តធ្វើការចោទប្រកាន់តាមមាត្រា២១៧នៃក្រមព្រហ្មទណ្ឌ ដែលចែងថា ការប្រើអំពើហិង្សាដោយចេតនា ត្រូវមានទោសជាប់ពន្ធនាគារពីមួយឆ្នាំទៅបីឆ្នាំ និងពិន័យជាប្រាក់ចន្លោះពី៥០០ដុល្លារ ដល់១.៥០០ដុល្លារ។

នៅពេលក្មេងស្រីរងគ្រោះនេះបានរត់ភៀសខ្លួនចេញពីផ្ទះ និងកន្លែងជួសជុលមូ៉តូរបស់ថៅកែនាងលើកដំបូងកាលពីខែមីនា នាងត្រូវបានមជ្ឈមណ្ឌលកម្ពុជាដើម្បីការពារសិទ្ធិកុមារទទួលឲ្យស្នាក់នៅ។ ពេលនេះនាងកំពុងស្នាក់នៅមជ្ឈមណ្ឌលនេះនៅឡើយ ហើយកាលពីម្សិលមិញ លោក ង៉ែត ធី នាយកប្រតិបត្តិមជ្ឈមណ្ឌលនេះបានមានប្រសាសន៍ថា លោកនឹងឃ្លាំមើលសំណុំរឿងរបស់អ្នកស្រី ស៊ីណាត ដើម្បីធានាថា តុលាការគោរពតាមច្បាប់ ឬយ៉ាងណា។

លោក ង៉ែត ធី បានមានប្រសាសន៍ទៀតថា ខណៈពេលចុងចោទជាច្រើនដែលប្រឈមមុខចំពោះតុលាការ តែងតែបង់ប្រាក់ដើម្បីគេចផុតពីការចោទប្រកាន់ផ្លូវការ លោកនឹងជំរុញឲ្យអ្នកស្រី ស៊ីណាត ចូលពន្ធនាគារ បូកបន្ថែមពីលើសំណងជំងឺចិត្ត៥.០០០ដុល្លារដែលគាត់យល់ព្រមបង់។

លោកមានប្រសាសន៍ទៀតថា “នេះគឺជាបញ្ហាមួយក្នុងចំណោមបញ្ហាអនុវត្តច្បាប់កម្ពុជា។ ពេលខ្លះព្រះរាជអាជ្ញាគិតថា ជនសង្ស័យបានបង់ប្រាក់៥.០០០ដុល្លាររួចមកហើយ ដូច្នេះពួកគេមិនចាំបាច់បន្តសំណុំរឿងនេះទៀតទេ។ វាជាការទទួលខុសត្រូវរបស់យើងដើម្បីធ្វើឲ្យប្រាកដថា ព្រះរាជអាជ្ញាបន្តសំណុំរឿងនេះ ហើយជនសង្ស័យត្រូវជាប់ពន្ធនាគារយោងតាមច្បាប់របស់កម្ពុជា”។ ចៅក្រម ឃី ឆៃ បានមានប្រសាសន៍ថា សាលក្រមនឹងត្រូវសម្រេចប្រកាសនៅថ្ងៃទី១ ខែកញ្ញា៕ សុខុម

(រាយការណ៍បន្ថែមដោយ MattBlomberg)

The post ម្តាយក្មេងស្រីដែលថៅកែធ្វើទារុណកម្ម ដកពាក្យបណ្តឹងដោយសារសំណង៥.០០០ដុល្លារ appeared first on ខេមបូឌា ដេលី.

កាលពីម្សិលមិញ លោក សុរិយា ស៊ូបេឌី ប្រេសិតសិទ្ធិមនុស្សអង្គការសហប្រជាជាតិបានអំពាវនាវឲ្យក្រុមហ៊ុន KDCInternational ដែលគ្រប់គ្រងដោយលោកស្រី ជា ខេង ជាភរិយារបស់លោក ស៊ុយ សែម រដ្ឋមន្ត្រីក្រសួងរ៉ែ និងថាមពល ផ្អាកការអភិវឌ្ឍរបស់ខ្លួនលើដីមានជម្លោះ រហូតដល់មានដំណោះស្រាយជាមួយក្រុមអ្នកភូមិ ដែលអះអាងសិទ្ធិកាន់កាប់ដីនោះ។

ការថ្លែងរបស់លោកបានធ្វើឡើង បន្ទាប់ពីមានភាពតានតឹងកាន់តែខ្លាំងឡើងរយៈពេលប៉ុន្មានថ្ងៃនៅកន្លែងមានជម្លោះក្នុងខេត្តកំពង់ឆ្នាំង ដែលមានទាំងការប៉ះទង្គិចគ្នារវាងកម្មករ អ្នកភូមិ និងនគរបាលផងដែរ។ ទោះជាដូចនេះក្តី ក្រុមហ៊ុន ខេឌីស៊ី បានបន្តផែនការសង់របងលើដីនោះដដែល។

លោក ស៊ូបេឌី បានឲ្យដឹងក្នុងសេចក្តីថ្លែងការណ៍ថា ” ឥឡូវនេះមានរយៈពេលជាង១០ឆ្នាំហើយ សហគមន៍មូលដ្ឋានបាននិងកំពុងពាក់ព័ន្ធក្នុងជម្លោះជុំវិញដីទំនាស់ ហើយពាក្យបណ្តឹងដែលពួកគេបានស្វះស្វែងដាក់នៅតុលាការជំទាស់នឹងអាជ្ញាធរ ហើយនឹងក្រុមហ៊ុន KDCInternational ពីបទចោទការបំភិតបំភ័យ ការប្រើអំពើហិង្សា និងការបាត់បង់ដី នៅតែមិនទាន់ដោះស្រាយនៅឡើយ”។

លោកបានមានប្រសាសន៍ថា ” ខ្ញុំអំពាវនាវឲ្យក្រុមហ៊ុន KDCInternational ផ្អាកការអភិវឌ្ឍលើដីមានជម្លោះជាបន្ទាន់ រហូតដល់ការទាមទារទាំងអស់ ដោយគ្រួសារនីមួយៗ ត្រូវបានវាយតម្លៃត្រឹមត្រូវដោយស្ថាប័នឯករាជ្យតាមវិធីត្រឹមត្រូវ និងតម្លាភាព”៕មានិត

The post លោក ស៊ូបេឌី អំពាវនាវឲ្យក្រុមហ៊ុន ខេឌីស៊ី ផ្អាកការអភិវឌ្ឍ appeared first on ខេមបូឌា ដេលី.

កាលពីម្សិលមិញ មន្ត្រីក្រសួងវប្បធម៌ និងវិចិត្រសិល្បៈបានចុះហត្ថលេខាលើអនុស្សរណៈនៃការយោគយល់គ្នាជាមួយសាលាក្ដីខ្មែរក្រហមជុំវិញការសាងសង់ស្តូបរំឭកវិញ្ញាណក្ខន្ធដល់ជនរងគ្រោះដែលបានស្លាប់ក្នុងរបបខ្មែរក្រហម។ stupa

ស្តូបដែលត្រូវចំណាយទឹកប្រាក់៧៧០.០០០ដុល្លារ មានកម្ពស់៥ម៉ែត្រ និងត្រូវបានផ្ដល់មូលនិធិមួយចំណែកធំដោយរដ្ឋាភិបាលអាល្លឺម៉ង់នោះ នឹងត្រូវសាងសង់នៅលើដីរាងចតុកោណនៅកាច់ជ្រុងភាគឦសាននៃសារមន្ទីរទួលស្លែង ដែលធ្លាប់មានស្តូបឈើនៅទីនោះពីមុន។នេះគឺជាគម្រោងសាងសង់ស្តូបរំឭកវិញ្ញាណក្ខន្ធក្រៅប្រព័ន្ធតុលាការ មានន័យថា ស្តូបនេះសាងសង់ឡើងសម្រាប់ជនរងគ្រោះទាំងអស់ក្នុងរបបខ្មែរក្រហម មិនមែនសម្រាប់តែដើមបណ្ដឹងរដ្ឋប្បវេណីនៅសាលាក្ដីឡើយ។

ថ្លែងនៅពិធីមួយនៅឯសារមន្ទីរពន្ធនាគារនេះ លោក Joachim Baronvon Marshall ឯកអគ្គរដ្ឋទូតអាល្លឺម៉ង់បានមានប្រសាសន៍ថា ការធ្វើដំណើរទៅកាន់ជំរំធ្វើទារុណកម្មនៅអាល្លឺម៉ង់បានធ្វើឲ្យលោកមានអារម្មណ៍មិនល្អដូចគ្នាទោះជាលោកបានមកទីនេះហើយក្តី”។ លោកបានមានប្រសាសន៍ថា ” ស្តូបនេះគឺជាសំណងជានិមិត្តរូបសម្រាប់ជនរងគ្រោះ និងសាក្សីក្នុងរបបខ្មែរក្រហម”។

លោកបានបន្ថែមថា “ការសរសេរឈ្មោះជនរងគ្រោះនៅក្នុងក្រាំងមាសគ្មាននរណាចាំទេ ប៉ុន្តែប្រសិនបើយើងដាក់ឈ្មោះទាំងនេះជារូបថតនៅក្នុងសារមន្ទីរ វាធ្វើឲ្យយើងនឹកឃើញថា របបប្រល័យពូជសាសន៍មិនមែនជាអព្ភូតហេតុអរូបីឡើយ ប៉ុន្តែវាជារឿងពិតដែលមនុស្សគ្រប់រូបនិងជនរងគ្រោះទាំងអស់បានជួបប្រទះ។

លោក ក្រាញ់ តូនី ប្រធានការិយាល័យរដ្ឋបាលស្ដីទីសាលាក្ដីបានលើកឡើងនៅពេលថ្លែងសុន្ទរកថាថា ស្តូបថ្មីនេះ នឹងធ្វើជាឧបករណ៍សិក្សាសម្រាប់មនុស្សជំនាន់ក្រោយចងចាំ និងទប់ស្កាត់កុំឲ្យរបបខ្មៅងងឹតនេះវិលត្រឡប់មកវិញ”។ ទោះជាយ៉ាងណា លោក ប៊ូ ម៉េង អាយុ៧៣ឆ្នាំ ជាអ្នកនៅរស់ពីគុកទួលស្លែងបានមានប្រសាសន៍ថា លោកគួរតែទទួលបានសំណងហិរញ្ញវត្ថុសម្រាប់ការស្លាប់ប្រពន្ធរបស់លោកនៅក្នុងរបប ប៉ុល ពត។

លោកបានមានប្រសាសន៍ថា ” ខ្ញុំចង់បានសំណងពីប្រទេសផ្ដល់ជំនួយ និងពីអង្គជំនុំជម្រះវិសាមញ្ញក្នុងតុលាការកម្ពុជា”។ លោកបានបន្ថែមថា ខ្ញុំចង់បានសំណងជាសាច់ប្រាក់សុទ្ធ គឺ៥.០០០ដុល្លារគ្រប់គ្រាន់ហើយ៕សារុន

រាយការណ៍បន្ថែមដោយ ផន បុប្ផា )

The post ក្រសួងវប្បធម៌និងវិចិត្រសិល្បៈចុះអនុស្សរណៈជាមួយសាលាក្តីខ្មែរក្រហមអំពីការសាងសង់ស្តូបរំឭកវិញ្ញាណក្ខន្ធ appeared first on ខេមបូឌា ដេលី.

មន្ត្រីរដ្ឋាភិបាលជាន់ខ្ពស់មួយរូបបានចោទប្រកាន់អាជ្ញាធរពាក់ព័ន្ធនឹងការស្ថាបនា និងការជួសជុលផ្លូវថ្នល់ទូទាំងប្រទេសថា បានកឹបកេងមួយចំណែកធំនៃថវិកាសម្រាប់ស្ថាបនា និងជួសជុលផ្លូវ។

កាលពីថ្ងៃពុធ លោក ញឹម វណ្ណដា អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ បានរិះគន់បន្ថែមពីលើការរិះគន់យ៉ាងច្រើននៅក្នុងជួរគណបក្សប្រជាជនកម្ពុជាកំពុងកាន់អំណាច ចំពោះសភាពផ្លូវថ្នល់ទូទាំងប្រទេស។

ថ្លែងនៅឯសិក្ខាសាលាមួយរៀបចំឡើងសម្រាប់គម្រោងដែលមានឈ្មោះថា KetsanaEmergency Reconstructionand Rehabilitation Project របស់ធនាគារពិភពលោក លោក ញឹម វណ្ណដា បានមានប្រសាសន៍ថា ថវិកាផ្លូវថ្នល់រហូតដល់៦០ភាគរយត្រូវបានមន្ត្រីទទួលបន្ទុកស្ថាបនា និងជួសជុលផ្លូវថ្នល់កឹបកេង ហើយបានអំពាវនាវឲ្យបញ្ឈប់ការប្រើប្រាស់ថវិកាមិនត្រឹមត្រូវ។

ដើម្បីបញ្ជាក់អំពីចំណុចដែលលោកបានចោទប្រកាន់ លោក ញឹម វណ្ណដា បានគូសបញ្ជាក់ពីគុណភាពអន់នៃផ្លូវថ្នល់ ដែលត្រូវបានស្ថាបនាក្រោមការគ្រប់គ្រងរបស់លោក កែប ជុតិមា អតីតអភិបាលរាជធានី ដោយប្រើឃ្លាថា ” ផ្លូវធ្វើជាប់” ។ លោកមានប្រសាសន៍ថា ” ប្រសិនបើ អស់លោកសួរថា ‘ ប្រទេសណាធ្វើផ្លូវជាប់ជាងគេ?’ គេនឹងឆ្លើយថា សហរដ្ឋអាមេរិក ឬជប៉ុន។ ប៉ុន្តែ មានក្មេងម្នាក់បដិសេធចម្លើយនេះ ហើយបានឆ្លើយថា ‘គឺប្រទេសកម្ពុជា! ការស្ថាបនាផ្លូវតែមួយខ្សែនៅកម្ពុជា គឺមិនចេះចប់ទេ!”។

លោក ញឹម វណ្ណដា ក៏បានមានប្រសាសន៍ផងដែរថា ទោះបីជាការស្ថាបនាផ្លូវជាតិប្រវែងមួយគីឡូម៉ែត្រ ចំណាយអស់ជាង១លានដុល្លារក្តី ក៏ផ្លូវទាំងនេះមិនដែលជាប់បានយូរ ដោយសារតែមន្ត្រីពាក់ព័ន្ធនឹងការស្ថាបនាផ្លូវកឹបកេងយ៉ាងច្រើននូវថវិកាទុកសម្រាប់គម្រោងទាំងនោះ។

ការអត្ថាធិប្បាយរបស់លោកធ្វើឡើងបន្ទាប់ពីការលើកឡើងពីក្តីបារម្ភអំពីសភាពអន់ទៅៗនៃផ្លូវថ្នល់ទូទាំងប្រទេសអំឡុងកិច្ចពិភាក្សាដេញដោលស្តីពីច្បាប់ផ្លូវថ្នល់ថ្មីមួយនៅក្នុងរដ្ឋសភាកាលពីខែមេសា។

លោក ឈាង វុន តំណាងរាស្ត្រមកពីគណបក្សប្រជាជនកម្ពុជាបានរិះគន់ចំពោះស្ថានភាពផ្លូវជាតិលេខ៦អា ដែលមិនទាន់ក្រាលកៅស៊ូ ខណៈដែលឧបនាយករដ្ឋមន្ត្រី សុខ អាន ចោទសួរអំពីអសមត្ថភាពរបស់រដ្ឋាភិបាលក្នុងការគ្រប់គ្រងទម្ងន់ផ្ទុកដឹកជញ្ជូនតាមផ្លូវនានាទូទាំងប្រទេស។

កាលពីខែមីនា លោក ប៉ា សុជាតិវង្ស អភិបាលរាជធានីភ្នំពេញបានមានប្រសាសន៍នៅពេលនោះថា លោកជឿថា ថវិកាទុកសម្រាប់ជួសជុលផ្លូវថ្នល់ក្នុងក្រុង ត្រូវបានប្រើប្រាស់មិនត្រឹមត្រូវ។លោកមានប្រសាសន៍ទៀតថា ” ពេលចាក់ក្រាស់ស៊ីស្តើង ពេលចាក់ស្តើងស៊ីក្រាស់”។

លោក សំ ពិសិដ្ឋ ប្រធានមន្ទីរសាធារណការ និងដឹកជញ្ជូន និងលោក ឡុង ឌីម៉ង់ អ្នកនាំពាក្យសាលារាជធានីបដិសេធមិនធ្វើអត្ថាធិប្បាយអំពីការលើកឡើងរបស់លោក ញឹម វណ្ណដា ទេ៕សុខុម

The post មន្ត្រីជាន់ខ្ពស់គណបក្សប្រជាជនចោទថា មានការកឹបកេងយ៉ាងរាលដាលនូវថវិកាស្ថាបនាផ្លូវ appeared first on ខេមបូឌា ដេលី.

កម្មករប្រហែល៤០០នាក់បានធ្វើការតវ៉ា និងដុតកង់ឡាននៅខាងក្រៅរោងចក្រកាត់ដេរអូសេអង់ ស្ថិតក្នុងខណ្ឌពោធិ៍សែនជ័យ រាជធានីភ្នំពេញកាលពីម្សិលមិញ បន្ទាប់ពីរោងចក្រនេះមិនបានធ្វើតាមសេចក្ដីសម្រេចរបស់ក្រុមប្រឹក្សាអាជ្ញាកណ្ដាលកាលពីថ្ងៃពុធ ឲ្យបើកប្រាក់ដល់កម្មករក្នុងម្នាក់ៗ១២០ដុល្លារ ជាប្រាក់សម្រាប់ពេលឈប់សម្រាកពីការងារដោយសាររោងចក្រនេះបានផ្អាកប្រតិបត្តិការ។

នៅម៉ោងប្រហែល៩ព្រឹកកម្មករបានដុតកង់ឡានចំនួន១០ ហើយបានបិទផ្លូវទៅកាន់រោងចក្ររយៈពេលពីរម៉ោងមុនពេលសម្រេចពន្យារពេលតវ៉ារហូតដល់ថ្ងៃច័ន្ទ ដែលនៅពេលនោះ ពួកគេមានគម្រោងហែក្បួនពីរោងចក្រទៅកាន់ក្រសួងការងារ។

ឈ្មោះ ស៊ិន សុភ័ណណារិន អាយុ៥១ឆ្នាំ ជាកម្មករនៅរោងចក្រកាត់ដេរអូសេអង់ ដែលបានចូលរួមការតវ៉ាបាននិយាយថា ” ខ្ញុំខឹងខ្លាំងណាស់។ ខ្ញុំត្រូវការប្រាក់ដើម្បីបង់ថ្លៃឈ្នួលផ្ទះ និងចំណាយលើអ្វីៗផ្សេងទៀត។ ខ្ញុំបានរង់ចាំបើកប្រាក់ពីរោងចក្ររយៈពេលយូរមកហើយ”។

ឈ្មោះ ឃុត ម៉ាលី ជាអ្នកតវ៉ាម្នាក់ទៀតបាននិយាយថា ” ប្រសិនបើយើងមិនដុតកង់ឡានទេនោះ ស្ថាប័នពាក់ព័ន្ធនឹងមិនយកចិត្តទុកដាក់ចំពោះពួកយើងឡើយ។គ្រាន់តែដុតកង់ឡានវាទាន់មិនគ្រប់គ្រាន់ទេ យើងត្រូវហែក្បួនចូលក្នុងក្រុងទៀត”។

កម្មករបានធ្វើការតវ៉ានៅរោងចក្រនេះ ដោយសារអ្នកគ្រប់គ្រងរោងចក្រអូសេអង់ បាននិយាយកាលពីខែមុនថា រោងចក្រនឹងបើកប្រាក់ឲ្យកម្មករតែ១៥ដុល្លារប៉ុណ្ណោះ បន្ទាប់ពីផ្អាកប្រតិបត្តិការកាលពីថ្ងៃទី២៦ ខែឧសភា ដោយសារមិនមានការបញ្ជាទិញ។

កាលពីខែមុន ក្រសួងការងារបានបញ្ជូនករណីនេះទៅក្រុមប្រឹក្សាអាជ្ញាកណ្ដាល ដែលសេចក្ដីសម្រេចរបស់ខ្លួនមិនភ្ជាប់កាតព្វកិច្ចផ្លូវច្បាប់ បន្ទាប់ពីមិនមានដំណោះស្រាយ។

លោក ហួន វណ្ណា មន្ត្រីម្នាក់នៅសម្ព័ន្ធសហជីពចលនាកម្ពុជា បានមានប្រសាសន៍ថា ការតវ៉ាគឺដើម្បីរំឭករោងចក្រថា រោងចក្រមិនបានអនុវត្តតាមសេចក្ដីសម្រេចរបស់ក្រុមប្រឹក្សាអាជ្ញាកណ្ដាល។

លោកបានមានប្រសាសន៍ថា ” នេះគឺជាវិធីទី១ដើម្បីរំឭករោងចក្រ ពីព្រោះពួកគេមិនបានគោរពតាមសេចក្ដីសម្រេចរបស់ក្រុមប្រឹក្សាអាជ្ញាកណ្ដាល”។

យោងតាមលិខិតដែលចុះហត្ថលេខាដោយលោក គង់ ផលលក្ខណ៍ ប្រធានក្រុមប្រឹក្្សាអាជ្ញាកណ្ដាលមានខ្លឹមសារថា កាលពីល្ងាចថ្ងៃពុធ ក្រុមប្រឹក្សាអាជ្ញាកណ្ដាលបានសម្រេចថា រោងចក្រអូសេអង់ ត្រូវបើកប្រាក់ចំនួន១២០ដុល្លារឲ្យកម្មករណាដែលបានធ្វើការនៅរោងចក្រនេះលើសពីមួយឆ្នាំ។

លិខិតដដែលនេះលើកឡើងថា ” ក្រុមប្រឹក្សាអាជ្ញាកណ្ដាលសូមស្នើឲ្យរោងចក្របើកប្រាក់ឲ្យកម្មករ១០០ភាគរយ ដោយសារពេលផ្អាកដំណើរការនោះចាប់ពីថ្ងៃទី២៦ ខែឧសភា ដល់ថ្ងៃទី២៦ ខែមិថុនា។

កាលពីព្រឹកថ្ងៃពុធ រោងចក្រអូសេអង់ បានចេញសេចក្ដីជូនដំណឹងថា រោងចក្រនឹងបើកប្រាក់ឲ្យកម្មករណាដែលបានធ្វើការលើសពី១ឆ្នាំ តែ១០០ដុល្លារបុ៉ុណ្ណោះក្នុងម្នាក់ៗ ហើយកម្មករណាដែលបានធ្វើការក្រោម៦ខែ ចំនួន៥០ដុល្លារ។

លោក ទិត្យ សុភ័ណ ប្រធានការិយាល័យធនធានមនុស្សរោងចក្រអូសេអង់ បានមានប្រសាសន៍ថា រោងចក្រមិនមានគម្រោងបើកប្រាក់ឲ្យកម្មករលើសពី១០០ដុល្លារទេ។ លោកបានមានប្រសាសន៍ថា ” រោងចក្រនឹងមិនបើកលើសពី១០០ដុល្លារទេ…បើទោះជាក្រុមប្រឹក្សាអាជ្ញាកណ្ដាលបានចេញសេចក្ដីសម្រេចក៏ដោយ៕ សារុន

The post កម្មកររោងចក្រអូសេអង់តវ៉ាបន្ទាប់ពីរោងចក្រមិនអើពើនឹងសេចក្តីសម្រេចរបស់ក្រុមប្រឹក្សាអាជ្ញាកណ្តាល appeared first on ខេមបូឌា ដេលី.

កាលពីម្សិលមិញ លោក តុប ឈុនហេង ចៅក្រមសាលាដំបូងរាជធានីភ្នំពេញបានបង្គាប់ឲ្យមានការស៊ើបអង្កេតឡើងវិញលើករណីញុះញង់ ប្រឆាំងលោក សួន សេរីរដ្ឋា ជាអ្នកប្រឆាំងជនជាតិខ្មែរសញ្ជាតិអាមេរិកដើម្បីបង្កើនការចោទប្រកាន់ឲ្យកាន់តែធ្ងន់ថែមទៀតពីបទរៀបចំផែនការ “ផ្តួលរំលំរដ្ឋាភិបាល”។

តុលាការបានចោទប្រកាន់លោក សេរីរដ្ឋា ដែលរស់នៅសហរដ្ឋអាមេរិកពីបទញុះញង់កាលពីខែសីហាដោយបានព្យាយាមចែកផ្កាកុលាបពណ៌លឿងចំនួន១.០០០ទងឲ្យនគរបាលនិងទាហាននៅក្នុងរាជធានីភ្នំពេញជាមួយខិត្តប័ណ្ណអំពាវនាវឲ្យពួកគេ “បែរកាណុងកាំភ្លើងដាក់ជនផ្តាច់ការ” គឺសំដៅដល់លោកនាយករដ្ឋមន្ត្រី ហ៊ុន សែន។

នៅក្នុងសារណាការពារខ្លួនដែលត្រូវបានអាននៅក្នុងតុលាការអំឡុងពេលបើកសវនាការកាត់ទោសកំបាំងមុខកាលពីថ្ងៃពុធ លោក សេរីរដ្ឋា បានបដិសេធថា លោកគ្មានបំណងប្រព្រឹត្តបទឧក្រិដ្ឋទេ។

ការញុះញង់ឲ្យប្រព្រឹត្តបទឧក្រិដ្ឋមានទោសជាប់ពន្ធនាគាររហូតដល់ពីរឆ្នាំ។ កាលពីម្សិលមិញ លោកចៅក្រម ឈុនហេង បានសម្រេចមិនចេញសាលក្រមទេ ហើយផ្ទុយទៅវិញបានបញ្ជូនសំណុំរឿងនេះឲ្យមានការស៊ើបអង្កេតឡើងវិញដើម្បីចង់ដឹងថា តើបទចោទប្រកាន់នេះអាចប្តូរទៅជាបទរៀបចំផែនការផ្តួលរំលំរដ្ឋាភិបាល ដែលមានទោសជាប់ពន្ធនាគាររហូតដល់១០ឆ្នាំឬយ៉ាងណា។ លោកបានមានប្រសាសន៍ថា “បន្ទាប់ពីសវនាការកាលពីថ្ងៃពុធ តុលាការបានសម្រេចបញ្ជូនសំណុំរឿងនេះទៅឲ្យព្រះរាជអាជ្ញាស៊ើបអង្កេតឡើងវិញ។ សកម្មភាពរបស់លោក សេរីរដ្ឋា ត្រូវបានចាត់ទុកថា ជាសកម្មភាពរបស់ជនក្បត់ជាតិដែលជាបទឧក្រិដ្ឋ”។

លោក មាស ច័ន្ទពិសិដ្ឋ ព្រះរាជអាជ្ញារងបានសុំឲ្យកែប្រែបទចោទប្រកាន់នេះអំឡុងពេលបើកសវនាការកាលពីថ្ងៃពុធ។ ក្រមព្រហ្មទណ្ឌចែងថា ” អំពើរួមគំនិតក្បត់គឺជាគម្រោងដែលបង្កើតឡើងដោយមនុស្សច្រើននាក់ ដើម្បីប្រព្រឹត្តឧបឃាត កាលបើគម្រោងនេះត្រូវបានសម្ដែងចេញជារូបរាងច្បាស់លាស់ដោយអំពើជាក់ស្ដែងមួយឬច្រើន”។

ទោះជាយ៉ាងណា លោក សុក សំអឿន មេធាវីរបស់លោក សេរីរដ្ឋា បានរិះគន់សេចក្ដីសម្រេចរបស់ចៅក្រមកាលពីម្សិលមិញ។ លោកបានមានប្រសាសន៍ថា ” សេចក្ដីសម្រេចរបស់តុលាការមិនត្រឹមត្រូវនិងមិនយុត្តិធម៌សម្រាប់លោក សេរីរដ្ឋា ឡើយ ពីព្រោះតុលាការមិនអាចរកឃើញថា គាត់មានពិរុទ្ធភាពទេ។ ប្រសិនបើតុលាការមិនអាចរកឃើញថា គាត់មានពិរុទ្ធភាពនៅក្នុងករណីនេះទេនោះ តុលាការគួរលើកលែងការចោទប្រកាន់គាត់”។

លោក សុក សំអឿន បានមានប្រសាសន៍ថា កូនក្ដីរបស់លោកក៏ប្រឈមនឹងការចោទប្រកាន់ពីបទក្បត់ជាតិនៅក្នុងខេត្តបន្ទាយមានជ័យផងដែរ ចំពោះការបង្គាប់ឲ្យគេបោះពុម្ពអាវយឺតកាលពីឆ្នាំមុន ដែលមានសារណែនាំប្រជាជនកុំឲ្យទៅបោះឆ្នោតនៅក្នុងការបោះឆ្នោតជាតិ។ មនុស្សបីនាក់ដែលជាប់ពាក់ព័ន្ធនៅក្នុងរឿងនេះត្រូវបានចោទប្រកាន់ពីបទដឹកជញ្ជូនអាវយឺត និងកំពុងស្ថិតក្នុងការឃុំខ្លួនបណ្ដោះនៅឡើយ៕ សារុន

The post តុលាការព្យាយាមរកបទចោទប្រកាន់កាន់តែធ្ងន់លើលោក សួន សេរីរដ្ឋា appeared first on ខេមបូឌា ដេលី.

ប្រជាពលរដ្ឋជាង៦០នាក់ក្នុងខេត្តកណ្ដាលបានតវ៉ានឹងការដែលតុលាការសាកសួរអ្នកភូមិប្រាំពីរនាក់ ដែលបានបដិសេធមិនព្រមផ្ដិតមេដៃលើឯកសារប្រគល់ដីរបស់ពួកគាត់ទៅឲ្យឈ្មួញម្នាក់ ដែលអះអាងថា ជាដីរបស់ខ្លួន។

អ្នកស្រី លឹម គា ដែលជាអ្នករកស៊ីដីបាននិយាយថា អ្នកស្រីបានទិញដីប្រហែល១៥៥ហិកតានៅក្នុងឃុំជ្វាំង និងឃុំជ្រៃលាស់ ក្នុងស្រុកពញាឮ កាលពីឆ្នាំ១៩៩៧ ហើយបន្ទាប់មកបានលក់ដីនេះទៅឲ្យក្រុមហ៊ុនSKD ជាក្រុមហ៊ុនផលិតស្រា។ ប៉ុន្តែក្រុមហ៊ុន SKD បានបាត់បង់ដីនេះនៅពេលដែលលោកនាយករដ្ឋមន្ត្រី ហ៊ុន សែន បានបញ្ជាឲ្យប្រគល់ដីនេះទៅឲ្យអ្នកភូមិវិញកាលពីឆ្នាំ២០០៨។ អ្នកស្រី គា បាននិយាយថា អ្នកស្រីបានផ្តល់សំណងដល់ក្រុមហ៊ុនSKDចំពោះការបាត់បង់ដីនេះ ហើយគិតថា ឥឡូវនេះអ្នកស្រីជាម្ចាស់ដី។

ទោះជាយ៉ាងណា អ្នកភូមិរហូតដល់៥៨នាក់លើកឡើងថា ពួកគាត់ត្រូវបានសន្យាឲ្យតម្លៃរាប់រយដុល្លារក្នុងមួយហិកតា នៅពេលពួកគាត់បានលក់ដីនេះទៅឲ្យអតីតប្រធានភូមិម្នាក់កាលពីទសវត្សរ៍ឆ្នាំ១៩៩០ ប៉ុន្តែធ្លាប់ទទួលបានប្រាក់តិចតួចតែប៉ុណ្ណោះ។

លោក គុយ ចាន់ថន បាននិយាយថា ” យើងបានតវ៉ាដោយសន្តិវិធីដើម្បីទាមទារឲ្យតុលាការដោះលែងមនុស្សទាំងប្រាំពីរនាក់នេះ ពីព្រោះពួកគាត់គ្មានកំហុសទេ។ យើងក៏បានតវ៉ាទាមទារឲ្យតុលាការរកយុត្តិធម៌ឲ្យពួកយើងផងដែរ ពីព្រោះអ្នកភូមិដែលបានលក់ដីរបស់ខ្លួនទទួលបានលុយតិចតួចតែប៉ុណ្ណោះ”។

តុលាការបានដោះលែងមនុស្សទាំងប្រាំពីរនាក់នេះវិញហើយបន្ទាប់ពីការសាកសួររួច។ ប៉ុន្តែអ្នកស្រី គា បានអះអាងថា ដីនេះជាដីរបស់អ្នកស្រី។ អ្នកស្រីបាននិយាយថា “ខ្ញុំបានផ្តល់ប្រាក់ដល់អ្នកភូមិរួចហើយ។ ខ្ញុំបានដាក់ពាក្យបណ្ដឹងប្ដឹងមនុស្សប្រាំពីរនាក់មុន ហើយខ្ញុំនឹងប្ដឹងមនុស្សផ្សេងទៀតដើម្បីឲ្យតុលាការចាប់ពួកគាត់ដាក់គុក ពីព្រោះពួកគាត់មិនព្រមផ្ដិតមេដៃឲ្យខ្ញុំ”។

អ្នកស្រី គា បាននិយាយថា អ្នកស្រីបានទិញដីនេះតម្លៃ៤០០ដុល្លារក្នុងមួយហិកតាកាលពីឆ្នាំ១៩៩៧ ហើយបន្ទាប់មកបានលក់ដីនេះបន្តទៅឲ្យក្រុមហ៊ុនSKD ក្នុងតម្លៃ៨០០ដុល្លារក្នុងមួយហិកតា។

បន្ទាប់ពីលោក ហ៊ុន សែន បានបញ្ជាឲ្យប្រគល់ដីនេះទៅឲ្យអ្នកភូមិវិញ អ្នកស្រី គា បានអះអាងកាលពីម្សិលមិញថា អ្នកស្រីបានផ្ដល់សំណងដល់ក្រុមហ៊ុន ប៉ុន្តែបានបដិសេធមិននិយាយថា ចំនួនប៉ុន្មាននោះទេ។

អ្នកស្រីបានបង្វែរសំណួរបន្ថែមទៅលោក គឹម ម៉េងអា៊ង សមាជិកម្នាក់នៅអាជ្ញាធរជាតិដោះស្រាយវិវាទដីធ្លី ដែលអ្នកស្រីបានអះអាងថា បានរៀបចំឯកសារដែលបង្ហាញថា អ្នកស្រីមានសិទ្ធិកាន់កាប់ដីនេះ។ លោក ម៉េងអ៊ាង បានបដិសេធមិនធ្វើអត្ថាធិប្បាយទេ៕ សារុន

The post អ្នកភូមិខេត្តកណ្តាលបដិសេធមិនព្រមបោះបង់ដី ហើយតវ៉ានឹងការសាកសួររបស់តុលាការ appeared first on ខេមបូឌា ដេលី.

យោងតាមនគរបាលបានឲ្យដឹងថា សពលោក ចាន់ សុផល នាយប៉ុស្តិ៍នគរបាលឃុំស្វាយពោធិ៍ ដែលបានបាត់ខ្លួនពេលចុះបំពេញបេសកកម្មតែម្នាក់ឯងដើម្បីតាមរកចាប់ពួកអ្នកនេសាទខុសច្បាប់ក្នុងតំបន់នោះ ត្រូវបានក្រុមប្រជាកសិករក្នុងមូលដ្ឋានប្រទះឃើញកាលពីថ្ងៃសុក្រ នៅជាយតំបន់ដីសើម ទីដែលលោកទំនងជាបានធ្វើការសើុបអង្កេត។

បន្ទាប់ពីលោក ចាន់ សុផល បានបាត់ខ្លួននៅថ្ងៃទី២១ ខែមិថុនា អ្នកភូមិរាប់រយនាក់បានចូលរួមជាមួយនគរបាលក្នុងការស្វែងរកនាយប៉ុស្តិ៍រូបនេះ ដោយស្នងការខេត្តកំពង់ចាមផ្តល់ប្រាក់រង្វាន់២៥០ដុល្លារដល់នរណាដែលបានរកឃើញសពេនះ។

លោក ហឹម រិន មន្ត្រីនគរបាលឃុំ បាននិយាយថា សពលោក ចាន់ សុផល ស្អុយរលួយត្រូវបានប្រទះឃើញដេកផ្កាប់មុខលើតំបន់ដីស្ងួតក្បែរវាលភក់មួយកន្លែង ទីដែលគេដឹងថា មានការនេសាទខុសច្បាប់ច្រើននៅទីនោះ។ លោកបាននិយាយថា កសិករមួយក្រុមបានប្រទះឃើញសពនេះ ដោយជួនពេលរៀបចំដីធ្វើស្រែ។ លោកបានបន្ថែមទៀតថា ” កសិករទាំងនោះបានប្រទះឃើញមួកនិងក្រមារបស់គាត់។ ពេលពួកគេដើរប្រហែល៣០មែ៉ត្រទៅមុខទៀត…ពួកគេបានប្រទះឃើញសពនេះនៅលើដី”។ នគរបាលខេត្តបានកំណត់ថា លោក ចាន់ សុផល ត្រូវបានគេធ្វើឃាត។

លោក បែន រ័ត្ន ស្នងការនគរបាលខេត្តកំពង់ចាមបានមានប្រសាសន៍ថា ” យើងបានធ្វើការសន្និដ្ឋានថា នេះជារឿងឃាតកម្ម។ គាត់ត្រូវបានគេកាប់ចំក្បាលជាច្រើនពូថៅ”។ លោក បែន រ័ត្ន បានមានប្រសាសន៍ទៀតថា គេអាចចំណាំសពរបស់លោក ចាន់ សុផល បានដោយសារសម្លៀកបំពាក់របស់គាត់ប៉ុណ្ណោះ ប៉ុន្តែ ទូរស័ព្ទ និងអាយកូម របស់គាត់នៅជាប់ខ្លួនរបស់គាត់នៅឡើយ។

លោកបានបន្ថែមទៀតថា នគរបាលជឿថា មនុស្សច្រើននាក់បានពាក់ព័ន្ធក្នុងឃាតកម្មនេះ ព្រោះស្នាមរបួសជាច្រើនធ្វើឲ្យសន្និដ្ឋានបានថា មនុស្សម្នាក់ចាប់លោក ចាន់ សុផល ឯម្នាក់ទៀតកាប់គាត់។ លោកស្នងការ បែន រ័ត្ន បានមានប្រសាសន៍ថា ” ប្រាកដជាមានមនុស្សលើសពីម្នាក់។ យើងកំពុងពិនិត្យករណីនេះ ដើម្បីស្វែងរកឧក្រិដ្ឋជនមកផ្តន្ទាទោស”។ លោក បែន រ័ត្ន បានឲ្យដឹងទៀតថា លោកនឹងផ្តល់ប្រាក់២៥០ដុល្លារ ដែលបានសន្យានោះទៅឲ្យគ្រួសារដែលបានរកឃើញសពនេះ បន្ទាប់ពីបុណ្យសពលោក ចាន់ សុផល រួច។

យោងតាមលោក រិន មន្ត្រីនគរបាលឃុំបានឲ្យដឹងថា សពរបស់អតីតនាយប៉ុស្តិ៍រូបនេះត្រូវបានបញ្ជូនទៅឲ្យភរិយារបស់លោកហើយ ដើម្បីរៀបចំធ្វើបុណ្យនៅថ្ងៃសៅរ៍នេះ។ លោកបាននិយាយថា ” ខ្ញុំនិងនគរបាលខេត្ត ហើយនិងនគរបាលស្រុក នឹងទៅចូលរួមពិធីបុណ្យសពនេះ។ យ៉ាងហោចណាស់ យើងអាចឃើញសពគាត់ជាចុងក្រោយដែរ”៕មានិត

The post កសិករប្រទះឃើញសពនាយប៉ុស្តិ៍ដែលបាត់ខ្លួននៅខេត្តកំពង់ចាម appeared first on ខេមបូឌា ដេលី.

កាលពីថ្ងៃសុក្រ សាលាដំបូងខេត្តមណ្ឌលគិរី បានចោទមន្ត្រីនគរបាលម្នាក់ពីបទមនុស្សឃាតដោយចេតនា ជាការចោទប្រកាន់ថ្មីបំផុតក្នុងនិន្នាការនៃជម្លោះហិង្សាកើនឡើងជុំវិញឈើប្រណីតនៅក្នុងខេត្តនេះ។

លោក ផេង សុខេង ដែលត្រូវគេបញ្ជូនទៅតំបន់ព្រៃការពារស្រុកកែវសីមា ដើម្បីបង្ក្រាបក្រុមអ្នកកាប់ឈើខុសច្បាប់ កាលពីយប់ថ្ងៃពុធ បានបាញ់លើរថយន្តមួយគ្រឿង ដែលគេសង្ស័យថា ដឹកឈើប្រណីត បណ្តាលឲ្យស្លាប់បុរសម្នាក់ និងរបួសធ្ងន់ម្នាក់ទៀត។

លោក ឃុត សុភៀង ព្រះរាជអាជ្ញាអមសាលាដំបូងខេត្តបានមានប្រសាសន៍ថា ” ព្រះរាជអាជ្ញាបានសាកសួរគាត់ ហើយគាត់នឹងត្រូវបញ្ជូនទៅពន្ធនាគារនៅថ្ងៃនេះ។ គាត់ជាប់ចោទពីបទមនុស្សឃាតដោយចេតនា”។

លោក វា៉ន់ សុផានិត អាយុ២៥ឆ្នាំ ជាអ្នកបើកបររថយន្តនោះបានស្លាប់។លោក ផាត ស៊ូកានី អាយុ២២ឆ្នាំ ជាកូនចុងរបស់មេបញ្ជាការរងកងរាជអាវុធហត្ថខេត្ត បានត្រូវគេបាញ់ចំដងខ្លួន ហើយត្រូវគេបញ្ជូនទៅព្យាបាលនៅប្រទេសវៀតណាម។

លោក សុខេង ស្ថិតក្នុងក្រុមនគរបាល ទាហាន និងមន្ត្រីរដ្ឋបាលព្រៃឈើ ដែលកំពុងល្បាតតំបន់ព្រៃការពារនោះ ស្រាប់តែរថយន្តតូយូ៉តាកាមរីមួយគ្រឿងបើកសំដៅមក។

លោក ញែ៉ម វណ្ណី ស្នងការនគរបាលខេត្ត បានមានប្រសាសន៍ថា ក្រុមនេះបានព្យាយាមឃាត់រថយន្តនោះ ដើម្បីឆែករកឈើខុសច្បាប់ ហើយថា ពេលដែលរថយន្តមិនស្តាប់សញ្ញាឃាត់ឲ្យឈប់ លោក សុខេង បានបាញ់ព្រមានមួយគ្រាប់ទៅលើ មុនពេលបាញ់គ្រាប់ទី២ ដែលប្លាតចេញពីលោក សូ៊កានី ត្រូវ វា៉ន់ សុផានិត ស្លាប់។ គេមិនបានរកឃើញឈើក្នុងរថយន្តនោះទេ។

លោក សិុន វា៉ន់វុធ អភិបាលស្រុកកែវសីមា ដែលបានឃើញការប៉ះទង្គិចគ្នាជាច្រើនកើតឡើងជុំវិញរឿងឈើប្រណីតក្នុងពេលប៉ុន្មានខែថ្មីៗនេះ បានមានប្រសាសន៍ថា លោកសុខេង មិនធ្វើតាមការណែនាំពេលបំពេញភារកិច្ចជាមន្ត្រីនគរបាលទេ ហើយគួរត្រូវទទួលខុសត្រូវ។ លោក វ៉ាន់វុធ បាននិយាយអំពីការបាញ់នេះថា ” វាផ្ទុយនឹងការអនុវត្តច្បាប់។ ច្បាប់មិនអនុញ្ញាតឲ្យសម្លាប់មនុស្សទេពេលពួកគេប្រព្រឹត្តបទល្មើស”។ លោកបានបន្ថែមថា “យើងមិនអាចបិទភ្នែករបស់យើង ចំពោះជនប្រព្រឹត្តបទឧក្រិដ្ឋបានឡើយ។ នេះជាមេរៀនមួយសម្រាប់អាជ្ញាធរទាំងអស់”។

លោក វ៉ាន់វុធ ខ្លួនឯងធ្លាប់បានទទួលរងអំពើហិង្សាពីក្រុមមន្ត្រីដែលពាក់ព័ន្ធក្នុងការរកស៊ីកាប់ឈើ។ កាលពីខែឧសភា លោក ស៊ូ ម៉ារិទ្ធ ជាមន្ត្រីកងរាជអាវុធហត្ថម្នាក់ តាមចោទថា បានយកកាំភ្លើងភ្ជង់ក្បាលរបស់លោក អំឡុងពេលដើរល្បាតមុនថ្ងៃរះ។ ក្រុមល្បាតអំឡុងហេតុការណ៍នោះ បានឃាត់ និងឆែកឆេររថយន្តលុចស៊ីសមួយគ្រឿង ហើយបានរកឃើញឈើនាងនួន ១៦កំណាត់។

ក្រោយនោះបន្តិច រថយន្ត SUV ទី២មួយគ្រឿងបានមកដល់។ លោក មា៉រិទ្ធ បានចេញពីរថយន្ត ហើយភ្ជង់ក្បាលអភិបាលស្រុក មុនពេលអ្នកផ្សេងទៀតក្នុងរថយន្តនោះ ដែលក៏ជាកម្លាំងកងរាជអាវុធហត្ថដែរ បានបញ្ចុះបញ្ចូលគាត់ឲ្យដាក់កាំភ្លើងចុះ។ គាត់បានបើករថយន្តចេញទៅ ហើយមិនត្រូវបានចាប់ខ្លួនទេ។

លោក វ៉ាន់វុធ បានមានប្រសាសន៍កាលពីថ្ងៃសុក្រថា “កងរាជអាវុធហត្ថបានដកគាត់ចេញពីអង្គភាព ហើយតុលាការបានចេញដីកាចាប់ខ្លួន ឥឡូវនេះពួកគេកំពុងស្វែងរកចាប់ខ្លួនគាត់”។

អភិបាលស្រុករូបនេះ បានមានប្រសាសន៍ថា លោក ម៉ារិទ្ធ បានកសាងកេរ្តិ៍ឈ្មោះជាភ្នាក់ងារឥតមេត្តាម្នាក់ក្នុងការប្រយុទ្ធ និងអ្នកកាប់ឈើប្រណីតនៅខេត្តមណ្ឌលគិរី។ លោកបាននិយាយថា “គាត់បានពាក់ព័ន្ធក្នុងការបាញ់ និងគំរាមអាជ្ញាធរជាច្រើនលើក”។

ដោយសារការបាញ់កាលពីថ្ងៃពុធ និងការកក្រើកកាន់តែខ្លាំងឡើងនៅខេត្តមណ្ឌលគិរី ជាពិសេសស្រុកកែវសីមា និងក្រុងសែនមនោរម្យ លោក ស្វាយ សំអៀង អភិបាលរងខេត្តបានមានប្រសាសន៍ថា អាជ្ញាធរទាំងអស់ត្រូវតែចងចាំភារកិច្ចរបស់ខ្លួន។

លោក សំអៀង បានមានប្រសាសន៍ថា ” ហេតុការណ៍ទាំងអស់នេះ គឺសុទ្ធតែពាក់ព័ន្ធទៅនឹងមនុស្ស ដែលប្រើតួនាទីរបស់ខ្លួនដើម្បីការពារផលប្រយោជន៍ខុសច្បាប់ផ្ទាល់ខ្លួន”។ “កាតព្វកិច្ចគឺត្រូវអនុវត្តច្បាប់ ប៉ុន្តែ បុគ្គលមួយចំនួនប្រើតួនាទីរបស់ខ្លួន ដើម្បីបង្កើតចលាចល ហើយនេះជាដើមហេតុ ដែលឈានទៅដល់ការសម្លាប់នេះ”៕ មានិត

The post មន្ត្រីនគរបាលដែលបាញ់រថយន្តសង្ស័យដឹកឈើខុសច្បាប់ជាប់ចោទមនុស្សឃាត appeared first on ខេមបូឌា ដេលី.

កាលពីម្សិលមិញ ក្រុមហ៊ុនរបស់ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានបន្តការសាងសង់របងថ្មជុំវិញចំណែកដី ដែលមានជម្លោះនៅខេត្តកំពង់ឆ្នាំង បើទោះជាមានការអំពាវនាវពីប្រេសិតសិទ្ធិមនុស្សរបស់អង្គការសហប្រជាជាតិកាលពីថ្ងៃព្រហស្បតិ៍ ឲ្យពន្យារពេលការសាងសង់រហូតដល់មានដំណោះស្រាយជាមួយក្រុមកសិករដែលត្រូវគេបណ្តេញចេញក៏ដោយ។

ក្រុមហ៊ុន KDCInternational ដែលជារបស់លោកស្រី ជា ខេង ត្រូវក្រុមអ្នកភូមិចោទថា បានដណ្តើមយក និងរានដីទំហំ១៤៥ហិកតាដោយខុសច្បាប់នៅខេត្តកំពង់ឆ្នាំងកាលពីឆ្នាំ២០០២។ ចំនួនគ្រួសារប្រជាជនដែលចុះថយបន្តិចម្តងៗ ឥឡូវនេះនៅត្រឹម១៦គ្រួសារ បានបដិសេធមិនទទួលយកការផ្តល់សំណង ដែលពួកគេនិយាយថា តិចតួចពេក។

កាលពីសប្តាហ៍មុន កម្មករក្រុមហ៊ុន ខេឌីស៊ី បានមកដល់ភូមិឡពាងដើម្បីសង់របងថ្មជុំវិញដីនោះ ដែលក្រុមអ្នកភូមិនិយាយថា ពួកគេបាននិងកំពុងធ្វើស្រែចម្ការតាំងពីទសវត្សរ៍ឆ្នាំ១៩៨០មក។ នគរបាលរាប់សិបនាក់ត្រូវបានគេបញ្ជូនមកភូមិនេះក្នុងស្រុកកំពង់ត្រឡាចដើម្បីទប់ស្កាត់អំពើហិង្សា។ ប៉ុន្តែ កាលពីសប្តាហ៍មុន អ្នកភូមិបានប៉ះទង្គិចយ៉ាងហិង្សាជាមួយកម្មករពីរលើកមកហើយ។

បើទោះជាការព្រួយបារម្ភនេះត្រូវបានលើកឡើងដោយលោក សុរិយា ស៊ូបេឌី អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំកម្ពុជាក៏ដោយ ក៏ក្រុមមន្ត្រីមូលដ្ឋាននិយាយថា ពួកគេមិនអាចធ្វើអ្វីដើម្បីបញ្ឈប់វាបានឡើយ។

លោក នួន សាន មេឃុំតាជេស បានមានប្រសាសន៍ថា ” អាជ្ញាធរគ្រប់ជាន់ថ្នាក់បានផ្តល់ការយល់ព្រមឲ្យក្រុមហ៊ុននេះសង់របងលើដីនោះ”។ “តើខ្ញុំអាចនិយាយអីបាន ចំពោះក្រុមហ៊ុនដែលធ្វើរបងលើដីរបស់ពួកគេ ខណៈដែលអ្នកភូមិដែលអះអាងសិទ្ធិកាន់កាប់ដីនោះ គ្មានឯកសារណាមួយបញ្ជាក់ពីភាពជាម្ចាស់ដីនោះ”។

អ្នកស្រី អ៊ុំ សុភី ជាតំណាងអ្នកភូមិ បានមានប្រសាសន៍ថា ការសង់របងធ្វើលឿនជាងមុនទៅទៀត។ អ្នកស្រីបានមានប្រសាសន៍ថា “កម្មកររបស់ក្រុមហ៊ុន ដែលមានការគាំទ្រដោយនគរបាល និងកម្លាំងកងរាជអាវុធហត្ថដ៏ច្រើន បានចាប់ផ្តើមការសង់របងរឹតតែលឿនជាងមុន បើទោះជាដីនេះកំពុងមានទំនាស់ក៏ដោយ”។

កាលពីថ្ងៃទី២២ ខែមិថុនា ក្រសួងយុត្តិធម៌បានឆ្លើយតបទៅនឹងសំណើមួយពីក្រុមអ្នកភូមិសុំអន្តរាគមន៍ក្នុងរឿងក្តីនេះ ដោយបានបង្វែរករណីវិវាទនេះទៅតុលាការខេត្តវិញ។

អ្នកស្រី សុភី បានមានប្រសាសន៍ថា អ្នកស្រីគ្មានសង្ឃឹមថា តុលាការនឹងដោះស្រាយឲ្យទេ “ពីព្រោះគ្មានមន្ត្រីណានៅក្នុងខេត្តនេះដែលធ្លាប់បានព្យាយាមជួយដោះស្រាយរឿងករណីដល់អ្នកក្រីក្រឡើយ”៕មានិត

The post ក្រុមហ៊ុន ខេឌីស៊ី បន្តសង់របងលើដីមានជម្លោះ appeared first on ខេមបូឌា ដេលី.

យោងតាមមន្ត្រីមូលដ្ឋានបានឲ្យដឹងថា សមាជិកគ្រួសារប្រាំបីនាក់មកពីគ្រួសារតែមួយបានស្លាប់ក្នុងគ្រោះថ្នាក់ចរាចរណ៍រថយន្តក្នុងខេត្តពោធិ៍សាត់ កាលពីថ្ងៃសុក្រ នៅពេលរថយន្តទំនើបដែលពួកគេកំពុងជិះនោះ បានបុកគ្នាចំពីមុខជាមួយរថយន្តកុងតឺន័រមួយគ្រឿង ដែលបើកបញ្ច្រាសទិសគ្នា។

លោក ថេត សុវុទ្ធី នាយរងប៉ុស្តិ៍ឃុំអន្សាចំបក់ ក្នុងស្រុកក្រគរ បានមានប្រសាសន៍ថា រថយន្តតូយ៉ូតាហាយឡិនឌ័រ មួយគ្រឿងបើកបរពីទីក្រុងភ្នំពេញ ឆ្ពោះទៅក្រុងប៉ោយប៉ែត តាមផ្លូវជាតិលេខ៥ ស្រាប់តែនៅម៉ោង៥និង៣០នាទីល្ងាច រថយន្តដែលបើកមកពីខាងមុខបានផ្ទុះកង់មុខខាងឆ្វេង បណ្ដាលឲ្យរេចង្កូតចូលក្នុងគន្លងផ្លូវរបស់រថយន្តទំនើបនេះ។

លោកបានមានប្រសាសន៍ថា “រថយន្តតូយ៉ូតា ហាយឡិងឌ័រ រងការបុក ហើយជនរងគ្រោះទាំងប្រាំបីនាក់បានជាប់នៅក្នុងរថយន្ត។ ជនរងគ្រោះប្រាំពីរនាក់បានស្លាប់នៅកន្លែងកើតហេតុ ហើយម្នាក់ទៀតបានស្លាប់នៅមន្ទីរពេទ្យបង្អែកខេត្តរយៈពេលពីរបីម៉ោងក្រោយ”។

លោក សុវុទ្ធី បានមានប្រសាសន៍ថា រថយន្តទាំងពីរគ្រឿងប្រហែលជាបើកលឿនដូចគ្នា។ លោកបានមានប្រសាសន៍ថា ” ខ្ញុំគិតថា គ្រោះថ្នាក់ចរាចរណ៍នេះកើតឡើងដោយសារខ្វះការត្រួតពិនិត្យមើលរថយន្ត ហើយដោយសាររថយន្តទាំងពីរបើកក្នុងល្បឿនលឿនផង ដូច្នេះអ្នកបើកបរមិនអាចបញ្ចៀសគ្រោះថ្នាក់បានឡើយ”។ លោកបានបន្ថែមថា ជនរងគ្រោះទាំងអស់មកពីខេត្តកណ្ដាល មានអាយុចាប់ពី១០ឆ្នាំដល់៦០ឆ្នាំ។

លោក រស់ ចំរើន នាយនគរបាលចរាចរខេត្តបានមានប្រសាសន៍ថា នគរបាលកំពុងស្វែងរកអ្នកបើកបរ ដែលបានគេចខ្លួនពីកន្លែងកើតហេតុ។

លោក អ៊ន ឡេង ប្រធានភូមិអន្លង់សាន ក្នុងខេត្តកណ្ដាលបានមានប្រសាសន៍ថា កូនប្រុសរបស់លោកបីនាក់ស្ថិតក្នុងចំណោមជនរងគ្រោះដោយគ្រោះថ្នាក់ចរាចរណ៍នោះ ហើយបានធ្វើដំណើរទៅក្រុងប៉ោយប៉ែត បន្ទាប់ពីចូលរួមពិធីរៀបអាពាហ៍ពិពាហ៍បងប្អូនជីដូនមួយ។លោកបានមានប្រសាសន៍ថា ពិធីបុណ្យសពជនរងគ្រោះទាំងប្រាំបីនាក់បានប្រារព្ធធ្វើកាលពីថ្ងៃសៅរ៍ នៅវត្តមួយក្នុងមូលដ្ឋាន។

លោក ឡេង បានមានប្រសាសន៍ថា ” ខ្ញុំខកចិត្តណាស់ ហើយខ្ញុំគ្មានអារម្មណ៍ក្នុងខ្លួនទេ។ ខ្ញុំដូចជាដាច់ដៃដាច់ជើងអស់ហើយ។ ខ្ញុំក្រៀមក្រំណាស់ ពីព្រោះខ្ញុំបានបាត់បង់កូនប្រុសទាំងបីនាក់របស់ខ្ញុំ”។

លោក ឃុយ គា នាយប៉ុស្តិ៍ឃុំព្រែកស្ដី បានមានប្រសាសន៍ថា លោកនិងអ្នកភូមិមូលដ្ឋានមួយចំនួនទៀតបានជួយរៀបចំពិធីនេះ។

លោកបានមានប្រសាសន៍ថា ” គ្រោះថ្នាក់ចរាចរណ៍នេះបានកើតឡើងដោយចៃដន្យ ហើយខ្ញុំនិងអ្នកភូមិមានក្ដីរន្ធត់ណាស់។ ពួកគាត់គឺជាមនុស្សល្អនិងប្រកបរបររកស៊ីដោយស្មោះត្រង់ មិនដែលបង្កបញ្ហាឡើយ”៕ សារុន

The post សាច់ញាតិប្រាំបីនាក់ស្លាប់ក្នុងគ្រោះថ្នាក់ចរាចរណ៍មួយក្នុងខេត្តពោធិ៍សាត់ appeared first on ខេមបូឌា ដេលី.

មន្ត្រីនគរបាលមូលដ្ឋានម្នាក់បាននិយាយកាលពីម្សិលមិញថា បុរសជនជាតិអាមេរិកអាយុ៤៤ឆ្នាំម្នាក់ ដែលត្រូវគេធ្វើឃាតកាលពីសប្ដាហ៍មុននៅក្នុងទីក្រុងភ្នំពេញ គឺពាក់ព័ន្ធនឹងការស៊ើបអង្កេតរឿងព្រហ្មទណ្ឌពីអាជ្ញាធរអាមេរិកមុនពេលគាត់ស្លាប់។

លោក វីលៀម ហ្គ្លិន ជាអ្នករស់នៅរដ្ឋមីស៊ីស៊ីពី បានមកកាន់ប្រទេសកម្ពុជាកាលពីពីរខែមុនពីទីក្រុងបាងកក និងធ្វើការនៅសាលាបង្រៀនភាសាអង់គ្លេសមួយចំនួនក្នុងទីក្រុងភ្នំពេញ ប៉ុន្តែគេបានប្រទះឃើញស្លាប់ដោយសាររឹតកកាលពីព្រឹកថ្ងៃពុធ នៅតាមផ្លូវលំមួយនៅក្នុងសង្កាត់គោករកា ខណ្ឌព្រែកព្នៅ។

លោក សួន សាមឿន នាយប៉ុស្តិ៍នគរបាលសង្កាត់គោករកា បានមានប្រសាសន៍កាលពីម្សិលមិញថា ទោះបីជាការស៊ើបអង្កេតលើករណីឃាតកម្មនេះមិនទាន់រកឃើញមូលហេតុ ឬរកឃើញជនសង្ស័យក៏ដោយ ក៏មន្ត្រីអាមេរិកបានជូនដំណឹងលោកថា ពួកគេកំពុងស្វែងរកចាប់ខ្លួនលោក វីលៀម ហ្គ្លិន មុនពេលគាត់ស្លាប់។ លោក សាមឿន បានមានប្រសាសន៍ថា ” មន្ត្រីស្ថានទូតបានបញ្ជាក់ថា អាជ្ញាធរអាមេរិកកំពុងស្វែងរកចាប់បញ្ជូនជនរងគ្រោះនេះត្រឡប់ទៅអាមេរិកវិញ ពីព្រោះគាត់គឺជាឧក្រិដ្ឋជន”។

មន្ត្រីស្ថានទូតអាមេរិកកាលពីថ្ងៃព្រហស្បតិ៍ បានអមដំណើរមន្ត្រីនគរបាលកម្ពុជាចុះទៅផ្ទះសំណាក់ចំនួនពីរនៅក្នុងទីក្រុងភ្នំពេញ ជាផ្ទះសំណាក់ដែលលោក វីលៀម ហ្គ្លិន បានស្នាក់នៅ ហើយបានដកយករបស់របររបស់គាត់ពីផ្ទះសំណាក់ Tattoo នៅក្នុងខណ្ឌ៧មករា ជាកន្លែងដែលគាត់ស្នាក់នៅចុងក្រោយ។

នៅពេលសួរកាលពីម្សិលមិញថា តើរូបភាពវីដេអូពីកាមេរ៉ាសុវត្ថិភាពនៅផ្ទះសំណាក់ទាំងពីរបានបង្ហាញពីតម្រុយណាមួយឬអត់នោះ លោក អេង សោភា នាយការិយាល័យនគរបាលព្រហ្មទណ្ឌរាជធានី បានមានប្រសាសន៍ថា អាជ្ញាធរអាមេរិកបានប្រមូលភ័ស្តុតាងសម្រាប់ធ្វើការត្រួតពិនិត្យរួចហើយ។ លោកបានមានប្រសាសន៍ថា “យើងមិនដឹងរឿងទេ ពីព្រោះយើងបានបញ្ជូនរឿងនេះទៅឲ្យស្ថានទូតរួចហើយ”។

លោក ចន ស៊ីម៉ុន អ្នកនាំពាក្យស្ថានទូតអាមេរិក បានមានប្រសាសន៍ថា ដោយសារច្បាប់ស្ដីពីភាពឯកជន លោកមិនអាចនិយាយពីរឿងនេះបានទេ ប៉ុន្តែលោកបានបដិសេធថា ស្ថានទូតអាមេរិកមិនជាប់ពាក់ព័ន្ធនៅក្នុងការស៊ើបអង្កេតនេះទេ។ លោកបានមានប្រសាសន៍ថា ” យើងកំពុងធ្វើអ្វីដែលយើងអាចធ្វើបានដើម្បីជួយអាជ្ញាធរកម្ពុជា ប៉ុន្តែនេះជាការស៊ើបអង្កេតរបស់នគរបាលកម្ពុជា”។

អ្នកស្រី នីតាយ៉ា ហ្គ្លិន អាយុ៤៤ឆ្នាំ ដែលជាប្រពន្ធរបស់ជនរងគ្រោះអស់រយៈពេលប្រាំឆ្នាំបាននិយាយកាលពីថ្ងៃសុក្រថា ប្ដីរបស់អ្នកស្រីដែលបានបែកគ្នាកាលពីពីរខែមុន បានប្រាប់អ្នកស្រីជាច្រើនដងថា គាត់មិនអាចត្រឡប់ទៅអាមេរិកវិញទេ ប៉ុន្តែគាត់មិនដែលបានប្រាប់ពីមូលហេតុឡើយ។

អ្នកស្រីបាននិយាយថា FBI បានមកផ្ទះអ្នកស្រីនៅទីក្រុងបាងកកកាលពីសប្ដាហ៍មុន។ ” ពួកគេបានទូរស័ព្ទមកខ្ញុំ និងបានមកជួបខ្ញុំនៅក្នុងផ្ទះខ្ញុំ ហើយខ្ញុំបានផ្ដល់ព័ត៌មានជាច្រើនឲ្យពួកគេ”។

អ្នកស្រី ហ្គ្លិន បាននិយាយថា ប្ដីគាត់បានទៅស្ថានទូតអាមេរិកប្រចាំក្រុងភ្នំពេញកាលពីថ្ងៃទី៧ ខែកក្កដា ដើម្បីបន្ថែមទំព័រលិខិតឆ្លងដែនរបស់គាត់ ពីព្រោះគាត់ចង់ចាកចេញពីកម្ពុជាទៅប្រទេសចិនភ្លាមៗ។ អ្នកស្រីបាននិយាយថា ” គាត់បានផ្ញើសារមកខ្ញុំថា គាត់ព្រួយបារម្ភ ពីព្រោះស្ថានទូតបានយកលិខិតឆ្លងដែនពីគាត់ ហើយគាត់មិនដឹងថាដោយសារមូលហេតុអ្វីទេ”៕ គឹមហឿន

The post គ្រូបង្រៀនដែលត្រូវគេធ្វើឃាតគឺជាឧក្រិដ្ឋជនដែលអាមេរិកស្វែងរកចាប់ខ្លួន appeared first on ខេមបូឌា ដេលី.

អ្នកភូមិក្នុងខេត្តកំពង់ឆ្នាំង ដែលបានជាប់ពាក់ព័ន្ធក្នុងវិវាទដីធ្លីដ៏អូសបន្លាយជាមួយភរិយារដ្ឋមន្ត្រីម្នាក់បានយកទុក្ខលំបាករបស់ពួកគាត់ទៅប្ដឹងអារុក្ខអារក្ខអ្នកតានៅសប្ដាហ៍នេះ ដោយរៀបចំពិធីរយៈពេលពីរថ្ងៃដើម្បីដាក់បណ្ដាសាដល់មន្ត្រីក្រុមហ៊ុន និងអាជ្ញាធរមូលដ្ឋាន ដែលពួកគាត់លើកឡើងថា បានទម្លាក់កំហុសមកលើពួកគាត់។

អ្នកភូមិបានតស៊ូជាមួយក្រុមហ៊ុន KDC International ដែលគ្រប់គ្រងដោយអ្នកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពលចាប់តាំងពីឆ្នាំ២០០៧មកជុំវិញដីចំនួន១៤៥ហិកតានៅក្នុងស្រុកកំពង់ត្រឡាច ដែលអ្នកស្រី ជា ខេង ចង់ធ្វើការអភិវឌ្ឍ។

អំឡុងពិធីដាក់បណ្ដាសានោះ អ្នកភូមិជាង៥០នាក់បានប្រើកាំបិតចាក់ទៅលើរូបតំណាងអ្នកស្រី ជា ខេង និងរូបតំណាងអ្នកគ្រប់គ្រងរបស់គាត់ ព្រមទាំងរូបតំណាងបីទៀត ដែលតំណាងឲ្យអាជ្ញាធរមូលដ្ឋាន សាលាដំបូងខេត្ត និងអ្នកភូមិដែលបានឃុបឃិតជាមួយក្រុមហ៊ុន។ អ្នកចូលរួមពិធីនោះ ក៏បានបាចម្ទេស និងអំបិលដាក់រូបតំណាងទាំងនោះផងដែរ ដើម្បីដាក់បណ្ដាសាទៅលើពួកគេ។

អ្នកភូមិឈ្មោះ ស៊ាង ហេង បាននិយាយថា ” អ្នកភូមិបានចាប់ផ្ដើមធ្វើពិធីដាក់បណ្ដាសានេះ ពីព្រោះពួកគាត់បានដាក់ពាក្យបណ្ដឹងច្រើនណាស់ជាមួយអាជ្ញាធរ ប៉ុន្តែមិនមានដំណោះស្រាយសម្រាប់ពួកគាត់ឡើយ”។

បន្ទាប់ពីមានភាពតានតឹងរយៈពេលជាច្រើនខែមក ការប៉ះទង្គិចគ្នាដោយហិង្សាបានកើតឡើងពីរលើកកាលពីសប្ដាហ៍មុននៅក្នុងភូមិឡពាង បន្ទាប់ពីកម្មករក្រុមហ៊ុន ខេឌីស៊ី បានចាប់ផ្ដើមសាងសង់របងបេតុងជុំវិញដីមានវិវាទនេះ។ លោក ហេង បាននិយាយថា ឥឡូវនេះអ្នកភូមិកំពុងរៀបចំគម្រោងធ្វើការតវ៉ានៅរាជធានីភ្នំពេញអំពីវិវាទដីធ្លីនេះ។

ទាំងលោក ហេង និងអ្នកចូលរួមម្នាក់ទៀតឈ្មោះ អ៊ុំ សុភី បាននិយាយថា អ្នកភូមិមានជំនឿថា ពិធីដាក់បណ្ដាសារបស់ខ្លួនមានប្រសិទ្ធភាព ពីព្រោះមន្ត្រីមូលដ្ឋានប្រាំមួយនាក់ដែលបានជួយការពារការទាមទារសិទ្ធិកាន់កាប់របស់ក្រុមហ៊ុនខេឌីស៊ី ចំពោះដីនេះបានស្លាប់កាលពីបីឆ្នាំមុន រួមមាន មេឃុំបីនាក់ អតីតអភិបាលខេត្តម្នាក់ និងនាយប៉ុស្តិ៍ឃុំម្នាក់ដែលបានបាក់កស្លាប់បន្ទាប់ពីបានធ្លាក់ពីអង្រឹង។

អ្នកស្រី សុភី បាននិយាយថា ” យើងធ្លាប់រៀបចំពិធីដាក់បណ្ដាសាម្តងរួចមកហើយ ហើយយើងឃើញថា មានប្រសិទ្ធភាព ពីព្រោះមនុស្សមួយចំនួនដែលបានជាប់ពាក់ព័ន្ធក្នុងករណីនេះបានស្លាប់”។ អ្នកស្រីបានបន្ថែមថា អ្នកស្រីសង្ឃឹមថា អារុក្ខអារក្ខអ្នកតានឹងធ្វើឲ្យអ្នកស្រី ជា ខេង អ្នកគ្រប់គ្រងរបស់អ្នកស្រី និងលោក ថៃ ហ៊ី ស្លាប់។

នៅពេលត្រូវបានទាក់ទងកាលពីម្សិលមិញ លោក ហ៊ី មិនបារម្ភចំពោះការគំរាមកំហែងនេះទេ ដោយនិយាយថា លោកមិនខ្លាចការដាក់ទោសពីអារុក្ខអារក្ខអ្នកតាទេ ពីព្រោះលោកមិនបានធ្វើអ្វីខុសឡើយ។ លោកបាននិយាយថា ” ខ្ញុំមិនបារម្ភអំពីការដាក់បណ្ដាសានេះទេ ពីព្រោះយើងមិនបានប្រព្រឹត្តអំពើអាក្រក់ឡើយ ហើយយើងក៏មិនបានយកដីស្រែរបស់អ្នកភូមិទាំងនេះដែរ”។ លោកបានបន្ថែមថា ” ផ្ទុយទៅវិញ ការដាក់បណ្ដាសានេះនឹងត្រឡប់ទៅរកអ្នកទាំងនោះវិញ ពីព្រោះ យើងប្រព្រឹត្តល្អឬមិនល្អ ទេវតាមានភ្នែក។

លោក ជួប ចាន់ធឿន នាយប៉ុស្តិ៍ឃុំតាជេស កន្លែងដែលវិវាទដីធ្លីនេះកើតឡើងបានមានប្រសាសន៍ថា វាជាសិទ្ធិរបស់អ្នកភូមិក្នុងការរៀបចំពិធីនេះ ពីព្រោះវាគ្រាន់តែជាអបិយជំនឿប៉ុណ្ណោះ។ លោកបានមានប្រសាសន៍ថា ” ពួកគាត់បានធ្វើច្រើនលើកមកហើយ ប៉ុន្តែយើងមិនដែលឃើញមានបញ្ហាអ្វីកើតឡើងទេ ហើយមនុស្សដែលបានស្លាប់នោះគឺស្លាប់ដោយសារជំងឺនិងគ្រោះថ្នាក់ចរាចរណ៍ប៉ុណ្ណោះ មិនមែនស្លាប់ដោយសារត្រូវបណ្ដាសាឡើយ”៕ សារុន

The post អ្នកភូមិដែលជាប់ពាក់ព័ន្ធវិវាទដីធ្លីធ្វើពិធីដាក់បណ្តាសាភរិយារដ្ឋមន្ត្រីម្នាក់និងអាជ្ញាធរមូលដ្ឋាន appeared first on ខេមបូឌា ដេលី.

អាជ្ញាធរខេត្តកំពង់ធំកំពុងស្វែងរកទាហានម្នាក់ ដែលជាប់សង្ស័យថាបានដឹកឈើគ្រញូងខុសច្បាប់ដែលបានបាញ់នគរបាល ពេលរត់គេចខ្លួនតាមផ្លូវខ្វាត់ខ្វែងតូចៗកាលពីព្រឹកថ្ងៃសៅរ៍។

លោក ជូ សំអាន ស្នងការនគរបាលខេត្តបានមានប្រសាសន៍ថា មន្ត្រីរបស់លោកបានទទួលការហៅទូរស័ព្ទពីព្រះរាជអាជ្ញារងអមសាលាដំបូងខេត្តមួយរូបនៅម៉ោង៧ព្រឹកឲ្យឃាត់រថយន្តហុងដាCR-V ពាក់ស្លាកលេខខេមរភូមិន្ទ ហើយបើកបរតាមផ្លូវជាតិលេខ៦ដឹកឈើគ្រញូងខុសច្បាប់ប្រហែល២០០គីឡូក្រាម។

លោក សំអាន បានមានប្រសាសន៍ថា នគរបាលបានប្រទះឃើញរថយន្តនេះ ហើយបានបញ្ជាឲ្យឈប់។ ប៉ុន្តែអ្នកបើកមិនព្រមឈប់ធ្វើឲ្យនគរបាលបើកដេញតាមចម្ងាយ៥គីឡូម៉ែត្រ មុនពេលអ្នកបើកបរបានឈប់នៅផ្ទះរបស់ខ្លួនក្នុងក្រុងស្ទឹងសែន ហើយបានរត់ចេញពីរថយន្ត។

របាយការណ៍របស់លោក សំអាន ដែលបានបញ្ជូនទៅនគរបាលជាតិមានខ្លឹមសារថា ” នៅពេលយើងបានព្យាយាមចាប់ខ្លួនជនសង្ស័យ ជននេះបានរត់ចេញពីរថយន្ត ហើយបានបាញ់កាំភ្លើងខ្លីសំដៅអាជ្ញាធរចំនួនប្រាំពីរគ្រាប់ ចំណែកអាជ្ញាធរបានបាញ់តបវិញពីរគ្រាប់”។ របាយការណ៍ដដែលនេះបន្តថា “ជនសង្ស័យបានរត់ចូលផ្ទះអ្នកភូមិម្នាក់ ហើយបានដោះអាវចេញ រួចរត់ទៅផ្ទះមួយទៀត ហើយជននេះបានគេចខ្លួនរួចដោយសារផ្លូវតូចចង្អៀតពេក”។ លោក សំអាន បានមានប្រសាសន៍ថា បុរសរូបនេះបានទុកឯកសណ្ឋានយោធារបស់ខ្លួននៅក្នុងរថយន្ត។

លោក ហង្ស ថុល មេបញ្ជាការកងរាជអាវុធហត្ថខេត្តបានមានប្រសាសន៍ថា មន្ត្រីដែលបានចូលរួមក្នុងប្រតិបត្តិការនោះ គ្មាននរណាម្នាក់រងរបួសទេ។ លោកបានមានប្រសាសន៍ថា ” កម្លាំងរបស់យើងគ្មានរងរបួសទេ។ វាលំបាកចាប់ខ្លួនជនសង្ស័យរូបនេះណាស់ ពីព្រោះជននេះមានកាំភ្លើង និងមានផ្ទះច្រើន ហើយផ្លូវតូចចង្អៀតទៀត”។

លោក ហង្ស ថុល បានមានប្រសាសន៍ថា កងកម្លាំងបាននិយាយជាមួយប្រពន្ធជនសង្ស័យរូបនេះ ដែលបានអះអាងថា ប្ដីរបស់គាត់ជាទាហាន ហើយបាននិយាយថា គាត់បានឈរជើងនៅក្បែរព្រំដែនថៃក្នុងខេត្តព្រះវិហារ។ ទោះជាយ៉ាងណា លោកបានអះអាងថា លោកមិនស្គាល់ឈ្មោះជនសង្ស័យ ឬអង្គភាពយោធារបស់គាត់ឡើយ។ លោកបានមានប្រសាសន៍ថា ” យើងទទួលបានតម្រុយពីស្ត្រីជាប្រពន្ធ ដូច្នេះយើងសង្ឃឹមថា នឹងចាប់ខ្លួនជននេះបាននៅក្នុងពេលឆាប់ៗនេះ”។

របាយការណ៍មួយបង្ហោះតាមគេហទំព័ររបស់នគរបាលជាតិគ្រាន់តែបញ្ជាក់ថា បុរសនេះឈ្មោះ ប៉ុន អាយុ៣៥ឆ្នាំ ហើយក៏ជាទាហានឈរជើងក្នុងខេត្តព្រះវិហារផងដែរ។ របាយការណ៍ដដែលនេះលើកឡើងដែរថា ឈើគ្រញូង២៦ដុំត្រូវបានរកឃើញនៅក្នុងរថយន្តរបស់គាត់ ហើយឈើទាំងនេះត្រូវបានយករក្សាទុកនៅខណ្ឌរដ្ឋបាលព្រៃឈើស្ទោង។

ហេតុការណ៍េនះគឺជាលើកទី២ហើយ ដែលនគរបាលបានបាញ់ទៅលើជនសង្ស័យដឹកឈើខុសច្បាប់ក្នុងរយៈពេលមិនដល់មួយសប្ដាហ៍ផង។ កាលពីថ្ងៃពុធ មន្ត្រីនគរបាលជាតិម្នាក់ ដែលឈរជើងនៅខេត្តមណ្ឌលគិរី បានបាញ់រថយន្តមួយគ្រឿងដែលសង្ស័យថា ដឹកឈើខុសច្បាប់ បន្ទាប់ពីរថយន្តនោះមិនព្រមស្តាប់បញ្ជាឲ្យឈប់។ ការបាញ់នេះបណ្ដាលឲ្យបុរសម្នាក់ស្លាប់ និងរបួសកូនចុងមេបញ្ជាការរងកងរាជអាវុធហត្ថខេត្តម្នាក់។ គេរកមិនឃើញឈើនៅក្នុងរថយន្តនោះទេ៕ សារុន

The post ទាហានម្នាក់ដែលជាប់សង្ស័យថា ដឹកឈើគ្រញូងរត់គេចផុតពីគ្រាប់កាំភ្លើង appeared first on ខេមបូឌា ដេលី.

យោងតាមរបាយការណ៍បង្ហោះតាមគេហទំព័រនគរបាលជាតិបានឲ្យដឹងថា កាលពីថ្ងៃសៅរ៍ឧកញ៉ាក្រុមហ៊ុនផលិតកញ្ចក់មួយបានគំរាមបាញ់សម្លាប់អ្នកកាសែតក្នុងស្រុកពីរនាក់ នៅពេលដែលពួកគេកំពុងយកព័ត៌មានអំពីជម្លោះ ដែលឧកញ៉ារូបនេះឈ្លោះគ្នាជាមួយពាណិជ្ជករម្នាក់ទៀតក្នុងរាជធានីភ្នំពេញ។

អ្នកកាសែតមកពីគេហទំព័រព័ត៌មាន Cambodia Express News (CEN)និងទូរទស្សន៍បាយ័នកំពុងយកព័ត៌មានអំពីការឈ្លោះគ្នារវាងលោក តាំង ផេងប៉ោ ដែលជាម្ចាស់ក្រុមហ៊ុនផលិតកញ្ចក់ និងលោក លី គឹមហេង ដែលជាអ្នករកស៊ីដឹកដី នៅខាងក្រៅរោងចក្ររបស់លោក តាំង ផេងប៉ោ ស្ថិតក្នុងខណ្ឌពោធិ៍សែនជ័យ ស្រាប់តែមានការគំរាមសម្លាប់តែម្តង។

គេហទំព័រនគរបាលលើកឡើងថា ជម្លោះរវាងពាណិជ្ជករទាំងពីរនាក់នេះបានផ្ទុះឡើងបន្ទាប់ពីរថយន្តដឹកដីរបស់លោក គឹមហេង បានព្យាយាមបើកកាត់ផ្លូវសាធារណៈខាងមុខរោងចក្ររបស់លោក តំាង ផេងប៉ោ ជាផ្លូវដែលលោក ផេងប៉ោ បានយកបង្គោលបេតុងបិទ។

របាយការណ៍នគរបាលលើកឡើងថា ” អំឡុងជម្លោះនោះអ្នកកាសែតពីរនាក់មកពីគេហទំព័រព័ត៌មាន CEN និងទូរទស្សន៍បាយ័នបានទៅកាន់កន្លែងនោះ ហើយបានយកព័ត៌មានអំពីជម្លោះរវាងអ្នកទាំងពីរនេះ”។

របាយការណ៍ដដែលនេះបន្តថា ” ឧកញ៉ា តាំង ផេងប៉ោ បានបញ្ជាឲ្យអ្នកកាសែតឈប់ថតរូប ប៉ុន្តែអ្នកកាសែតទាំងនោះមិនព្រមស្ដាប់ឡើយ”។ របាយការណ៍នេះបន្ថែមថា “បន្ទាប់មកឧកញា តាំង ផេងប៉ោ បានបញ្ជាឲ្យអង្គរក្សរបស់លោកបាញ់សម្លាប់អ្នកកាសែតទាំងពីរនាក់នេះ។តាមបញ្ជារបស់លោក អង្គរក្សពីរនាក់បានចាប់យកម៉ាស៊ីនថត ហើយបន្ទាប់មកក៏មានការប្រវាយប្រតប់គ្នា”។

យោងតាមរបាយការណ៍នគរបាលឲ្យដឹងថា លោក ផេងប៉ោ ខឹងយ៉ាងខ្លាំង ហើយព្យាយាមទូរស័ព្ទហៅកម្លាំងមកពីកងពលតូចលេខ៧០នៅក្បែរនោះ។ របាយការណ៍ដដែលនេះមិនបាននិយាយលម្អិតពីរឿងនេះទេ ហើយក៏មិនបាននិយាយថា តើមានការចាប់ខ្លួននៅកន្លែងកើតហេតុឬយ៉ាងណាឡើយ។

លោក សន សុផល អ្នកយកព័ត៌មាននៅគេហទំព័រព័ត៌មាន CEN បានមានប្រសាសន៍កាលពីម្សិលមិញថា លោកជាអ្នកកាសែតម្នាក់ក្នុងចំណោមអ្នកកាសែតពីរនាក់ ដែលលោក ផេងប៉ោ បានគំរាម។

លោក សុផល បានមានប្រសាសន៍ថា ” ពួកគេបានព្យាយាមរុញច្រានអ្នកកាសែតឲ្យចេញពីកន្លែងឈ្លោះគ្នានោះ ហើយបន្ទាប់មកខ្ញុំបានថតរូបពួកគេ។ ខ្ញុំត្រូវបានគំរាមបាញ់សម្លាប់ នៅពេលដែលខ្ញុំថតរូបរថយន្តនោះ”។

លោក សុផល បានមានប្រសាសន៍ថា លោកនឹងមិនដាក់ពាក្យបណ្ដឹងទៅតុលាការ ឬនគរបាលទេ ប៉ុន្តែលោកបានរាយការណ៍ពីការគំរាមនេះទៅលោក ប៉ែន សមិទ្ធិ អគ្គនាយកគេហទំព័រព័ត៌មាន CEN ដែលមិនអាចទាក់ទងសុំការអត្ថាធិប្បាយបាន។ ទាំងលោក គឹមហេង និងតំណាងក្រុមហ៊ុនរបស់លោក ផេងប៉ោ មិនអាចទាក់ទងសុំការអត្ថាធិប្បាយបានទេ៕ សារុន

The post ឧកញ៉ាម្នាក់គំរាមឲ្យគេបាញ់សម្លាប់អ្នកកាសែតពីរនាក់ appeared first on ខេមបូឌា ដេលី.

នៅពេលដែលជិតដល់ខួបនៃការបោះឆ្នោតជាតិថ្ងៃទី២៨ ខែកក្កដា មេដឹកនាំជាន់ខ្ពស់គណបក្សប្រឆាំងកាលពីម្សិលមិញបានបង្ហាញថា ខ្លួនត្រៀមដកការទាមទារឲ្យមានការបោះឆ្នោតមុនអាណត្តិ និងបានផ្ដោតជាសំខាន់ទៅលើការធ្វើឲ្យមានគណៈកម្មាធិការជាតិរៀបចំការបោះឆ្នោតឯករាជ្យ។

លោក កឹម សុខា អនុប្រធានគណបក្សសង្គ្រោះជាតិ ដែលអង្គុយនៅជិតលោកនាយករដ្ឋមន្ត្រី ហ៊ុន សែន និងលោក ស ខេង រដ្ឋមន្ត្រីក្រសួងមហាផ្ទៃ អំឡុងពិធីតម្កល់ព្រះអដ្ឋិបរមរតនកោដ្ឋសម្ដេចឪ នរោត្តម សីហនុ កាលពីថ្ងៃសុក្រ បានមានប្រសាសន៍ថា ឥឡូវនេះលោកសង្ឃឹមថា នឹងមានការដោះស្រាយភាពទាល់ច្រកនេះឲ្យបានមុនថ្ងៃទី២៨ ខែកក្កដា។

លោក កឹម សុខា បានមានប្រសាសន៍ថា គណបក្សទាំងពីរពេលនេះកំពុងរៀបចំរូបមន្តថ្មីសម្រាប់ដំណើរការជ្រើសរើសសមាជិកថ្មីរបស់គណៈកម្មាធិការជាតិរៀបចំការបោះឆ្នោត ហើយថា ការបង្ហាញទំនាក់ទំនងជាសាធារណៈខុសពីធម្មតាកាលពីថ្ងៃសុក្រនេះ គឺជាប្រផ្នូលល្អសម្រាប់ការចរចារវាងគណបក្សទាំងពីរក្នុងរយៈពេលប៉ុន្មានសប្ដាហ៍ខាងមុននេះ។

លោក កឹម សុខា បានមានប្រសាសន៍ថា ” យើងបង្ហាញថា ជំហររបស់គណបក្សសង្គ្រោះជាតិ គឺថាយើងត្រូវអង្គុយពិភាក្សាគ្នារកវិធីកណ្ដាល ដែលធានាឲ្យមានការបោះឆ្នោតដោយសេរី និងយុត្តិធម៌ ហើយយើងនឹងដោះស្រាយបញ្ហានេះ។ យើងត្រៀមរូបមន្តរបស់យើងរួចហើយ ហើយប្រសិនបើគណបក្សប្រជាជនកម្ពុជាត្រៀមរូបមន្តរបស់គេរួចហើយ យើងអាចអង្គុយចរចាគ្នារកដំណោះស្រាយ”។

ពីមុនគណបក្សសង្គ្រោះជាតិបានទាមទារថា ត្រូវជ្រើសរើសសមាជិកថ្មីរបស់គណៈកម្មាធិការជាតិរៀបចំការបោះឆ្នោតដោយសំឡេងពីរភាគបីពីរដ្ឋសភាដែលមាន១២៣អាសនៈនេះ ជាច្បាប់ដែលតម្រូវឲ្យមានការគាំទ្រពីគណបក្សទាំងពីរក្នុងការជ្រើសរើសបេក្ខជន។ការទាមទារបែបនេះត្រូវបានគណបក្សប្រជាជនកម្ពុជាច្រានចោលជាច្រើនដង។

លោក សុន ឆ័យ ដែលតែងតែដឹកនាំមន្ត្រីគណបក្សសង្គ្រោះជាតិនៅក្នុងការចរចាជាមួយគណបក្សប្រជាជនកម្ពុជាចាប់តាំងពីការបោះឆ្នោតមកនោះ បានមានប្រសាសន៍ថា គណបក្សប្រឆាំងក៏បានបន្ធូរបន្ថយការទាមទាររបស់ខ្លួនឲ្យមានការបោះឆ្នោតថ្មីនៅពេលណាមួយមុនខែកុម្ភៈ ឆ្នាំ២០១៨ផងដែរ ជាកាលបរិច្ឆេទឆាប់បំផុតដែលគណបក្សប្រជាជនកម្ពុជានិយាយថា ខ្លួននឹងអនុញ្ញាតឲ្យមានការបោះឆ្នោតលើកក្រោយ។

លោកបានមានប្រសាសន៍ថា ” ខ្ញុំគិតថា ការបោះឆ្នោតអាចចាប់ផ្ដើមនៅពេលក្រោយបាន។ វាអាស្រ័យថាតើយើងអាចកែទម្រង់ស្ថាប័នបោះឆ្នោតនេះបានលឿនប៉ុណ្ណា។ វាមិនសំខាន់ទេក្នុងការបោះឆ្នោតមុនអាណត្តិ ប្រសិនបើយើងមិនមានប្រព័ន្ធគួរឲ្យទុកចិត្ត ឬអាចទទួលយកបាននោះ ដូច្នេះខ្ញុំគិតថា គណបក្សសង្គ្រោះជាតិសុខចិត្តរៀបចំការបោះឆ្នោតទៅពេលក្រោយ”។

កាលពីមុន គណបក្សសង្គ្រោះជាតិបានទាមទារឲ្យមានការបោះឆ្នោតថ្មីនៅពេលណាមួយចន្លោះពីខែមករា ឆ្នាំ២០១៦ដល់ខែកក្កដា ឆ្នាំ២០១៧។ កាលពីខែមេសា លោក សម រង្ស៊ី ប្រធានគណបក្សសង្គ្រោះជាតិហាក់ដូចជាបានព្រមព្រៀងជាមួយលោកនាយករដ្ឋមន្ត្រី ហ៊ុន សែន ដើម្បីបញ្ចប់ការធ្វើពហិការរបស់គណបក្សប្រឆាំងមិនទទួលយកអាសនៈរបស់ខ្លួន។

លោកទាំងពីរបានព្រមព្រៀងគ្នាថា សមាជិកថ្មីនៃគណៈកម្មាធិការជាតិរៀបចំការបោះឆ្នោត នឹងត្រូវជ្រើសរើសដោយមតិរួមគ្នារបស់គណបក្សទាំងពីរ ប៉ុន្តែការព្រមព្រៀងនេះបានបរាជ័យទៅវិញមួយថ្ងៃក្រោយមក ព្រោះលោក ហ៊ុន សែន មិនព្រមឲ្យមានការបោះឆ្នោតមុនខែកុម្ភៈ ឆ្នាំ២០១៨។

លោក កឹម សុខា និងលោក សុន ឆ័យ បានមានប្រសាសន៍កាលពីម្សិលមិញថា ពួកគាត់កំពុងរង់ចាំការទាក់ទងពីមេដឹកនាំគណបក្សប្រជាជនកម្ពុជា ដើម្បីបន្តការចរចា។

លោក ជាម យៀប អ្នកនាំពាក្យគណបក្សប្រជាជនកម្ពុជា និងលោក ព្រំ សុខា រដ្ឋលេខាធិការក្រសួងមហាផ្ទៃ ដែលបានដឹកនាំគណបក្សនេះនៅក្នុងការចរចាមិនអាចទាក់ទងសុំការអត្ថាធិប្បាយបានទេ។

បច្ចុប្បន្ននេះ លោក សម រង្ស៊ី កំពុងស្ថិតនៅតំបន់អឺរ៉ុប ហើយគ្រោងជួបសហគមន៍ខ្មែរនៅក្រៅប្រទេស ដូចជានៅអូស្ត្រាលី អាល្លឺម៉ង់ និងស្វ៊ីស នៅសប្ដាហ៍ក្រោយ ហើយបន្ទាប់មកនឹងវិលមកប្រទេសកម្ពុជាវិញឲ្យបានមុនថ្ងៃទី២៧ ខែកក្កដា ដែលនៅពេលនោះគណបក្សនេះនឹងរៀបចំសមាជជាតិ ដែលធ្វើរៀងរាល់ពីរឆ្នាំម្ដងជាលើកដំបូងរបស់ខ្លួន៕ គឹមហឿន

The post នៅពេលខួបបោះឆ្នោតជិតចូលមកដល់ គណបក្សសង្គ្រោះជាតិបន្ទន់គោលជំហររបស់ខ្លួន appeared first on ខេមបូឌា ដេលី.

យោងតាមមេបញ្ជាការទ័ពអាកាសឲ្យដឹងថា មេបញ្ជាការរងកងទ័ពអាកាសម្នាក់និងយ៉ាងហោចណាស់មនុស្ស៤នាក់ទៀតបានស្លាប់ក្នុងឧបទ្ទវហេតុធ្លាក់ឧទ្ធម្ភាគចក្រយោធា ដែលផលិតនៅប្រទេសចិននៅក្នុងខណ្ឌដង្កោ រាជធានីភ្នំពេញកាលពីព្រឹកមិញ។ បុរសម្នាក់បាននៅរស់។

មន្រ្តីមួយរូបនៅនាយកដ្ឋានស៊ើបការណ៍ប៉ូលិសជាតិ ដែលបដិសេធមិនផ្តល់ឈ្មោះដោយសារតែគេមិនអនុញ្ញាតឲ្យនិយាយជាមួយអ្នកកាសែតបានមានប្រសាសន៍ថា ឧត្តមសេនីយ៍ត្រី អៀង វណ្ណារិទ្ធ ជាមេបញ្ជាការរងទ័ពអាកាសកងយោធពលខេមរភូមិន្ទ បានស្លាប់ក្នុងឧបទ្ទវហេតុនេះផងដែរ។ មន្រ្តីប៉ូលីសរូបនេះបានមានប្រសាសន៍ថា “គាត់បានជិះជាមួយគ្រូបង្ហាត់ដើម្បីមើលកូនចៅរបស់គាត់ហ្វឹកហាត់យ៉ាងដូចម៉្តេច” ។

នាយឧត្តមសេនីយ៍ សឹង សំណាង មេបញ្ជាការកងទ័ពអាកាសបានមានប្រសាសន៍ថា ទាហានបួននាក់បានស្លាប់រួមទាំងមេបញ្ជាការរងម្នាក់ផងដែរ។ មេបញ្ជាការកងទ័ពអាកាសរូបនេះបានមានប្រសាសន៍ថា “៤នាក់បានស្លាប់និងមា្នក់ទៀតទទួលរងរបួសហើយក្នុងចំណោម៤នាក់ដែលបានស្លាប់នោះ មានមេបញ្ជាការរងម្នាក់ផងដែរ” ។

លោក ខាត់ សុខៃ ចៅសង្កាត់ព្រៃសបានមានប្រសាសន៍ថាឧទ្ធម្ភាគចក្របានធ្លាក់ ក្នុងរណ្តៅដីជីកមួយកន្លែងនៅម៉ោងប្រហែល៩ព្រឹកមិញនេះនៅក្នុងភូមិព្រៃទីទុយ។ លោកបានបន្ថែមថារថយន្តសង្គ្រោះបន្ទាន់ បានដឹកអ្នកដែលរងរបួសភ្លាមៗទៅកាន់មន្ទីរពេទ្យកាល់ម៉ែត។

វេជ្ជបណ្ឌិតមួយរូបនៅពេទ្យកាល់ម៉ែតបានមានប្រសាសន៍ថា លោកចេង សុខសម្បូរមានវ័យ២៧ឆ្នាំ អាចនិយាយបាន ហើយគាត់ទទួលរងរបួសតិចតួចប៉ុណ្ណោះនៅក្នុងឧបទ្ទវហេតុធ្លាក់ឧទ្ធម្ភាគចក្រយោធានោះ។

លោក កឹម គុណវឌ្ឍ ជាអគ្គនាយកទូរទស្សន៍ជាតិទទកបានសរសេរក្នុងហ្វេសប៊ុកថា ឧទ្ធម្ភាគចក្រយោធាដែលធ្លាក់នោះគឺផលិតនៅប្រទេសចិនប្រភេទz-9 ពោលគឺជាឧទ្ធម្ភាគចក្រចំនួន១២គ្រឿងដែលទិញកាលពីឆ្នាំមុនក្នុងកម្ចីនិងកិច្ចព្រមព្រៀងទិញក្នុងទឹកប្រាក់ប្រហែល២០០លានដុល្លារអាមេរិកជាមួយរដ្ឋាភិបាលចិន។

The post មេបញ្ជាការរងកងទ័ពអាកាសម្នាក់ស្ថិតក្នុងចំណោមអ្នកស្លាប់់ក្នុងឧបទ្ទវហេតុធ្លាក់ឧទ្ធម្ភាគចក្រយោធា appeared first on ខេមបូឌា ដេលី.